ಕಳೆದ ಮೂರು ವರ್ಷಗಳಲ್ಲೇ ದೇಶದ ವಿವಿಧ ಸೈಬರ್ ಠಾಣೆಗಳಲ್ಲಿ 13,587 ಪ್ರಕರಣ ದಾಖಲಾಗಿದ್ದು, 8,711 ಆರೋಪಿಗಳನ್ನು ಜೈಲಿಗಟ್ಟಲಾಗಿದೆ. ಶೇಕಡ 50 ಪ್ರಕರಣಗಳು ಹಣಕಾಸು ವಂಚನೆಗಳಿಗೆ ಸಂಬಂಧಿಸಿದ್ದಾದರೆ, ಮಹಿಳೆಯರಿಗೆ ಅಶ್ಲೀಲ ಫೋಟೋ, ವಿಡಿಯೋಗಳನ್ನು ಕಳಿಸಿ ಕಿರುಕುಳ ನೀಡುವ ಪ್ರಕರಣಗಳು ಶೇಕಡ 45ರಷ್ಟು. ಖಾಸಗಿ ದೃಶ್ಯಗಳನ್ನು ಸೆರೆಹಿಡಿದು, ಅದನ್ನು ವಾಟ್ಸ್ಆಪ್ ಮೂಲಕ ಕಳುಹಿಸಿ ಹಣಕ್ಕಾಗಿ ಬೇಡಿಕೆ ಒಡ್ಡುವ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ಮಹಿಳೆಯರ ಪಾಲಿಗೆ ಹೊಸ ತಲೆನೋವಾಗಿ ಪರಿಣಮಿಸಿದೆ. ಅದರಲ್ಲೂ, ಹದಿಹರೆಯದವರು ಇಂಥ ಪ್ರಕರಣಗಳ ಸಂತ್ರಸ್ತರಾಗುತ್ತಿದ್ದಾರೆ. ಅತಿಯಾದ ಮತ್ತು ವಿವೇಚನೆ ಇಲ್ಲದೆ ಮೊಬೈಲ್ ಬಳಕೆ, ಸ್ನೇಹದ ಹೆಸರಿನಲ್ಲಿ ನಡೆಯುವ ಮೋಸ ಅರಿಯದಿರುವುದು, ಆಕರ್ಷಣೆಗಳಿಗೆ ಬಲಿಬೀಳುವುದು ಸೇರಿದಂತೆ ಅನೇಕ ದೌರ್ಬಲ್ಯಗಳನ್ನೇ ಬಂಡವಾಳ ಮಾಡಿಕೊಳ್ಳುವ ವಂಚಕರು ಹಣ ಪಡೆಯುವವರೆಗೂ ನಿರಂತರ ಕಿರುಕುಳ ನೀಡುತ್ತಾರೆ. ಈ ಬಗೆಯ ಅಪರಾಧ ಪ್ರಕರಣಗಳು ಪೊಲೀಸ್ ಠಾಣೆ ಮೆಟ್ಟಿಲೇರುವ ಸಂಖ್ಯೆಯೂ ಕಡಿಮೆ. ಎಷ್ಟೋ ಜನರು ಮರ್ಯಾದೆಗೆ ಹೆದರಿ ದುಡ್ಡು ಕೊಟ್ಟೋ ಅಥವಾ ವಂಚಕರ ಇತರ ಬೇಡಿಕೆಯನ್ನು ಈಡೇರಿಸಿ ಸುಮ್ಮನಾಗಿಬಿಡುತ್ತಾರೆ. ಪರಿಣಾಮ, ವಂಚಕರ ಧಾಷ್ಟ್ಯ ಮತ್ತಷ್ಟು ಹೆಚ್ಚುತ್ತಿದೆ.
