ಕಾನೂನು ಸುವ್ಯವಸ್ಥೆ ಕಾಪಾಡುವ ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿ ದೈಹಿಕವಾಗಿ ಸದೃಢವಾಗಿರುವುದು ಸಹಜ ಅಪೇಕ್ಷೆ ಮಾತ್ರವಲ್ಲ ಅನಿವಾರ್ಯವೂ ಹೌದು. ಆದರೆ, ಒತ್ತಡ, ಆಹಾರಪದ್ಧತಿಯ ಅಶಿಸ್ತಿನಿಂದಾಗಿ ತೂಕ ಹೆಚ್ಚಾಗಿ, ಬೊಜ್ಜಿನ ಸಮಸ್ಯೆ ಎದುರಿಸುತ್ತಿರುವ ಅಧಿಕಾರಿ, ಸಿಬ್ಬಂದಿ ಸಂಖ್ಯೆ ಕಡಿಮೆಯೇನಿಲ್ಲ. ಪೊಲೀಸರು ಗಂಭಿರ ಅಪರಾಧ ಪ್ರಕರಣಗಳನ್ನು ಭೇದಿಸಬೇಕಾಗುತ್ತದೆ, ಕಳ್ಳರನ್ನು, ಸಮಾಜವಿರೋಧಿ ಶಕ್ತಿಗಳನ್ನು ಹಿಡಿಯಲು ಸಾಹಸ ಪ್ರದರ್ಶಿಸಬೇಕಾಗುತ್ತದೆ. ಆದ್ದರಿಂದ, ತೂಕ ಕಡಿಮೆ ಮಾಡಿಕೊಳ್ಳುವುದು ಮತ್ತು ದೈಹಿಕ ಸದೃಢತೆ ಕಾಪಾಡಿಕೊಳ್ಳುವುದು ಕೆಲಸದ ದೃಷ್ಟಿಯಿಂದಲೂ, ಆರೋಗ್ಯದ ದೃಷ್ಟಿಯಿಂದಲೂ ಮುಖ್ಯ. ಈ ನಿಟ್ಟಿನಲ್ಲಿ ಕಠಿಣ ಕ್ರಮಕ್ಕೆ ಮುಂದಾಗಿರುವ ರಾಜ್ಯ ಪೊಲೀಸ್ ಇಲಾಖೆ ಏಪ್ರಿಲ್ 30ರೊಳಗೆ ತೂಕ ಇಳಿಸಿಕೊಳ್ಳದವರ ಮುಂಬಡ್ತಿ ತಡೆಹಿಡಿಯುವುದಾಗಿ ಹೇಳಿದೆ. ದೈಹಿಕವಾಗಿ ಸದೃಢವಾಗಿರುವ ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿಯನ್ನು ಮಾತ್ರವೇ ಬಡ್ತಿ ಹಾಗೂ ರಾಷ್ಟ್ರಪತಿ ಪದಕಕ್ಕೆ ಆಯ್ಕೆ ಮಾಡಲಾಗುತ್ತದೆ ಎಂದು ಕೇಂದ್ರ ಗೃಹಸಚಿವಾಲಯ ಆದೇಶ ಹೊರಡಿಸಿ 2 ವರ್ಷಗಳೇ ಸಂದಿವೆ ಎಂಬುದು ಗಮನಾರ್ಹ. ವಯೋಮಾನಕ್ಕೆ ತಕ್ಕಂತೆ ತೂಕ ಇಳಿಸಿಕೊಳ್ಳಲು ತಿಳಿಸಲಾಗಿದ್ದು, ಇದಕ್ಕಾಗಿ 40 ರಿಂದ 50 ವರ್ಷದವರಿಗೆ ಯೋಗ, 50 ವರ್ಷ ಮೇಲ್ಪಟ್ಟವರಿಗೆ ಕಡ್ಡಾಯವಾಗಿ ವಾಕಿಂಗ್ ಸೇರಿ ಹಲವು ನಿಯಮಗಳನ್ನು ರೂಪಿಸಲಾಗಿದೆ. ತೂಕ ಇಳಿಸುವ ಜವಾಬ್ದಾರಿಯನ್ನು ಆಯಾ ಘಟಕದ ಕಮಾಂಡೆಂಟ್ಗೆ ವಹಿಸಲಾಗಿದೆ. ಬೊಜ್ಜಿನ ಸಮಸ್ಯೆಯಿಂದಾಗಿ ಹಲವು ಪೊಲೀಸ್ ಸಿಬ್ಬಂದಿ ಗಂಭೀರ ಕಾಯಿಲೆಗೆ ತುತ್ತಾದ, ಪ್ರಾಣ ಕಳೆದುಕೊಂಡ ನಿದರ್ಶನಗಳೂ ಇವೆ. ಕಾರ್ಯದಕ್ಷತೆ ಮತ್ತು ಆರೋಗ್ಯರಕ್ಷಣೆ ಎರಡೂ ಆಯಾಮದಲ್ಲೂ ಹೊಸ ನಿಯಮ ಪೂರಕವಾಗಿದೆ. ಇಂಥ ಕ್ರಮಗಳು ಪೊಲೀಸರ ಆತ್ಮವಿಶ್ವಾಸವನ್ನೂ ಹೆಚ್ಚಿಸುತ್ತವೆ ಎಂಬುದರಲ್ಲಿ ಅನುಮಾನವಿಲ್ಲ.
