ಮಾರ್ಗಸೂಚಿ ಬೆಲೆ ಎಂಬುದು ಜಮೀನು, ನಿವೇಶನ, ಕಟ್ಟಡ ಖರೀಸಬೇಕಾದ ಸಂದರ್ಭದಲ್ಲಿ ಪಾವತಿಸಬೇಕಾದ ಕನಿಷ್ಠ ನೋಂದಣಿ ಶುಲ್ಕವನ್ನು ನಿಗದಿಪಡಿಸುವುದಾಗಿದೆ. ಮಾರ್ಗಸೂಚಿ ಬೆಲೆಗಿಂತ ಕಡಿಮೆ ದರದಲ್ಲಿ ಖರೀದಿ ಮಾಡಿದರೂ ಕೂಡ ಮಾರ್ಗಸೂಚಿ ಬೆಲೆ ಅನುಸಾರವೇ ಲೆಕ್ಕಹಾಕಿ ನೋಂದಣಿ ಶುಲ್ಕ ಪಾವತಿಸಲೇಬೇಕು. ಒಂದು ವೇಳೆ ಮಾರ್ಗಸೂಚಿ ಬೆಲೆಗಿಂತ ಹೆಚ್ಚಿನ ದರದಲ್ಲಿ ಖರೀದಿಸಿದರೆ, ಅದಕ್ಕೆ ಅನುಗುಣವಾಗಿ ಹೆಚ್ಚಿನ ನೋಂದಣಿ ಶುಲ್ಕ ಪಾವತಿಸಬೇಕಾಗುತ್ತದೆ. ಬ್ಯಾಂಕುಗಳು ಕೂಡ ಬಹುತೇಕವಾಗಿ ಮಾರ್ಗಸೂಚಿ ಬೆಲೆ ಅನುಸಾರವೇ ಸಾಲ ಸೌಲಭ್ಯ ಒದಗಿಸುತ್ತವೆ. ಆದರೆ, ಜಮೀನು ಮತ್ತು ನಿವೇಶನದ ವಿಷಯಕ್ಕೆ ಬಂದಾಗ ಮಾರುಕಟ್ಟೆ ಬೆಲೆಗಳು ಮಾರ್ಗಸೂಚಿ ಬೆಲೆಗಳಿಗಿಂತ ಮೂರ್ನಾಲ್ಕು ಪಟ್ಟು ಹೆಚ್ಚು ಇರುತ್ತವೆ. ಹೀಗಾಗಿ, ಜಮೀನು ಮತ್ತು ನಿವೇಶನ ಖರೀದಿಸಲು ಅಗತ್ಯವಿರುವಷ್ಟು ಪ್ರಮಾಣದಲ್ಲಿ ಸಾಲ ಸೌಲಭ್ಯವು ದೊರೆಯುವ ಸಾಧ್ಯತೆಗಳು ವಿರಳ. ಇದನ್ನು ಸರಿಪಡಿಸಬೇಕಾದರೆ, ಮಾರ್ಗಸೂಚಿ ದರಗಳನ್ನು ವಾಸ್ತವ ಮಾರುಕಟ್ಟೆಯ ದರಗಳಿಗೆ ಹೊಂದಾಣಿಕೆಯಾಗುವಂತೆ ನಿಗದಿಸಬೇಕು ಹಾಗೂ ಖರೀದಿದಾರರಿಗೆ ಹೊರೆಯಾಗದಂತೆ ನೋಂದಣಿ ಶುಲ್ಕ ದರಗಳನ್ನು ತಗ್ಗಿಸಬೇಕು.
