2021ರಲ್ಲಿ ರಾಜ್ಯದ ಪ್ರತಿ ಜಿಲ್ಲೆಯ ಕನಿಷ್ಠ 20ರಿಂದ 100 ಹಳ್ಳಿಗಳು ಜಲಸಂಕಟ ಎದುರಿಸುತ್ತಿದ್ದವು. ಅಲ್ಲದೆ, ಜಲಮೂಲಗಳೇ ಇಲ್ಲದ ಗ್ರಾಮಗಳ ಸ್ಥಿತಿಯಂತೂ ಶೋಚನೀಯವಾಗಿತ್ತು. ಈಗಲೂ ಪರಿಸ್ಥಿತಿ ತುಂಬ ಬದಲಾಗಿಲ್ಲ. ಹಳೇ ಮೈಸೂರು, ಕಲ್ಯಾಣ ಕರ್ನಾಟಕ ಭಾಗದ ಜಿಲ್ಲೆಗಳಲ್ಲಿ ಜಲಸಂಕಷ್ಟ ಹೆಚ್ಚಿನ ಪ್ರಮಾಣದಲ್ಲಿದೆ. ಜಲಸೆಲೆಗಳು ಬತ್ತಿ ಹೋಗಿರುವುದರಿಂದ ಪರ್ಯಾಯ ಮೂಲಗಳೂ ಕಾಣದಂತಾಗಿವೆ. ಹಾಗಾಗಿಯೇ, ನರೇಗಾ ಅಡಿ ಕೆರೆ ಮತ್ತು ಕಲ್ಯಾಣಿಗಳ ಅಭಿವೃದ್ಧಿ ಕಾರ್ಯ ಕೈಗೊಳ್ಳಲಾಗುತ್ತಿದೆ. ಈ ಕಾಮಗಾರಿಗಳನ್ನು ಪಾರದರ್ಶಕವಾಗಿ ಪೂರ್ಣಗೊಳಿಸಬೇಕು. ಮತ್ತಷ್ಟು ಕೆರೆ, ಕಲ್ಯಾಣಿಗಳನ್ನು ಗುರುತಿಸಿ ಅಭಿವೃದ್ಧಿ ಪಡಿಸಬೇಕು. ನೀರಿನ ಸಮಸ್ಯೆ ನಿವಾರಣೆಗೆ ಬರೀ ತಾತ್ಕಾಲಿಕ ಕ್ರಮಗಳಿಗೆ ಮುಂದಾಗದೆ, ಸಾಧ್ಯ ಇರುವೆಡೆಯಲ್ಲ ಶಾಶ್ವತ ಪರಿಹಾರ ಒದಗಿಸಬೇಕು. ಈ ನಿಟ್ಟಿನಲ್ಲಿ ಸ್ಥಳೀಯ ಜನಪ್ರತಿನಿಧಿಗಳ, ಅಧಿಕಾರಿಗಳ ಪಾತ್ರ ತುಂಬ ಮುಖ್ಯ. ಏಕೆಂದರೆ, ಅವರಿಗೆ ಸಮಸ್ಯೆಯ ತೀವ್ರತೆ ಮತ್ತು ಯಾವೆಲ್ಲ ಗ್ರಾಮ, ಭಾಗಗಳಲ್ಲಿ ಸಮರೋಪಾದಿ ಕಾರ್ಯದ ಅಗತ್ಯವಿದೆ ಎಂಬುದರ ಅರಿವಿರುತ್ತದೆ. ಹೀಗಾಗಿ ಪ್ರತಿ ಬೇಸಿಗೆ ಬಂದಾಗ ಹಳ್ಳಿಗಳು ನೀರಿಗಾಗಿ ಪರಿತಪಿಸುತ್ತಿರುವ ಬವಣೆಯನ್ನು ತಪ್ಪಿಸಬೇಕು.
