ಏಕೆಂದರೆ ಮುಂದೆ ಇವರು ಸರ್ಕಾರಿ ವ್ಯವಸ್ಥೆಯ ಭಾಗವಾಗಿ ಆಡಳಿತ ಯಂತ್ರಾಂಗದಲ್ಲಿ ಕಾರ್ಯನಿರ್ವಹಿಸಬೇಕಾಗುತ್ತದೆ; ಜನರಿಗೆ ಸಮರ್ಪಕವಾದ ಸೇವೆ ನೀಡಬೇಕಾಗುತ್ತದೆ. ಒಂದು ವೇಳೆ, ಅಕ್ರಮ ಮಾರ್ಗದಿಂದ ಹುದ್ದೆ ಗಿಟ್ಟಿಸಿಕೊಂಡರೆ ಅವರು ಎಷ್ಟು ಪ್ರಾಮಾಣಿಕವಾಗಿ ಕೆಲಸ ಮಾಡಲು ಸಾಧ್ಯ? ನೇಮಕಾತಿಯಲ್ಲಿ ಅವ್ಯವಹಾರಗಳು ನಡೆದರೆ, ಮೊದಲೇ ಸರ್ಕಾರಿ ವ್ಯವಸ್ಥೆಯ ಬಗೆಗೆ ನಕಾರಾತ್ಮಕ ಅಭಿಪ್ರಾಯ ಹೊಂದಿರುವ ಜನರಿಗೆ ಮತ್ತಷ್ಟು ನಿರಾಸೆ ಖಂಡಿತ. ಇನ್ನೊಂದು ಸಂಗತಿಯೂ ಇಲ್ಲಿ ಮುಖ್ಯ. ಉತ್ತಮ ಹುದ್ದೆ ಪಡೆಯಬೇಕು, ಒಳ್ಳೆಯ ಸಂಬಳ ಗಳಿಸಿ ಉತ್ತಮ ಜೀವನ ನಡೆಸಬೇಕು ಎಂಬ ಆಸೆಗಳಿರುವುದು ಸಾಮಾನ್ಯ. ಆದರೆ ಆ ಗುರಿಯ ಜತೆಗೆ ಅದನ್ನು ಈಡೇರಿಸಿಕೊಳ್ಳುವ ಹಾದಿ ಸಹ ಮುಖ್ಯವಾಗಬೇಕು. ಗುರಿಯೊಂದೇ ಮುಖ್ಯ; ಮಾರ್ಗ ಯಾವುದಾದರೂ ಸರಿ ಎಂಬ ನಿಲುವು ಸರಿಯಲ್ಲ. ಹೀಗಾಗಿ ಸರ್ಕಾರಿ ಹುದ್ದೆ ಆಕಾಂಕ್ಷಿಗಳು ಕನಸು ನನಸು ಮಾಡಿಕೊಳ್ಳಲು ನೇರಮಾರ್ಗವನ್ನು ಆಶ್ರಯಿಸಬೇಕೆ ವಿನಾ ಅಡ್ಡದಾರಿಯನ್ನಲ್ಲ. ಕಟ್ಟುನಿಟ್ಟು ನಿಯಮಗಳ ಜತೆಗೆ, ಇಂಥದೊಂದು ನೀತಿಸಂಹಿತೆ ಸ್ವಯಂಪ್ರೇರಿತವಾಗಿ ರೂಢಿಗತವಾಗಬೇಕು. ಅಂದಾಗ, ಅಕ್ರಮದ ಆಲೋಚನೆ ಹತ್ತಿರವೂ ಸುಳಿಯುವುದಿಲ್ಲ.
