ಭಾರತದ ನ್ಯಾಯಾಂಗದ ಮೇಲಿನ ಒತ್ತಡವನ್ನು ತಗ್ಗಿಸುವ, ಆ ಮೂಲಕ ಪ್ರಕರಣಗಳ ಶೀಘ್ರ ವಿಲೇವಾರಿ ಅಗತ್ಯವನ್ನು ರಿಜಿಜು ಮಾತು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ. ನ್ಯಾಯದಾನ ವಿಳಂಬವಾದರೆ ಕಕ್ಷಿದಾರರು ಹಾಗೂ ಸಂಬಂಧಿತ ವ್ಯಕ್ತಿಗಳು ಮಾನಸಿಕ, ಆರ್ಥಿಕ ಸೇರಿ ಬಹುವಿಧ ತೊಂದರೆ ಎದುರಿಸಬೇಕಾಗುತ್ತದೆ; ಇದರಿಂದ ಕೌಟುಂಬಿಕ, ಸಾಮಾಜಿಕ ಸಮಸ್ಯೆಗಳು ಉಂಟಾಗುತ್ತವೆ. ಇನ್ನು, ವಿಚಾರಣಾಧೀನ ಕೈದಿಗಳ ಕಥೆ-ವ್ಯಥೆ ಮತ್ತೊಂದು ಬಗೆಯದು. ಭಾರತದ ಕಾರಾಗೃಹಗಳಲ್ಲಿ ಅವುಗಳ ಸಾಮರ್ಥ್ಯಕ್ಕಿಂತ ಹೆಚ್ಚು ಸಂಖ್ಯೆಯ ಕೈದಿಗಳನ್ನು ಇಡಲಾಗುತ್ತಿರುವುದು ಈ ಸಮಸ್ಯೆಯ ಮತ್ತೊಂದು ಆಯಾಮ. ಯಾವುದೇ ಪ್ರಕರಣದಲ್ಲಿ ತನಿಖೆ ನಡೆಸಿ, ಆರೋಪಪಟ್ಟಿ ಸಲ್ಲಿಸುವುದು ಪೊಲೀಸರ ಕೆಲಸವಾದರೆ, ಆರೋಪಿಯು ಅಪರಾಧಿಯೋ ಅಲ್ಲವೋ ಎಂಬುದನ್ನು ನ್ಯಾಯಾಲಯವೇ ತೀರ್ವನಿಸಬೇಕಾಗುತ್ತದೆ. ಹೀಗಾಗಿ ಆದಷ್ಟು ಬೇಗ ಈ ತೀರ್ವನವಾದಲ್ಲಿ ಉತ್ತಮ. ಹಾಗಾಗಬೇಕು ಎಂದಾದಲ್ಲಿ ನ್ಯಾಯಾಂಗದ ಮೇಲೆ ವಿಪರೀತ ಹೊರೆ ಇರಬಾರದು. ಒತ್ತಡವನ್ನು ತಗ್ಗಿಸುವ ನಿಟ್ಟಿನಲ್ಲಿ ನ್ಯಾಯಾಂಗದ ವಿವಿಧ ಶಾಖೆಗಳಲ್ಲಿ ಖಾಲಿ ಇರುವ ಹುದ್ದೆಗಳ ಭರ್ತಿ, ತಂತ್ರಜ್ಞಾನ ಅಳವಡಿಕೆಯನ್ನು ಇನ್ನಷ್ಟು ಹೆಚ್ಚಿಸುವ ಸಾಧ್ಯತೆ ಕುರಿತು ಚಿಂತನೆ ನಡೆಯಲಿ. ಲೋಕ ಅದಾಲತ್ಗಳಲ್ಲಿ ಸರಳ ಪ್ರಕ್ರಿಯೆ ಮೂಲಕ ವಿವಿಧ ಬಗೆಯ ಪ್ರಕರಣಗಳ ಇತ್ಯರ್ಥ ನಡೆಸಲು ಸಾಧ್ಯವಿದ್ದು, ಇವನ್ನು ಇನ್ನೂ ಹೆಚ್ಚೆಚ್ಚು ನಡೆಸುವ ಕುರಿತು ಆಲೋಚಿಸಬಹುದು. ಒಟ್ಟಿನಲ್ಲಿ ಶೀಘ್ರ ನ್ಯಾಯದಾನ ಸಾಕಾರವಾಗಬೇಕು. ಇದರಿಂದ ಆಯಾ ವ್ಯಕ್ತಿ-ಕುಟುಂಬದ ಜತೆಗೆ ಒಟ್ಟಾರೆಯಾಗಿ ದೇಶಕ್ಕೂ ಒಳಿತು.
