ತಂತ್ರಜ್ಞಾನ ಬೆಳೆದಂತೆ ನಾನಾ ಸೌಕರ್ಯಗಳೂ ಹೆಚ್ಚಿವೆ ಎಂಬುದರಲ್ಲಿ ಎರಡು ಮಾತಿಲ್ಲ. ಇದರಿಂದಾಗಿ ಜನರ ಕೆಲಸವೂ ಸುಲಭವಾಗಿದೆ. ಹಿಂದೆಲ್ಲ ಗಂಟೆಗಟ್ಟಲೆ ಕ್ಯೂದಲ್ಲಿ ನಿಂತು ಮಾಡಬೇಕಾಗಿದ್ದ ಕೆಲಸಕಾರ್ಯಗಳು ಈಗ ಅಂತರ್ಜಾಲ ಸಂಪರ್ಕ ಇರುವ ಮೊಬೈಲಿನಲ್ಲಿ ಕೆಒಲವೇ ಸೆಕೆಂಡುಗಳಲ್ಲಿ ಸಲೀಸಾಗಿ ನಡೆದುಹೋಗುತ್ತವೆ. ಸರ್ಕಾರಿ ಕೆಲಸದಲ್ಲೂ ಒಂದಷ್ಟು ತಂತ್ರಜ್ಞಾನ ಅಳವಡಿಕೆಯಿಂದಾಗಿ ಜನರಿಗೆ ಪ್ರಯೋಜನವಾಗಿದೆ. ಆದರೆ ಇಂತಹ ಸವಲತ್ತು ಅನುಕೂಲದ ಜತೆಗೆ ಅಪಾಯವನ್ನೂ ಕಟ್ಟಿಕೊಂಡಿದೆ ಎಂಬುದನ್ನು ಮರೆಯಬಾರದು. ಕ್ರೆಡಿಟ್, ಡೆಬಿಟ್ ಕಾರ್ಡ್ಗೆ ಕನ್ನ ಹಾಕಿ ಹಣ ದೋಚುವವರು, ಬ್ಯಾಂಕ್ ಅಧಿಕಾರಿಗಳ ಹೆಸರಿನಲ್ಲಿ ಫೋನ್ ಮಾಡಿ ಖಾತೆ ಮಾಹಿತಿ ಪಡೆದು ವಂಚಿಸುವವರು, ಸೈಬರ್ ಮೋಸಗಾರರು, ಬಹುಮಾನ ಬಂದಿದೆ ಎಂದು ಆಮಿಷ ಒಡ್ಡಿ ಅದನ್ನು ಬಿಡಿಸಿಕೊಳ್ಳಲು ತೆರಿಗೆ ಕಟ್ಟಬೇಕೆಂದು ಹೇಳಿ ನಂಬಿಸಿ ಹಣ ಪೀಕುವವರು, ಫೋಟೋವನ್ನು ತಿರುಚಿ ಜಾಲತಾಣದಲ್ಲಿ ಬಹಿರಂಗಪಡಿಸುವುದಾಗಿ ಹೇಳಿ ಹಣ ಸೆಳೆಯುವವರು... ಹೀಗೆ ವಂಚನೆಗೆ ನಾನಾ ಮುಖಗಳು. ಅದರಲ್ಲೂ ಈಗ ಮಕ್ಕಳ ಕೈಗೆ ಫೋನ್ ಸಿಗುವುದರಿಂದಾಗಿ ಮತ್ತಷ್ಟು ವಂಚನೆಯ ದಾರಿಗಳು ತೆರೆದುಕೊಂಡಿವೆ. ಗೊತ್ತಿದ್ದೋ ಗೊತ್ತಿಲ್ಲದೆಯೋ ಮಕ್ಕಳು ಮೊಬೈಲ್ ಮಾಯಾಜಾಲದಲ್ಲಿ ಸಿಲುಕಿ ಫಜೀತಿಪಡುವ ಅನೇಕ ಪ್ರಸಂಗಗಳು ವರದಿಯಾಗುತ್ತವೆ. ವಿಶೇಷವಾಗಿ ಹೆಣ್ಣುಮಕ್ಕಳು ಈ ವಿಷಯದಲ್ಲಿ ಬಹಳ ಹುಷಾರಾಗಿರಬೇಕು. ವಿವಾಹವಾಗುವುದಾಗಿ, ನೌಕರಿ ಕೊಡಿಸುವುದಾಗಿ...ಹೀಗೆ ನಾನಾ ಬಗೆಯಲ್ಲಿ ಮೋಸಮಾಡುವವರ ಬಗ್ಗೆ ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಲೇ ಇರುತ್ತವೆ.
