ಈ ಯೋಜನೆಗೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ತಲಾ ಶೇ.45 ಹಣ ಭರಿಸುತ್ತವೆ. ಉಳಿದ ಶೇ.10 ಹಣವನ್ನು ಸ್ಥಳೀಯ ವಂತಿಗೆ ಮೂಲಕ ಸಂಗ್ರಹಿಸಬೇಕು ಎಂಬುದು ನಿಯಮಾವಳಿ. ಆದರೆ ಸ್ಥಳೀಯ ವಂತಿಗೆ ಸಂಗ್ರಹ ಕಷ್ಟವೆಂಬ ಕಾರಣಕ್ಕೆ ರಾಜ್ಯ ಸರ್ಕಾರವೇ ಭರಿಸಲು ನಿರ್ಣಯಿಸಲಾಗಿದೆ. ಈ ಯೋಜನೆಗೆ ರಾಜ್ಯದ ಪಾಲು ಸುಮಾರು 4500 ಕೋಟಿಯಷ್ಟಿದೆ. ಇಷ್ಟು ಮೊತ್ತವನ್ನು ಸ್ವಂತವಾಗಿ ಹೊಂದಿಸಲು ಸಾಧ್ಯವಿಲ್ಲದ ಕಾರಣ ಸರ್ಕಾರ ವಿಶ್ವ ಬ್ಯಾಂಕ್ನಲ್ಲಿ ಸಾಲ ಮಾಡಲು ನಿರ್ಧರಿಸಿದೆ. ಉತ್ತರ ಕನ್ನಡ, ಹಾಸನ, ಚಿತ್ರದುರ್ಗ, ಉಡುಪಿ, ರಾಮನಗರ ಮುಂತಾದ ಜಿಲ್ಲೆಗಳಲ್ಲಿ ಯೋಜನೆ ಅನುಷ್ಠಾನವಾಗುತ್ತಿದೆ. ಸರ್ಕಾರದ ಯೋಜನೆಗಳು ಮೇಲ್ನೋಟಕ್ಕೆ ಚೆನ್ನಾಗಿಯೇ ಕಾಣುತ್ತವೆ; ಜನರಲ್ಲಿ ಸಹ ಆಶಾಭಾವನೆ ಗರಿಗೆದರುತ್ತದೆ. ಆದರೆ ಅನುಷ್ಠಾನದ ಹಂತದಲ್ಲಿ ಮತ್ತು ಹಣಕಾಸಿನ ಹಂಚಿಕೆ ಸಮಯದಲ್ಲಿಯೇ ಸಮಸ್ಯೆಯಾಗುವುದು. ಎಷ್ಟೋ ಯೋಜನೆಗಳಿಗೆ ಕಾಲಮಿತಿ ಇರದಿರುವುದು ಮತ್ತೊಂದು ಸಮಸ್ಯೆ. ಹೀಗಾಗಿ ವಿಳಂಬವಾಗಿ ಫಲಾನುಭವಿ ಜನರಿಗೂ ತೊಂದರೆಯಲ್ಲದೆ, ಸರ್ಕಾರಕ್ಕೂ ಅಧಿಕ ವೆಚ್ಚದ ಹೊರೆ ಬೀಳುತ್ತದೆ. ಜಲಜೀವನ ಮಿಷನ್ ಯೋಜನೆಯ ಪ್ರತಿ ಕಾಮಗಾರಿಗೂ ಸಮಯ ನಿಗದಿ ಮಾಡಲಾಗಿದೆ ಎಂದು ಸಚಿವ ಮಧುಸ್ವಾಮಿ ಹೇಳಿದ್ದಾರೆ.
