ಕಲಿಕಾ ಕ್ರಮಕ್ಕೆ ಸಂಬಂಧಿಸಿ ಮತ್ತಷ್ಟು ಹೊಸ ವಿಚಾರಗಳು ಅನುಷ್ಠಾನಕ್ಕೆ ಬರಲಿದ್ದು, ಇವು ಹಳೆಯ ಕೊರತೆಗಳನ್ನು ನೀಗಿಸಲು ಪೂರಕವಾಗಲಿವೆ. ಮಕ್ಕಳು ಭಾರದ ಶಾಲಾಬ್ಯಾಗ್ ಹೊರುವ ಹಿಂಸೆ ಬಗ್ಗೆ ಅನೇಕ ವೇಳೆ ಚರ್ಚೆಯಾಗಿತ್ತಾದರೂ, ಸೂಕ್ತ ಪರಿಹಾರಸೂತ್ರವೇನೂ ಕಂಡುಬಂದಿರಲಿಲ್ಲ. ಹೊಸ ಶಿಕ್ಷಣ ನೀತಿ ಈ ಬಗ್ಗೆ ಗಮನ ಹರಿಸಿದ್ದು, ಮಕ್ಕಳು ಕೊಂಡೊಯ್ಯುವ ಸ್ಕೂಲ್ಬ್ಯಾಗ್ ಭಾರಕ್ಕೂ ಮಾನದಂಡಗಳನ್ನು ರಚಿಸಿದೆ. 1-10ನೇ ತರಗತಿ ಮಕ್ಕಳ ಸ್ಕೂಲ್ಬ್ಯಾಗ್ ಅವರ ದೇಹ ತೂಕದ ಶೇಕಡ 10ರಷ್ಟು ಇರಬೇಕು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವಿವಿಧ ಸಂಸ್ಥೆಗಳು ನಡೆಸಿದ ಅಧ್ಯಯನಗಳನ್ನು ಆಧರಿಸಿ ಈ ಮಾನದಂಡ ನಿರ್ಧರಿಸಲಾಗಿದೆ. ವಿದ್ಯಾರ್ಥಿಗಳಿಗೂ, ಪಾಲಕರಿಗೂ ಮತ್ತೊಂದು ದೊಡ್ಡ ಸಮಸ್ಯೆ ಮನೆಪಾಠಕ್ಕೆ ಸಂಬಂಧಿಸಿದ್ದು. ಸಣ್ಣ ತರಗತಿಗಳಿಗೂ ಹೆಚ್ಚು ಮನೆಪಾಠ (ಹೋಮ್ರ್ಕ್) ಕೊಡುವುದರಿಂದ ಮಕ್ಕಳಿಗೆ ಬಾಲ್ಯವನ್ನು ಅನುಭವಿಸಲೇ ಆಗುತ್ತಿಲ್ಲ ಎಂಬ ಕಳವಳ ವ್ಯಾಪಕವಾಗಿ ಕೇಳಿಬಂದಿತ್ತು. ಈ ಹಿನ್ನೆಲೆಯಲ್ಲಿ, ಎರಡನೇ ತರಗತಿವರೆಗಿನ ಮಕ್ಕಳಿಗೆ ಯಾವುದೇ ರೀತಿಯ ಹೋಮ್ರ್ಕ ನೀಡುವಂತಿಲ್ಲ. 3, 4 ಹಾಗೂ 5ನೇ ತರಗತಿ ಮಕ್ಕಳಿಗೆ ವಾರಕ್ಕೆ ಎರಡು ತಾಸು, 9ರಿಂದ 12ನೇ ತರಗತಿವರೆಗಿನ ಮಕ್ಕಳಿಗೆ ದಿನಕ್ಕೆ ಎರಡು ತಾಸಿಗೂ ಹೆಚ್ಚಿನ ಅವಧಿಯ ಮನೆಪಾಠ ನೀಡುವಂತಿಲ್ಲ ಎಂದು ಶಿಫಾರಸು ಮಾಡಲಾಗಿದೆ. ಮಕ್ಕಳು ಪಠ್ಯೇತರ ಚಟುವಟಿಕೆಯಲ್ಲಿ ತೊಡಗುವಂತಾಗಲು ಮತ್ತು ಇತರ ಪುಸ್ತಕಗಳನ್ನು ಓದಲು ಪ್ರೇರೇಪಿಸಲಾಗಿದೆ. ಮಕ್ಕಳ ಮನೋವಿಕಾಸಕ್ಕೆ ಇವು ಪೂರಕವಾಗಿ ಪರಿಣಮಿಸಬಲ್ಲವು. ಹಾಗಾಗಿ, ಶಿಕ್ಷಣ ನೀತಿಯ ಜಾರಿಯಲ್ಲಾದರೂ ರಾಜ್ಯಗಳು ರಾಜಕೀಯ ಬೆರೆಸದೆ ಹೊಸ ಸುಧಾರಣೆಗಳನ್ನು ದಿಟ್ಟವಾಗಿ ಅನುಷ್ಠಾನಕ್ಕೆ ತರಬೇಕು.
