ಈ ಯೋಜನೆಯಲ್ಲಿ, ಸರ್ಕಾರದಿಂದ ನೇರವಾಗಿ ಆಟಗಾರರಿಗೆ ಹಣ ಜಮಾ ಆಗುವಂತೆ ಮಾಡಲಾಗಿದೆ. ಈ ಯೋಜನೆಯ ಫಲಿತಾಂಶ ಈಗಾಗಲೇ ಕಂಡುಬರುತ್ತಿರುವುದು ಸಕಾರಾತ್ಮಕ ಅಂಶ. ಇದಲ್ಲದೆ, ದೈಹಿಕವಾಗಿ ಸದೃಢವಾಗಿರುವ ಕೆಲ ಬುಡಕಟ್ಟು ಸಮುದಾಯದ ಯುವಜನರನ್ನು ಕ್ರೀಡೆಯಲ್ಲಿ ತೊಡಗಿಸುವ ಬಗ್ಗೆ ಹಿಂದೆಯೂ ಪ್ರಯತ್ನಗಳು ನಡೆದಿದ್ದು, ಅಂಥ ಉಪಕ್ರಮಗಳನ್ನು ವಿಸ್ತರಿಸುವ ಬಗ್ಗೆ ಯೋಚಿಸಬಹುದಾಗಿದೆ. ಯಾವುದೇ ಕ್ರೀಡೆಯಲ್ಲಿ ಸಾಧನೆಗೈಯಲು ಉತ್ತಮ ವ್ಯವಸ್ಥೆ, ತರಬೇತಿ ಹಾಗೂ ಪ್ರೋತ್ಸಾಹ ಕೂಡ ಮುಖ್ಯವಾಗುತ್ತದೆ. ಅಲ್ಲದೆ, ಕ್ರೀಡಾಮನೋಭಾವ ಮತ್ತು ಆಸಕ್ತಿ ಚಿಕ್ಕಂದಿನಿಂದಲೇ ಬೆಳೆಯಬೇಕಾದ ಗುಣಾಂಶವಾಗಿದ್ದು, ಶಾಲಾ ಪರಿಸರದಲ್ಲಿಯೇ ಇದಕ್ಕೆ ಹೆಚ್ಚು ಒತ್ತು ಕೊಟ್ಟರೆ ಭವಿಷ್ಯದಲ್ಲಿ ಪ್ರಯೋಜನವಾಗುತ್ತದೆ. ಆದರೆ, ದುರಂತ ಎಂದರೆ, ನಮ್ಮಲ್ಲಿ ಎಷ್ಟೋ ಶಾಲೆಗಳಲ್ಲಿ ಕ್ರೀಡಾಂಗಣಗಳೇ ಇರುವುದಿಲ್ಲ. ಮಕ್ಕಳ ಅಂಕಗಳಿಕೆಗೆ ಒತ್ತು ನೀಡಿ, ಓದುವುದಕ್ಕೆ ಮಾತ್ರ ತೊಡಗಿಸಿ, ಅವರನ್ನು ಉದ್ಯೋಗ ಮಾರುಕಟ್ಟೆಗೆ ಸಜ್ಜಾಗಿಸುವ ಭರಾಟೆಯಲ್ಲಿ ಮಕ್ಕಳ ಕ್ರೀಡಾಸಕ್ತಿಗೆ ಸಾಕಷ್ಟು ಉತ್ತೇಜನ ನೀಡಲಾಗುತ್ತಿಲ್ಲ; ಇದಕ್ಕೆ ಎಲ್ಲೋ ಕೆಲವು ಅಪವಾದಗಳಿರಬಹುದು. ಸಣ್ಣ ವಯಸ್ಸಿನಲ್ಲೇ ಕ್ರೀಡಾಸಂಸ್ಕಾರ ರೂಢಿಸಿದಲ್ಲಿ ಮಕ್ಕಳ ದೈಹಿಕ-ಮಾನಸಿಕ ಬೆಳವಣಿಗೆಗೂ ಅನುಕೂಲವಾಗುತ್ತದೆ.
