ಈ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳನ್ನು ನಿಯಂತ್ರಿಸುವ ಸಲುವಾಗಿ ಮಾಹಿತಿ ತಂತ್ರಜ್ಞಾನ ಕಾಯ್ದೆಯನ್ನು ಜಾರಿಗೆ ತರಲಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ಷೇಪಾರ್ಹವಾದ, ಅನಗತ್ಯವಾದ ಸಂದೇಶ, ಅಭಿಪ್ರಾಯಗಳನ್ನು ಹಾಕುವುದಕ್ಕೆ, ಹಂಚಿಕೊಳ್ಳುವುದಕ್ಕೆ ನಿರ್ಬಂಧವನ್ನು ಈ ಕಾಯ್ದೆಯು ವಿಧಿಸುತ್ತದೆ. ಕಾನೂನುಬಾಹಿರ, ಹಾದಿ ತಪ್ಪಿಸುವ, ಗಲಭೆಗೆ ಪ್ರಚೋದಿಸುವ ಆಕ್ಷೇಪಾರ್ಹ ಸಂದೇಶಗಳನ್ನು ತೆಗೆದುಹಾಕಿ ಸೂಕ್ತ ಕ್ರಮ ಕೈಗೊಳ್ಳುವುದಕ್ಕಾಗಿ ಸಾಮಾಜಿಕ ಮಾಧ್ಯಮ ಕಂಪನಿಗಳಿಗೆ ನಿಯಮಾವಳಿಗಳನ್ನು ಕೂಡ ರೂಪಿಸಲಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಟವಾಗುವ ಮಾಹಿತಿ ಆಧರಿಸಿ ಬಾಧಿತರು ಮಾನನಷ್ಟ ಮೊಕದ್ದಮೆ ಹೂಡಲೂ ಅವಕಾಶ ಕಲ್ಪಿಸಲಾಗಿದೆ. ಆದರೆ, ಎಷ್ಟೇ ಕಾನೂನು ಜಾರಿಗೊಳಿಸಿದರೂ ನಿಯಮಾವಳಿಗಳನ್ನು ರೂಪಿಸಿದರೂ ಸರ್ಕಾರಿ ವ್ಯವಸ್ಥೆಯೊಂದರಿಂದಲೇ ಸಾಮಾಜಿಕ ಮಾಧ್ಯಮವನ್ನು ಸಂಪೂರ್ಣವಾಗಿ ನಿಯಂತ್ರಿಸುವುದು ಅಸಾಧ್ಯ. ಒಂದು ಲೆಕ್ಕದ ಪ್ರಕಾರ ಸಾಮಾಜಿಕ ಜಾಲತಾಣ ಬಳಸುವವರ ಸಂಖ್ಯೆಯು ಭಾರತದಲ್ಲಿ 70 ಕೋಟಿಗೂ ಅಧಿಕ. ಇಷ್ಟೊಂದು ಬಳಕೆದಾರರು ರವಾನಿಸುವ ಸಂದೇಶ, ವ್ಯಕ್ತಪಡಿಸುವ ಅಭಿಪ್ರಾಯಗಳ ಮೇಲೆ ಕಣ್ಗಾವಲಿಡುವಂತಹ ಸಮರ್ಥ ವ್ಯವಸ್ಥೆ ಕಷ್ಟಕರ. ಬಳಕೆದಾರರ ಸ್ವಯಂ ನಿಯಂತ್ರಣ ಕೂಡ ಇಲ್ಲಿ ಮುಖ್ಯ.
