ಕೃಷಿ ವಿಷಯವು ಸಭೆಯ ಪ್ರಮುಖ ಕಾರ್ಯಸೂಚಿಯಲ್ಲಿಯೂ ಇತ್ತು. ಕರೊನಾ ಸಂದರ್ಭದಲ್ಲಿ, ಭಾರತದ ಸಹಕಾರಿ ಒಕ್ಕೂಟ ವ್ಯವಸ್ಥೆಯು ವಿಶ್ವಕ್ಕೆ ಮಾದರಿಯಾಗಿ ಹೊರಹೊಮ್ಮಿತು ಎಂದು ಪ್ರಧಾನಿ ಹೇಳಿದ್ದು ಗಮನಾರ್ಹ. ಸಭೆಯಲ್ಲಿ ಭಾಗವಹಿಸಿದ್ದ ವಿವಿಧ ರಾಜ್ಯಗಳ ಮುಖ್ಯಮಂತ್ರಿಗಳು ತಂತಮ್ಮ ಅಭಿಪ್ರಾಯ ಮತ್ತು ಬೇಡಿಕೆಗಳನ್ನು ಮಂಡಿಸಿದರು. ತೆರಿಗೆಯಲ್ಲಿ ರಾಜ್ಯಗಳ ಪಾಲು ಹೆಚ್ಚಳ, ಕೇಂದ್ರ ಮತ್ತು ರಾಜ್ಯಗಳ ನಡುವೆ ಉದ್ಭವಿಸುವ ಭಿನ್ನಾಭಿ ಪಾಯಗಳನ್ನು, ತಕರಾರುಗಳನ್ನು ಬಗೆಹರಿಸುವ ಒಂಬುಡ್ಸ್ ಮನ್ ಆಗಿ ನೀತಿ ಆಯೋಗ ಕಾರ್ಯ ನಿರ್ವಹಿಸಬೇಕು ಮುಂತಾದ ಅನಿಸಿಕೆಗಳು ಸಿಎಂಗಳಿಂದ ವ್ಯಕ್ತವಾದವು. ಅಮೃತ ಯೋಜನೆ, ಅಟಲ್ ಇನೋವೇಷನ್ ಮಿಷನ್, ಡಿಜಿಟಲ್ ಇಂಡಿಯಾ ಮುಂತಾದ ಯೋಜನೆಗಳನ್ನು ನೀತಿ ಆಯೋಗವು ರೂಪಿಸಿದ್ದು ಉಲ್ಲೇಖನೀಯ. ಭಾರತವು ಒಕ್ಕೂಟ ವ್ಯವಸ್ಥೆಯನ್ನು ಹೊಂದಿದ್ದು, ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳೆರಡೂ ಸಂವಿಧಾನಾತ್ಮಕವಾಗಿಯೇ ತಮ್ಮದೇ ಆದ ಕಾರ್ಯವ್ಯಾಪ್ತಿ ಮತ್ತು ಹೊಣೆಗಾರಿಕೆಗಳನ್ನು ಹೊಂದಿವೆ.
