ಸರ್ಕಾರದ ಕೆಲಸಗಳು ಸುಗಮವಾಗಿ ನೆರವೇರಲು ಅಧಿಕಾರಶಾಹಿಯ ಉನ್ನತ ಹಂತದಿಂದ ಹಿಡಿದು ಕೆಳಹಂತದವರೆಗೂ ಅಗತ್ಯ ಪ್ರಮಾಣದಲ್ಲಿ ಅಧಿಕಾರಿ ಹಾಗೂ ಸಿಬ್ಬಂದಿಯ ಅಗತ್ಯ ಇರುತ್ತದೆ ಎಂಬುದನ್ನು ಹೊಸದಾಗಿ ಹೇಳಬೇಕಿಲ್ಲ. ಜನಸಾಮಾನ್ಯರಿಗೆ ಸರ್ಕಾರಿ ಸೇವೆಗಳು ಸುಲಭವಾಗಿ, ಸರಳವಾಗಿ, ಪಾರದರ್ಶಕವಾಗಿ ಸಿಗುವಂತಾಗಲು ಅಧಿಕಾರಶಾಹಿಯ ಪಾತ್ರ ಬಹುಮುಖ್ಯವಾದುದು. ಆದರೆ ಅಧಿಕ ವೇತನ ಇರುವ, ಉನ್ನತ ಹಂತದ ಹುದ್ದೆಗಳನ್ನು ವಿವೇಚನೆ ಇಲ್ಲದೆ ಸೃಷ್ಟಿಸಿ, ನಿಯಮದ ಅಂಕುಶ ಇಲ್ಲದೆಯೇ ಮುಂಬಡ್ತಿಯನ್ನೂ ಕೊಟ್ಟರೆ ಅದರಿಂದ ಸರ್ಕಾರದ ಬೊಕ್ಕಸದ ಮೇಲೆ ಅನಗತ್ಯ ಹೊರೆಬೀಳುತ್ತದೆಯಲ್ಲದೆ, ತೆರಿಗೆದಾರರ ಹಣವೂ ಪೋಲಾದಂತಾಗುತ್ತದೆ. ಸರ್ಕಾರದ ಇಲಾಖೆಗಳು ಹಾಗೂ ಯೋಜನೆಗಳಲ್ಲಿ ಮುಖ್ಯ ಇಂಜಿನಿಯರ್ ಮತ್ತು ಪ್ರಧಾನ ಇಂಜಿನಿಯರ್ ಹುದ್ದೆಗಳನ್ನು ಬೇಕಾಬಿಟ್ಟಿಯಾಗಿ ಸೃಷ್ಟಿಸಿ ಕಾನೂನುಬಾಹಿರವಾಗಿ ‘ಮುಂಬಡ್ತಿ’ ಕೊಟ್ಟಿರುವ ವಿಚಾರದ ಹಿನ್ನೆಲೆಯಲ್ಲಿ ಈ ಮಾತು ಹೇಳಬೇಕಾಗಿ ಬಂದಿದೆ.
