ಬಹುತೇಕವಾಗಿ ವರ್ಷದ ನಂತರ ಶಾಲಾಕಾಲೇಜುಗಳು ಕೆಲ ದಿನಗಳ ಹಿಂದೆ ಮರುಆರಂಭವಾಗಿದ್ದು, ಈಗ ಮತ್ತೆ ಕರೊನಾದ ಪ್ರಕರಣಗಳು ಏರಿಕೆ ಕಾಣುತ್ತಿರುವುದು ಸಹಜವಾಗಿಯೇ ಪಾಲಕರಲ್ಲಿ ಕಳವಳ ಮೂಡಿಸಿದೆ. ಅದರಲ್ಲೂ ರಾಜ್ಯದ ಕೆಲ ವಸತಿಶಾಲೆಗಳೂ ಸೇರಿದಂತೆ ಹಲವೆಡೆ ವಿದ್ಯಾರ್ಥಿಗಳಲ್ಲಿ ಸಹ ಕರೊನಾ ಪಾಸಿಟಿವ್ ಕಂಡುಬಂದಿದ್ದು ಆತಂಕವನ್ನು ಇನ್ನಷ್ಟು ಹೆಚ್ಚಿಸಿತ್ತು. ಶಿಕ್ಷಣ ಸಂಸ್ಥೆಗಳಲ್ಲಿ ಕರೊನಾ ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಂಡಿದ್ದರೂ, ಮಕ್ಕಳು ಅದನ್ನು ಎಷ್ಟರಮಟ್ಟಿಗೆ ಪಾಲನೆ ಮಾಡುತ್ತಾರೆ ಎಂಬ ಬಗ್ಗೆ ಅನುಮಾನಗಳು ಇದ್ದೇ ಇವೆ. ಈ ಸನ್ನಿವೇಶದಲ್ಲಿ ವ್ಯಾಕ್ಸಿನ್ ಬಂದಿದ್ದು ಕೆಲಮಟ್ಟಿಗೆ ನಿರಾಳತೆ ಮೂಡಿಸಿದೆ. ಕರೊನಾ ನಮ್ಮ ದೇಶದಲ್ಲಿ ಸಹ ದೊಡ್ಡ ಪ್ರಮಾಣದಲ್ಲಿ ಹಾವಳಿ ಎಬ್ಬಿಸಿದೆ ಎಂಬುದು ನಿಜ. ಆದರೆ ಈ ನಡುವೆಯೂ ವ್ಯಾಕ್ಸಿನ್ ವಿಚಾರದಲ್ಲಿ ಭಾರತ ಅನೇಕ ಹೆಗ್ಗಳಿಕೆಗಳನ್ನು ಸಹ ಹೊಂದಿರುವುದು ಗಮನಾರ್ಹ. ಕರೊನಾ ನಿಯಂತ್ರಣಕ್ಕೆ ಕಡಿಮೆ ಅವಧಿಯಲ್ಲಿ ಸ್ವದೇಶಿ ಲಸಿಕೆ ತಯಾರಿಸಿದ್ದು ಕಡಿಮೆ ಸಾಧನೆಯಲ್ಲ. ಕರೊನಾ ವ್ಯಾಕ್ಸಿನ್ ಪರಿಣಾಮಕಾರಿತ್ವದ ಬಗ್ಗೆ ವೈಜ್ಞಾನಿಕವಾಗಿ ಮತ್ತು ವೈದ್ಯಕೀಯವಾಗಿ ದೃಢಪಟ್ಟಿದ್ದರೂ, ಬಂದ ಶುರುವಿನಲ್ಲಿ ಜನ ಸ್ವಲ್ಪ ಹಿಂದೇಟು ಹಾಕಿದ್ದರು. ಕ್ರಮೇಣ ವಿಶ್ವಾಸ ಹೆಚ್ಚಿ, ವಿಶ್ವದಲ್ಲೇ ಬೃಹತ್ ಲಸಿಕಾಭಿಯಾನ ಎಂಬ ಹೆಗ್ಗಳಿಕೆಗೆ ಭಾರತ ಪಾತ್ರವಾಗುವಂತಾಯಿತು. ಕರೊನಾವನ್ನು ಕಟ್ಟಿಹಾಕಲು ಸದ್ಯಕ್ಕೆ ಲಸಿಕೆಯೇ ಪ್ರಧಾನ ಅಸ್ತ್ರ ಎಂಬ ಬಗ್ಗೆ ಬಹುತೇಕ ಎಲ್ಲ ತಜ್ಞರಲ್ಲಿ ಒಮ್ಮತವಿದೆ. ಹಾಗಂತ ಹೋರಾಟ ಇಲ್ಲಿಗೇ ಮುಗಿದಿಲ್ಲ.
