ಆಡಳಿತ ಸಾಮರ್ಥ್ಯ ವೃದ್ಧಿ, ಕಾರ್ಯವಿಧಾನಗಳ ಸರಳೀಕರಣ, ಪರಿಣಾಮಕಾರಿ ಕಾರ್ಯನಿರ್ವಹಣೆ ಉದ್ದೇಶದೊಂದಿಗೆ ಸಲ್ಲಿಸಲಾಗಿರುವ ಈ ಸಲಹೆಗಳನ್ನು ಸರ್ಕಾರವು ಆದ್ಯತೆಯನುಸಾರ ಜಾರಿಗೆ ತರಲು ಸೂಕ್ತ ಕ್ರಮಗಳನ್ನು ಕೈಗೊಳ್ಳುವುದು ಅಪೇಕ್ಷಣೀಯ. 23 ವರ್ಷಗಳ ಹಿಂದೆ 2000ರ ಏಪ್ರಿಲ್ನಲ್ಲಿ ಹಾರನಹಳ್ಳಿ ರಾಮಸ್ವಾಮಿ ಅಧ್ಯಕ್ಷತೆಯಲ್ಲಿ ರಾಜ್ಯದ ಮೊದಲ ಆಡಳಿತ ಸುಧಾರಣಾ ಆಯೋಗವನ್ನು ರಚಿಸಲಾಗಿತ್ತು. ಇದು 256 ಶಿಫಾರಸುಗಳುಳ್ಳ ವರದಿ ಸಲ್ಲಿಸಿತ್ತು. 2021ರ ಜನವರಿಯಲ್ಲಿ ರಚನೆಗೊಂಡಿರುವ ವಿಜಯಭಾಸ್ಕರ್ ನೇತೃತ್ವದ ಎರಡನೇ ಆಯೋಗವು ನೀಡಿರುವ ಮೊದಲ ವರದಿಯಲ್ಲಿ ಮನೆಬಾಗಿಲಿಗೇ ಪಡಿತರ ಒದಗಿಸಬೇಕು ಹಾಗೂ ಕಂದಾಯ ಇಲಾಖೆಯಲ್ಲಿ 800 ಇ ಸೇವೆಗಳಿಗೆ ಸೇವಾ ಸಿಂಧುವನ್ನು ಏಕಮಾತ್ರ ವೇದಿಕೆಯಾಗಿಸಬೇಕು ಎಂದು ಹೇಳಿದೆ. ಎರಡು ಮತ್ತು ಮೂರನೇ ವರದಿಗಳಲ್ಲಿ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್, ನಗರಾಭಿವೃದ್ಧಿ, ಇಂಧನ, ಸಮಾಜ ಕಲ್ಯಾಣ ಅಭಿವೃದ್ಧಿಗೆ ಸಂಬಂಧಿಸಿದ ಶಿಫಾರಸು ಮಾಡಿದೆ.
