ಈ ಬಾರಿ ಬಜೆಟ್ನಲ್ಲಿ ಕೃಷಿಗಾಗಿ ಮಹತ್ವದ ಘೋಷಣೆಗಳನ್ನೇನೋ ಮಾಡಲಾಗಿದೆ. ರೈತರ ಖಾತೆಗೆ ಕನಿಷ್ಠ ಬೆಂಬಲ ಬೆಲೆ, ಕಿಸಾನ್ ಡ್ರೋನ್ ವ್ಯವಸ್ಥೆ, ಕೃಷಿ ಸಂಬಂಧಿತ ನವೋದ್ಯಮಗಳಿಗೆ ಉತ್ತೇಜನ, ರೈತರಿಗೆ ನೀಡಲಾಗುವ ಸಾಲದ ಪ್ರಮಾಣ ಹೆಚ್ಚಳ ಹೀಗೆ ಹಲವು ಮಹತ್ವದ ಅಂಶಗಳಿವೆ. ಆದರೆ, ಕೃಷಿ ಉಪಕರಣಗಳ ಸಹಾಯಧನ ಕಡಿತಗೊಳಿಸಲಾಗಿದೆ. 2022ರಲ್ಲಿ ರೈತರ ಆದಾಯವನ್ನು ದ್ವಿಗುಣಗೊಳಿಸುವ ಗುರಿಯನ್ನು ಕೇಂದ್ರ ಇರಿಸಿಕೊಂಡಿದೆ. ಇದಕ್ಕೆ ಈಗ ಘೋಷಿಸಲಾಗಿರುವ ಕ್ರಮಗಳಷ್ಟೇ ಸಾಕೆ? ಅಥವಾ ಆದಾಯ ದ್ವಿಗುಣಕ್ಕೆ ಅನ್ಯಮಾರ್ಗಗಳನ್ನು ಅನುಸರಿಸಲಾಗುತ್ತದೆಯೇ ಎಂಬ ಬಗ್ಗೆ ಇನ್ನೂ ಸ್ಪಷ್ಟತೆ ಇಲ್ಲ. ರೈತರ ತೀವ್ರ ಪ್ರತಿಭಟನೆಯ ಪರಿಣಾಮ ಕೃಷಿ ಸುಧಾರಣೆಗೆ ಸಂಬಂಧಿಸಿದ ಮೂರು ಮಸೂದೆಗಳನ್ನು ಹಿಂಪಡೆದ ಕೇಂದ್ರ ಸರ್ಕಾರ, ರೈತರ ಆದಾಯ ದ್ವಿಗುಣ ಸೇರಿದಂತೆ ಕೃಷಿ ಕ್ಷೇತ್ರದಲ್ಲಿ ಇನ್ನಷ್ಟು ಸ್ವಾವಲಂಬನೆ ಹೇಗೆ ಕಂಡುಕೊಳ್ಳಲಿದೆ ಎಂಬುದು ಕುತೂಹಲಕರ. ಬಜೆಟ್ ಘೋಷಣೆಗಳ ಸರಿಯಾದ ಅನುಷ್ಠಾನವೂ ಅಗತ್ಯವಾಗಿದ್ದು, ಇದರ ಫಲಿತಾಂಶ ಮುಂಬರುವ ದಿನಗಳಲ್ಲಿ ಗೊತ್ತಾಗಬೇಕಿದೆಯಷ್ಟೇ. ಅದೇನಿದ್ದರೂ, ಭರವಸೆಯನ್ನು ಅನುಷ್ಠಾನದ ರೂಪದಲ್ಲಿ ತರುವ ಮಹತ್ತರ ಹೊಣೆಗಾರಿಕೆ ಸರ್ಕಾರದ ಮೇಲಿದೆ. ಕೃಷಿ ಉನ್ನತಿಯೇ ಆರ್ಥಿಕತೆಯ ಜೀವಾಳ ಎಂದು ಹೇಳಿರುವ ಸರ್ಕಾರ, ಮುಂದಿನ ದಿನಗಳಲ್ಲಿ ರೈತರಿಗೆ ಸುಧಾರಣೆಯ ಪಥವನ್ನು ದರ್ಶಿಸುವಂತಾಗಲಿ. ಆಧುನಿಕತೆ, ಮೂಲಸೌಕರ್ಯ, ತಂತ್ರಜ್ಞಾನದ ಬಲಗಳು ಕೃಷಿಗೆ ನವಚೈತನ್ಯ ತುಂಬುವಲ್ಲಿ ಯಶಸ್ವಿಯಾಗಬೇಕು. ಆಗಲೇ ರೈತರ ಬದುಕು ಹಸನಾಗಬಲ್ಲದು. ಈ ನಿಟ್ಟಿನಲ್ಲಿ ಸರ್ಕಾರ ಇಚ್ಛಾಶಕ್ತಿ ಪ್ರದರ್ಶಿಸಲಿ.
