ರಾಜ್ಯದಲ್ಲಿ ಕೂಡ 2016ರಲ್ಲಿಯೇ ಶೇ. 4ರಷ್ಟು ಮೀಸಲಾತಿಯನ್ನು ಈ ಸಮುದಾಯಕ್ಕೆ ನಿಗದಿಪಡಿಸಲಾಗಿದೆ. ನೇಮಕಾತಿ ಸಂದರ್ಭದಲ್ಲಿ ಆದ್ಯತೆ ನೀಡುವ ನಿಟ್ಟಿನಲ್ಲಿ ಅಂಗವಿಕಲರು ನಿರ್ವಹಿಸಬಹುದಾದ ಹುದ್ದೆಗಳನ್ನು ಗುರುತಿಸುವ ರೋಸ್ಟರ್ ಬಿಂದು ಕಾರ್ಯಕ್ಕೆ ಚಾಲನೆ ನೀಡಿದ್ದು, ಒಂದು ವರ್ಷದಲ್ಲಿ ಇದು ಪೂರ್ಣವಾಗಬಹುದಾಗಿದೆ ಎನ್ನಲಾಗಿದೆ. ರೋಸ್ಟರ್ ಬಿಂದು ಹುದ್ದೆಗಳನ್ನು ಗುರುತಿಸಲು ಇಷ್ಟೊಂದು ದೀರ್ಘ ಕಾಲ ತಗುಲಿದರೆ ಇನ್ನು ನೇಮಕಾತಿಗೆ ಎಷ್ಟು ಸಮಯ ತಗುಲಬಹುದು ಎಂಬ ಪ್ರಶ್ನೆ ಈ ಸಂದರ್ಭದಲ್ಲಿ ಉದ್ಭವಿಸುತ್ತಿದೆ. ಹೀಗಾಗಿ, ಹುದ್ದೆಗಳನ್ನು ಗುರುತಿಸುವ ಈ ಪ್ರಕ್ರಿಯೆಯನ್ನು ನಿರಂತರವಾಗಿಸಿದರೆ ವಯೋಮಿತಿ ಮೀರುವುದರ ಒಳಗಾಗಿ ಉದ್ಯೋಗಾಕಾಂಕ್ಷಿಗಳು ಉದ್ಯೋಗ ಪಡೆಯಲು ಅನುವಾಗುತ್ತದೆ. ಬಡತನ, ಅಪೌಷ್ಟಿಕತೆ, ವೈದ್ಯಕೀಯ ಸೌಲಭ್ಯಗಳ ಅಭಾವ, ಅಪಾಯಕಾರಿ ಕೆಲಸ, ಅಪಘಾತ ಮುಂತಾದವು ಅಂಗವೈಕಲ್ಯದ ಪ್ರಮುಖ ಕಾರಣಗಳಾಗಿದ್ದು, ಈ ಕುರಿತಂತೆ ಜನರಲ್ಲಿ ಜಾಗೃತಿ ಮೂಡಿಸಿದರೆ ವಿಕಲಾಂಗರ ಸಂಖ್ಯೆ ಇಳಿಮುಖವಾಗಬಹುದಾಗಿದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಸಾಕಷ್ಟು ಯೋಜನೆಗಳನ್ನು ಅಂಗವಿಕಲರಿಗಾಗಿ ರೂಪಿಸಿದ್ದು, ಇವುಗಳ ಬಗೆಗೆ ಸೂಕ್ತ ಪ್ರಚಾರ ಹಾಗೂ ಅನುಷ್ಠಾನದ ವ್ಯವಸ್ಥೆಗಳನ್ನು ರೂಪಿಸಿದರೆ ಹೆಚ್ಚು ಪ್ರಯೋಜನವಾಗಲು ಸಾಧ್ಯವಾಗುತ್ತದೆ.
