ದೇಶ ವಿಭಜನೆಯಾದಾಗಿನಿಂದಲೂ ಪಾಕಿಸ್ತಾನವು ಭಾರತದ ಮೇಲೆ ದ್ವೇಷ ಸಾಧಿಸುತ್ತಲೇ ಬಂದಿದೆ;ಈಗಲೂ ಅದು ಮುಂದುವರಿದಿದೆ. ಭಯೋತ್ಪಾದನೆಗೆ ಕುಮ್ಮಕ್ಕು ಮತ್ತು ನೆರವು, ಭಾರತದಲ್ಲಿ ಖೋಟಾನೋಟುಗಳ ಚಲಾವಣೆ, ಪಂಜಾಬಿನಲ್ಲಿ ಮಾದಕದ್ರವ್ಯಗಳ ಮೂಲಕ ಸಾಮಾಜಿಕ ಅಶಾಂತಿ ಸೃಷ್ಟಿಗೆ ಹುನ್ನಾರ- ಹೀಗೆ ಪಾಕಿಸ್ತಾನದ ಕುಬುದ್ಧಿಗೆ ಕೊನೆಯೇ ಇಲ್ಲ ಎಂಬಂತಾಗಿದೆ. ಅದರಲ್ಲೂ, ಭಯೋತ್ಪಾದಕರಿಗೆ ಸಹಕಾರ, ಪ್ರಚೋದನೆ ನೀಡುವ ಮೂಲಕ ಭಾರತದಲ್ಲಿ ನಡೆಸಿದ ಕುಕೃತ್ಯಗಳಿಗೆ ಲೆಕ್ಕವಿಲ್ಲ. ಇದರಿಂದಾಗಿ ಭಾರತದಲ್ಲಿ ಅಪಾರ ಸಾವುನೋವುಗಳು ಆದವಲ್ಲದೆ, ಅಗಾಧವಾದ ಆರ್ಥಿಕ ಹಾನಿಯೂ ಆಯಿತು. ಈಚಿನ ದಿನಗಳಲ್ಲಿ ಪಾಕ್ಪ್ರೇರಿತ ಭಯೋತ್ಪಾದನಾ ಕೃತ್ಯಗಳು ಸ್ವಲ್ಪ ತಗ್ಗಿವೆಯೆಂಬುದು ಸ್ವಲ್ಪ ಸಮಾಧಾನದ ಸಂಗತಿ. ಸರ್ಕಾರಗಳ ಕಠಿಣ ನೀತಿಗಳು, ಕಾಶ್ಮೀರ ಕಣಿವೆಯಲ್ಲಿ ಸೇನೆಯ ಕಟ್ಟುನಿಟ್ಟಿನ ಕ್ರಮಗಳು- ಮುಂತಾದವು ಇದಕ್ಕೆ ಕಾರಣ. ಹೀಗಿದ್ದರೂ, ಪಾಕ್ನ ಪರೋಕ್ಷಯುದ್ಧ ಮುಂದುವರಿದಿರುವುದು ಕಳವಳಕಾರಿ ಸಂಗತಿ.
