ಕರೊನಾ ಸೋಂಕಿನ ಹಾವಳಿ ಹಲವು ಸ್ಥಿತ್ಯಂತರಗಳನ್ನೂ, ಸಂಕಷ್ಟಗಳನ್ನೂ ತಂದೊಡ್ಡಿದ್ದು ಗೊತ್ತಿರುವಂಥದ್ದೇ. ಅದರಲ್ಲೂ, ಉದ್ಯಮ ರಂಗ ಹಲವು ಸವಾಲುಗಳನ್ನು ಎದುರಿಸಬೇಕಾಯಿತು ಅಲ್ಲದೆ, ಬೇರೆ ಬೇರೆ ರಂಗಗಳಲ್ಲಿ ಉದ್ಯೋಗ ನಷ್ಟದ ಪ್ರಮಾಣ ಆತಂಕ ಸೃಷ್ಟಿಸಿತು. ಇದೆಲ್ಲವೂ ಮತ್ತೆ ಸರಿ ಹೋಗಲು ಹಲವು ವರ್ಷಗಳೇ ಬೇಕಾಗಬಹುದು ಎಂದು ತಜ್ಞರು ಅಂದಾಜಿಸಿದ್ದರು. ಲಸಿಕೆ ಅಭಿಯಾನ ಯಶಸ್ವಿಯಾದ ಪರಿಣಾಮ ಕರೊನಾದ ಮೂರನೇ ಅಲೆ ಅಷ್ಟೊಂದು ಪರಿಣಾಮ ಬೀರಲಿಲ್ಲ. ಕಠಿಣ ನಿರ್ಬಂಧಗಳನ್ನು ಸಡಿಲಿಸಿದ್ದರಿಂದ ಕರ್ನಾಟಕ ಸೇರಿದಂತೆ ಇಡೀ ದೇಶದಲ್ಲಿ ಆರ್ಥಿಕ ಚಟುವಟಿಕೆಗಳು ವೇಗ ಪಡೆದವು. ಆದರೂ, ಹೂಡಿಕೆಯನ್ನು ಆಕರ್ಷಿಸುವ, ಉದ್ಯೋಗ ಸೃಷ್ಟಿಸುವ ದೊಡ್ಡ ಸವಾಲು ಇತ್ತು. ಇದಕ್ಕೆ ಪರಿಹಾರ ಒದಗಿಸಲು ರಾಜ್ಯ ಸರ್ಕಾರ ದೃಢ ಹೆಜ್ಜೆಗಳನ್ನು ಇರಿಸಿರುವುದು ಉತ್ತಮ ಬೆಳವಣಿಗೆ. ಚೀನಾದೊಂದಿಗಿನ ಗಡಿವಿವಾದ ಉಲ್ಬಣಗೊಂಡ ಬಳಿಕ, ಆ ದೇಶದಿಂದ ಆಮದು ಪ್ರಮಾಣವನ್ನು ಭಾರತ ಸಾಕಷ್ಟು ತಗ್ಗಿಸಿದೆ. ಇದು ತಾತ್ಕಾಲಿಕವಾಗಿ ಸಮಸ್ಯೆ ಎನಿಸಿದರೂ, ಹಲವು ಕ್ಷೇತ್ರಗಳಲ್ಲಿ ಸ್ವಾವಲಂಬನೆ ಸಾಧಿಸುವ ಅವಕಾಶವನ್ನೂ ಸೃಷ್ಟಿಸಿತು. ಇದೇ ಮಾದರಿಯ ಅವಕಾಶವನ್ನು ಬಳಸಿಕೊಂಡು ಕರ್ನಾಟಕವು ದೇಶದ ಮೊದಲ ಬೃಹತ್ ಸೆಮಿಕಂಡಕ್ಟರ್ ಘಟಕ ನಿರ್ವಣಕ್ಕೆ ಮುಂದಾಗಿದೆ. 22,900 ಕೋಟಿ ರೂಪಾಯಿ ಹೂಡಿಕೆಯ ಈ ಯೋಜನೆಯಿಂದ, ಮುಂಬರುವ ಏಳು ವರ್ಷದಲ್ಲಿ 1500 ಜನರಿಗೆ ಉದ್ಯೋಗ ಸೃಷ್ಟಿಯಾಗಲಿದೆ. ಭಾನುವಾರ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸಮ್ಮುಖದಲ್ಲಿ ಒಡಂಬಡಿಕೆ ಏರ್ಪಟ್ಟಿದೆ. ಮೈಸೂರಿನಲ್ಲಿ ಈ ಘಟಕ ಸ್ಥಾಪನೆಯಾಗುವ ಸಾಧ್ಯತೆ ಇದೆ.
