ಈಗಾಗಲೇ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾತೈಲದ ಬೆಲೆ ಬ್ಯಾರೆಲ್ಗೆ ನೂರು ಡಾಲರ್ ದಾಟಿದೆ. ಉತ್ತರಪ್ರದೇಶ ಸೇರಿ ಪಂಚರಾಜ್ಯಗಳ ಚುನಾವಣೆ ನಡೆಯುತ್ತಿರುವುದರಿಂದ ಸದ್ಯಕ್ಕೆ ಪೆಟ್ರೋಲ್, ಡೀಸೆಲ್ ಬೆಲೆ ಹೆಚ್ಚಳ ಮಾಡಿಲ್ಲ. ಆದರೆ, ಮಾರ್ಚ್ 10ರಂದು ಫಲಿತಾಂಶ ಪ್ರಕಟವಾಗಲಿದ್ದು, ಆ ಬಳಿಕ ದರಹೆಚ್ಚಳವಾಗುವ ಸಾಧ್ಯತೆಯನ್ನು ಮಾರುಕಟ್ಟೆ ತಜ್ಞರೇ ವ್ಯಕ್ತಪಡಿಸಿದ್ದಾರೆ. ಪೆಟ್ರೋಲ್, ಡೀಸೆಲ್ ದರ ಏರಿದರೆ ಅದರಿಂದ ಸರಕು ಸಾಗಣೆ ಸೇರಿ ಹಲವು ಕ್ಷೇತ್ರಗಳಿಗೆ ಸಮಸ್ಯೆ. ಜನರ ತಿಂಗಳ ಖರ್ಚು ಕೂಡ ಏರಿಕೆಯಾಗುತ್ತದೆ. ಮಂಗಳವಾರ ವಾಣಿಜ್ಯ ಬಳಕೆಯ ಸಿಲಿಂಡರ್ ಬೆಲೆ ಹೆಚ್ಚಳವಾಗಿದೆ. ದೆಹಲಿಯಲ್ಲಿ 105 ರೂ., ಕೊಲ್ಕತ್ತದಲ್ಲಿ 108 ರೂ. ದರ ಹೆಚ್ಚಳವಾಗಿದೆ. ಸ್ವಯಂಚಾಲಿತ ವ್ಯವಸ್ಥೆಗಳು ಮತ್ತು ಮೊಬೈಲ್ ಫೋನಿನಲ್ಲಿ ಬಳಸಲಾಗುವ ಪಲೇಡಿಯಂ ಲೋಹದ ಬೆಲೆ ಕೂಡ ಇತ್ತೀಚಿನ ವಾರಗಳಲ್ಲಿ ಹೆಚ್ಚಾಗಿದೆ. ಯುದ್ಧದ ಪರಿಣಾಮ ನಮ್ಮ ಅಡುಗೆಮನೆಗಳಲ್ಲೂ ನಡುಕ ಸೃಷ್ಟಿಯಾಗಲಿದೆ. ಕಾರಣ, ಸೂರ್ಯಕಾಂತಿ ಎಣ್ಣೆ, ಗೋಧಿ, ಇತರ ಕೆಲ ದವಸಧಾನ್ಯಗಳಿಗಾಗಿ ಭಾರತವು ರಷ್ಯಾ ಮತ್ತು ಯೂಕ್ರೇನ್ ಮೇಲೆ ಅವಲಂಬಿತವಾಗಿದೆ.
