2030ರ ವೇಳೆಗೆ 2 ಟ್ರಿಲಿಯನ್ ಡಾಲರ್ (ಅಂದರೆ, 2 ಲಕ್ಷ ಕೋಟಿ ಡಾಲರ್. ರೂಪಾಯಿಗಳಲ್ಲಿ ಹೇಳುವುದಾದರೆ 164 ಲಕ್ಷ ಕೋಟಿ) ರಫ್ತು ಗುರಿ ಇರುವ ವಿದೇಶ ವ್ಯಾಪಾರ ನೀತಿಯನ್ನು ಕೇಂದ್ರ ಸರ್ಕಾರ ಬಿಡುಗಡೆ ಮಾಡಿದ್ದು, ಇದೊಂದು ಬೃಹತ್ ಸವಾಲಿನ ಕಾರ್ಯಯೋಜನೆಯಾಗಿದೆ. ಮುಂದಿನ ಐದಾರು ವರ್ಷಗಳ ಅವಧಿಯಲ್ಲಿ ಈ ಗುರಿ ಈಡೇರಿದರೆ ಭಾರತ ಪ್ರಸ್ತುತ ಎದುರಿಸುತ್ತಿರುವ ವ್ಯಾಪಾರ ಕೊರತೆ ಸಂಪೂರ್ಣವಾಗಿ ಕಣ್ಮರೆಯಾಗಲಿದೆ. ಅಂದರೆ, ಆಮದು ಮತ್ತು ರಫ್ತು ನಡುವಿನ ಅಂತರ ಕಡಿಮೆಯಾಗುತ್ತದೆ. ಹೀಗಾದರೆ, ಭಾರತವು ಆರ್ಥಿಕವಾಗಿ ಬಹುದೊಡ್ಡ ಸಾಧನೆ ಹಾಗೂ ಪ್ರಗತಿಯನ್ನು ಕಾಣಲಿದೆ. ರಫ್ತು ಹೆಚ್ಚಳವಾದರೆ ದೇಶದಲ್ಲಿಯೇ ಉತ್ಪಾದನೆ ಹೆಚ್ಚಳ ಕಾಣುತ್ತದೆ. ಈ ಮೂಲಕ ಉದ್ಯೋಗಗಳು ಹೆಚ್ಚಿನ ಪ್ರಮಾಣದಲ್ಲಿ ಸೃಷ್ಟಿಯಾಗುತ್ತವೆ. ಆಮದು ಅವಲಂಬನೆ ಕಡಿಮೆಯಾಗಿ ವಿದೇಶಿ ವಿನಿಮಯ ಕೂಡ ಉಳಿತಾಯವಾಗುತ್ತದೆ. ಹೀಗೆ ಬಹುಆಯಾಮಗಳ ಆರ್ಥಿಕ ಏಳ್ಗೆಯ ಉದ್ದೇಶ ಇರುವ ನೀತಿ ಇದಾಗಿದೆ. ಈ ವರ್ಷ 20 ದೇಶಗಳ ಗುಂಪಿನ (ಜಿ 20) ಅಧ್ಯಕ್ಷತೆಯನ್ನು ಭಾರತ ವಹಿಸಿಕೊಂಡಿರುವ ಪ್ರಸ್ತುತ ಸಂದರ್ಭದಲ್ಲಿ ಕೇಂದ್ರ ಸರ್ಕಾರ ಇಂತಹ ಸವಾಲಿನ ಗುರಿಯನ್ನು ತನಗೆತಾನೇ ಹಾಕಿಕೊಂಡಿರುವುದು ವಿಶೇಷವಾಗಿದೆ.
