ಸೈನಿಕರಿಗೆ ಬೇಕಾಗುವ ಶಸ್ತ್ರಾಸ್ತ್ರಗಳನ್ನು ಶ್ರೀನಗರದಿಂದ ಒಂದೇ ಮಾರ್ಗದಲ್ಲಿ ಪೂರೈಸಲಾಗುತ್ತಿತ್ತು. ವಾಹನಗಳ ಬೆಂಗಾವಲು ಪಡೆಯಲ್ಲಿ ಮೆಟೀರಿಯಲ್ಸ್ ಪ್ರೊಟೆಕ್ಷನ್ ಡ್ಯೂಟಿಗೆ ನನ್ನನ್ನು ನಿಯೋಜಿಸಲಾಗಿತ್ತು. ಸಮುದ್ರ ಮಟ್ಟದಿಂದ 13,000 ಅಡಿ ಎತ್ತರದವರೆಗೆ ನಮ್ಮ ವಾಹನಗಳು ಹೋಗುತ್ತಿದ್ದವು. ಮೇಲೆ ಬೆಟ್ಟದಲ್ಲಿ ದುಷ್ಮನ್, ತಳಭಾಗದಲ್ಲಿ ನಾವು ಸಾಗುತ್ತಿದ್ದೆವು. ಪಾಕಿಸ್ತಾನ ಸೈನಿಕರನ್ನು ಸದೆಬಡಿಯಲು ನಮ್ಮ ಸೈನಿಕರು ರಾತ್ರಿ ತೆವಳುತ್ತ ಸಾಗುತ್ತಿದ್ದರು. ಅಂತಿಮವಾಗಿ ಭಾರತ 1999ರ ಜು.26ರಂದು ಪಾಕಿಸ್ತಾನ ಸೈನಿಕರನ್ನು ಹಿಮ್ಮೆಟ್ಟಿಸಿತು. ಯುದ್ಧ ಮುಗಿದ ನಂತರವೂ 3 ತಿಂಗಳು ನಾನು ಅಲ್ಲೇ ಕರ್ತವ್ಯದಲ್ಲಿದ್ದೆ. 2009ರಲ್ಲಿ ಬೆಳಗಾವಿಯಲ್ಲಿ ಜೂನಿಯರ್ ಕಮಾಂಡೋ ಟ್ರೇನಿಂಗ್ ಸೆಂಟರ್ನಲ್ಲಿ ಕೆಲಸ ಮಾಡುತ್ತಿದ್ದಾಗ ಜಂಗಲ್ ಟ್ರೇನಿಂಗ್ ಡೆಮೊ ವೇಳೆ ಸಣ್ಣ ಬಾಂಬ್ ಸಿಡಿದು ಬಲಗೈ ತೋರುಬೆರಳಿಗೆ ಗಾಯವಾಗಿತ್ತು. ಸೇನಾ ಸೇವೆ ನಂತರ ಪೊಲೀಸ್ ಇಲಾಖೆ ಸೇರಬೇಕೆಂಬ ಕನಸು, ಬೆರಳಿನ ಗಾಯದಿಂದಾಗಿ ಈಡೇರಲಿಲ್ಲ.
