ಒಂದು ಕೋಟಿ ರೂಪಾಯಿಗೂ ಹೆಚ್ಚು ಆದಾಯ ಗಳಿಸಿದ ನಕಲಿ ಮಾಸ್ಕ್ ತಯಾರಕರು ಸಿಸಿಬಿ ಬಲೆಗೆ!

ಬೆಂಗಳೂರು: ಕರೊನಾ ಹರಡದಂತೆ ತಡೆಯಲು ಲಾಕ್ ಡೌನ್ ಘೋಷಣೆಯಾಗಿ ಅನುಷ್ಠಾನಕ್ಕೆ ಬರುತ್ತಿದ್ದಂತೆ, ನಕಲಿ ಮಾಸ್ಕ್​, ಕಳಪೆ ಸ್ಯಾನಿಟೈಸರ್​ ಮುಂತಾದವುಗಳನ್ನು ಉತ್ಪಾದಿಸುವವರ ಸಂಖ್ಯೆಯೂ ಹೆಚ್ಚಾಗಿದೆ. ಇದೇ ರೀತಿ ನಕಲಿ ಮಾಸ್ಕ್​ ತಯಾರಿಸಿ 1 ಕೋಟಿ ರೂಪಾಯಿಗೂ ಅಧಿಕ ಹಣ ಸಂಪಾದಿಸಿದವರು ಈಗ ಪೊಲೀಸರ ಅತಿಥಿಗಳು!

ಖಚಿತ ಮಾಹಿತಿ ಆಧರಿಸಿ ಬೆಂಗಳೂರಿನ ಸಿಸಿಬಿ ಪೊಲೀಸರು ಸೋಮವಾರ ಕಲ್ಯಾಣ ನಗರದ ಎಚ್​ಆರ್​ಬಿಆರ್ ಲೇಔಟ್​ನಲ್ಲಿನ ಗೋಡೌನ್​ ಒಂದರಲ್ಲಿ ಶೇಖರಿಸಿ ಇರಿಸಲಾಗಿದ್ದ 12,300 ನಕಲಿ ಎನ್​-95 ಮಾಸ್ಕ್​​​ಗಳನ್ನು ವಶಪಡಿಸಿಕೊಂಡಿದ್ದಾರೆ. ಇದರ ಅಂದಾಜು ಮೌಲ್ಯ 20 ಲಕ್ಷ ರೂಪಾಯಿ. ಇದಕ್ಕೂ ಮೊದಲೇ ಆರೋಪಿಗಳು 70,000 ನಕಲಿ ಮಾಸ್ಕ್​ಗಳನ್ನು ಮಾರಾಟ ಮಾಡಿ ಅದರಿಂದ 1,05,00,000 ರೂಪಾಯಿ ಆದಾಯ ಗಳಿಸಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾರೆ.

ನಕಲಿ ಮಾಸ್ಕ್​ಗಳನ್ನೇ ನೈಜ ಮಾಸ್ಕ್​ಗಳೆಂದು ನಂಬಿಸುವ ಸಲುವಾಗಿ ಎನ್​-95 ಸೀಲ್​ಗಳನ್ನು ಆರೋಪಿಗಳು ಬಳಸಿದ್ದಾರೆ. ಈ ರೀತಿ ಸಾರ್ವಜನಿಕರಿಗೆ ಮೋಸ ಮಾಡಿ ವ್ಯಾಪಾರ ಮಾಡುತ್ತಿದ್ದರು. ಆರೋಪಿಗಳ ವಿರುದ್ಧ ಬಾಣಸವಾಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

https://www.vijayavani.net/lockdown-nanjangudu-town-sub-inspector-yasmin-taj-transferred/