ತಾಲೂಕಿನಲ್ಲಿ ಒಟ್ಟು 70 ಸಾವಿರ ಜಾನುವಾರುಗಳಿವೆ. ಸರ್ಕಾರಿ ದಾಖಲೆಗಳ ಪ್ರಕಾರ 14,580 ಹೆಕ್ಟೇರ್ ಗೋಮಾಳವಿದೆ. ಆದರೆ ಪ್ರತಿ ವರ್ಷವೂ ಒತ್ತುವರಿ, ಅತಿಕ್ರಮಣ ಮುಂತಾದ ಕಾರಣಗಳಿಂದ ಗೋಮಾಳದ ವಿಸ್ತೀರ್ಣ ಕಡಿಮೆಯಾಗುತ್ತಿದ್ದು, ಜಾನುವಾರುಗಳಿಗೆ ಮೇವಿನ ಕೊರತೆಯಾಗುತ್ತಿದೆ. ಜು.1ರಿಂದ ಸೆ.21ರವರೆಗೆ ತಾಲೂಕಿಗೆ 56 ಮಿಮೀ ವಾಡಿಕೆ ಮಳೆಯಾಗಬೇಕಿತ್ತು. ಆದರೆ 34 ಮಿಮೀ ಮಳೆ ಬಿದ್ದಿದೆ. ಮುಂಗಾರಿನಲ್ಲಿ ಬಿತ್ತನೆ ಮಾಡಿದ್ದ ಸೂರ್ಯಕಾಂತಿ, ಜೋಳ, ಮುಸುಕಿನ ಜೋಳ, ನೆಲಗಡಲೆ, ಹತ್ತಿ ಮುಂತಾದ ಬಹುತೇಕ ಬೆಳೆಗಳು ನಾಶವಾಗಿವೆ. ಸಕಾಲದಲ್ಲಿ ಮಳೆ ಬೀಳದೆ ರಾಗಿ ಹಾಗೂ ಹುರುಳಿಯನ್ನು ಬಿತ್ತನೆ ಮಾಡಲು ಸಾಧ್ಯವಾಗಿಲ್ಲ. ಇದರಿಂದ ಜಾನುವಾರುಗಳಿಗೆ ಪ್ರಮುಖ ಆಹಾರದ ಮೂಲವಾಗಿರುವ ಜೋಳ, ಮುಸುಕಿನಜೋಳ, ನೆಲಗಡಲೆ, ರಾಗಿ, ಹುರುಳಿ ಬೆಳೆಗಳೇ ನಾಶವಾಗಿರುವುದು ಮೇವಿನ ಅಭಾವ ಹೆಚ್ಚಿಸಿದೆ.
