ಬೆಂಗಳೂರು: ‘ಎಲ್ಲರನ್ನು ಎಲ್ಲರ ವಿಕಾಸ, ವಿಶ್ವಾಸ’ದೊಂದಿಗೆ ಸದೃಢ ಭಾರತ ನಿರ್ವಿುಸಬೇಕೆಂಬ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ಆಶಯಕ್ಕೆ ವಿರುದ್ಧದ ನಡೆ ಬೇಡವೆಂದು ರಾಜ್ಯ ಬಿಜೆಪಿ ನಾಯಕರಿಗೆ ವರಿಷ್ಠರು ಖಡಕ್ ಎಚ್ಚರಿಕೆ ಸೂಚನೆ ರವಾನಿಸಿದ್ದಾರೆ. ಪಕ್ಷದಿಂದ ಅಮಾನತುಗೊಂಡ ವಕ್ತಾರೆ ನೂಪುರ್ ಶರ್ಮಾ ಹೇಳಿಕೆಯಿಂದ ಉಂಟಾಗಿರುವ ‘ಹಾನಿ ಪರಿಹಾರ’ಕ್ಕೆ ದೆಹಲಿ ಹಿರಿಯ ನಾಯಕರು ಮುಂದಾಗಿದ್ದು, ಪಕ್ಷ ಆಡಳಿತವಿರುವ ರಾಜ್ಯಗಳಿಗೆ ಹೆಚ್ಚು ಗಮನ ಕೇಂದ್ರೀಕರಿಸಿದೆ. ಯಾವುದೇ ಧರ್ಮ, ಧಾರ್ವಿುಕ ನಾಯಕರು ಹಾಗೂ ಸಂಕೇತಗಳ ಬಗ್ಗೆ ಅನುಚಿತ, ಅತಿರೇಕದ ಹೇಳಿಕೆಗಳನ್ನು ನೀಡಬಾರದು. ಯಾವುದೇ ವ್ಯಕ್ತಿ ಅಥವಾ ಸಂಘಟನೆಗಳ ಪ್ರಚೋದನಾತ್ಮಕ ಹೇಳಿಕೆಗಳಿಗೆ ಸ್ಪಂದನೆ, ಸಮರ್ಥನೆಯನ್ನೂ ನೀಡಕೂಡದು ಎನ್ನುವ ಸೂಚನೆ ನೀಡಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ. ಸಚಿವ-ಸಂಸದ, ಶಾಸಕರು ಹಾಗೂ ವಿಶೇಷವಾಗಿ ಬಿಜೆಪಿ ಮಾಧ್ಯಮ ವಿಭಾಗಕ್ಕೆ ಎಚ್ಚರಿಕೆಯಿಂದ ಹೇಳಿಕೆಗಳನ್ನು ನೀಡಬೇಕು. ಅತ್ಯುತ್ಸಾಹ, ಏನೋ ಪ್ರತಿಪಾದಿಸುವ ಭರದಲ್ಲಿ ಆಡುವ ಮಾತುಗಳು ಬೇರೆ ತಿರುವು ಪಡೆಯುವುದಕ್ಕೆ ಅವಕಾಶ ನೀಡಬೇಕು. ಮಾಧ್ಯಮ ವಿಭಾಗಕ್ಕೆ ಸೂಕ್ತ ಕಾರ್ಯಾಗಾರ ಏರ್ಪಡಿಸಿ ನುರಿತರಿಂದ ತರಬೇತಿ ನೀಡುವ ವ್ಯವಸ್ಥೆ ಮಾಡಬೇಕು ಎಂಬ ಪಕ್ಷದ ರಾಜ್ಯ ಸಮಿತಿಗೆ ವರಿಷ್ಠರು ಸೂಚಿಸಿದ್ದಾರೆನ್ನಲಾಗಿದೆ.
