ಕರೊನಾ ವಿರುದ್ಧ ಹೋರಾಟಕ್ಕೆ ಹಣ ನೀಡಲು ರಾಯಚೂರು ಪೊಲೀಸರ ನಕಾರ; ನಮ್ಮ ಒಂದು ದಿನದ ವೇತನ ಕಟ್​ ಮಾಡ್ಬೇಡಿ ಎಂದು ಪತ್ರ

ರಾಯಚೂರು: ಕರೊನಾ ವೈರಸ್​ ವಿರುದ್ಧ ಹೋರಾಟಕ್ಕೆ ಹೆಚ್ಚಿನ ಹಣ ಅಗತ್ಯ ಇರುವುದರಿಂದ ರಾಜ್ಯದಲ್ಲಿ ಮುಖ್ಯಮಂತ್ರಿ ಪರಿಹಾರ ನಿಧಿಗೆ ಅನೇಕರು ದೇಣಿಗೆ ನೀಡುತ್ತಿದ್ದಾರೆ.

ಈ ಮಧ್ಯೆ ರಾಯಚೂರು ಪೊಲೀಸರು ತಾವು ಒಂದು ದಿನ ಸಂಬಳ ನೀಡುವುದಿಲ್ಲ ಎಂದು ಎಸ್​ಪಿಗೆ ಪತ್ರ ಬರೆದಿದ್ದಾರೆ.

ಮಾರ್ಚ್​ ತಿಂಗಳ ಒಂದು ದಿನದ ಸಂಬಳವನ್ನು ಮುಖ್ಯಮಂತ್ರಿ ಪರಿಹಾರ ನಿಧಿಗೆ ನೀಡಿ ಎಂದು ರಾಜ್ಯ ಸರ್ಕಾರ ಪೊಲೀಸರ ಬಳಿ ಮನವಿ ಮಾಡಿತ್ತು. ಆದರೆ ರಾಯಚೂರು ಜಿಲ್ಲೆಯ ವಿವಿಧ ಠಾಣೆಗಳ ಪೊಲೀಸರು ಇದನ್ನು ನಿರಾಕರಿಸಿದ್ದಾರೆ. ನಾವು ಹಣ ನೀಡುವುದಿಲ್ಲ ಎಂದಿದ್ದಾರೆ.

ಕೊವಿಡ್​ -19 ನಿಯಂತ್ರಣಕ್ಕೆ ಲಾಕ್​ಡೌನ್​ ಹೇರಲಾಗಿದ್ದು, ಈ ಪರಿಸ್ಥಿತಿಯನ್ನು ಹಗಲಿರುಳು ಶ್ರಮವಹಿಸಿ ನಿಭಾಯಿಸುತ್ತಿದ್ದೇವೆ. ರಜೆಯೂ ಸಿಗುತ್ತಿಲ್ಲ. ರಾಘವೇಂದ್ರ ಔರಾದ್ಕರ್​ ವರದಿ ಜಾರಿಗೆ ಯಾರೂ ಸಹಾಯ ಮಾಡಲಿಲ್ಲ. ತೆಲಂಗಾಣ ಸರ್ಕಾರ ಪೊಲೀಸರಿಗೆ ಪ್ರೋತ್ಸಾಹ ಧನ ನೀಡಲು ಮುಂದಾಗಿದೆ. ನಾವೂ ಕಷ್ಟಕರ ಪರಿಸ್ಥಿತಿಯಲ್ಲಿ ಕೆಲಸ ಮಾಡುತ್ತಿದ್ದೇವೆ. ಲಾಕ್​ಡೌನ್​ ಹಿನ್ನೆಲೆಯಲ್ಲಿ ಮನೆಯಲ್ಲೇ ಕುಳಿತಿರುವ ಅಧಿಕಾರಿಗಳ ವೇತನವನ್ನು ಬೇಕಾದರೆ ಕಡಿತಗೊಳಿಸಿ, ನಮ್ಮದು ಏಕೆ ಎಂದು ಪ್ರಶ್ನಿಸಿದ್ದಾರಂತೆ.