ಯಾವುದೇ ಪಕ್ಷದ ರಾಜಕೀಯ ನಾಯಕರು ಇಂಥ ಮಾತುಗಳನ್ನಾಡಬಾರದು. ನಾಯಕರ ವಿವಾದಾತ್ಮಕ ಮಾತುಗಳೇ ಕಾರ್ಯಕರ್ತರಿಗೆ ಮಾದರಿಯಾಗುತ್ತವೆ. ರಾಹುಲ್ ಗಾಂಧಿ ಹೇಳಿಕೆ ವಿವಾದದ ಕಿಡಿಯನ್ನು ಹೊತ್ತಿಸಿದ್ದು, ಇದೇ ಘಟನೆಗೆ ಸಂಬಂಧಿಸಿ ಗುರುವಾರ ಪಟನಾದಲ್ಲಿ ಕಾಂಗ್ರೆಸ್-ಬಿಜೆಪಿ ಕಾರ್ಯಕರ್ತರ ನಡುವೆ ಘರ್ಷಣೆ ಸಂಭವಿಸಿದೆ. ಕೆಲವರಿಗೆ ಗಾಯಗಳಾಗಿವೆ. 2024ರ ಲೋಕಸಭಾ ಚುನಾವಣೆ ಪ್ರಚಾರದ ವೇಳೆಯಲ್ಲೂ ಇಂಥ ಅವಿವೇಕದ ಹೇಳಿಕೆಗಳು ಆರ್ಭಟಿಸಿದ್ದವು. ಚುನಾವಣಾ ಆಯೋಗ ಕೆಲ ನಾಯಕರಿಗೆ ಹಲವು ದಿನಗಳ ಕಾಲ ಪ್ರಚಾರ ಮಾಡದಂತೆ ನಿಷೇಧ ಹೇರಿತ್ತು. ಆದರೂ, ಜನನಾಯಕರು ಪಾಠ ಕಲಿತಿಲ್ಲ ಎಂಬುದು ಸ್ಪಷ್ಟ. ಪ್ರಧಾನಿ ಮೋದಿಯವರನ್ನು ಸಾವಿನ ದಲ್ಲಾಳಿ, ವಿಷಸರ್ಪ, ನೀಚ ಎಂದೆಲ್ಲ ಟೀಕಿಸಿದ್ದನ್ನು ಪ್ರಜ್ಞಾವಂತ ನಾಗರಿಕ ಸಮಾಜ ಖಂಡಿಸಿತು.
