ಮೊಟೆರಾ ಕ್ರೀಡಾಂಗಣದಿಂದ ಹೊರಟ ಟ್ರಂಪ್​ ದಂಪತಿ; ಕೆಲವೇ ಕ್ಷಣಗಳಲ್ಲಿ ತಾಜ್​ಮಹಲ್​ಗೆ ಭೇಟಿ

ಆಗ್ರಾ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಅವರ ಭಾಷಣ ಮುಗಿಯುತ್ತಿದ್ದಂತೆ ಮತ್ತೊಮ್ಮೆ ಪ್ರಧಾನಿ ನರೇಂದ್ರ ಮೋದಿಯವರು ಜನರನ್ನು ಉದ್ದೇಶಿಸಿ ಮಾತನಾಡಿದರು. ಟ್ರಂಪ್​ಗೆ ಕೃತಜ್ಞತೆ ಸಲ್ಲಿಸಿದರು.

ನಮಸ್ತೆ ಟ್ರಂಪ್​ಗಾಗಿ ಕ್ರೀಡಾಂಗಣವನ್ನು ಒದಗಿಸಿಕೊಟ್ಟ ಗುಜರಾತ್​ ಕ್ರಿಕೆಟ್​ ಅಸೋಸಿಯೇಶನ್​ಗೂ ಮೋದಿ ಧನ್ಯವಾದ ತಿಳಿಸಿದರು.

ಈ ದೇಶದ 130 ಕೋಟಿ ಜನರು ನವಭಾರತ ನಿರ್ಮಾಣ ಮಾಡಿದ್ದಾರೆ. ನಮ್ಮ ದೇಶದಲ್ಲಿ ಜಗತ್ತಿನಲ್ಲಿಯೇ ಅತಿದೊಡ್ಡ ಕ್ರಿಡಾಂಗಣ ಮಾತ್ರವಲ್ಲ, ಆರೋಗ್ಯ ವಿಮಾ ಯೋಜನೆ ಕೂಡ ಇದೆ ಎಂದು ಮೋದಿ ಹೇಳಿದರು.

ಅದಾದ ಬಳಿಕ ಪ್ರಧಾನಿ ನರೇಂದ್ರ ಮೋದಿ ಮತ್ತು ಟ್ರಂಪ್​ ದಂಪತಿ ಮೊಟೆರಾ ಸ್ಟೇಡಿಯಂನಿಂದ ಹೊರಟರು. ಅವರು ಉತ್ತರಪ್ರದೇಶದ ಆಗ್ರಾಕ್ಕೆ ವಿಮಾನದ ಮೂಲಕ ತೆರಳಲಿದ್ದು, ತಾಜ್​ಮಹಲ್​ಗೆ ಭೇಟಿ ನೀಡಲಿದ್ದಾರೆ.(ಏಜೆನ್ಸೀಸ್​)