ನಕಲಿ ವೆಬ್ಸೈಟ್ಗಳ ಜಾಲಕ್ಕೆ ಬಿದ್ದು ಅನೇಕ ಮಂದಿ ಲಕ್ಷಗಟ್ಟಲೆ ಹಣ ನಷ್ಟ ಮಾಡಿಕೊಂಡಿದ್ದಾರೆ. ಕೆಲ ದಿನಗಳ ಹಿಂದೆ ಕೇರಳದ ಒಟ್ಟಪಾಲಂನಲ್ಲಿ ನಿವೃತ್ತ ಸರ್ಕಾರಿ ಅಧಿಕಾರಿಯೊಬ್ಬರಿಗೆ 8.35 ಲಕ್ಷ ರೂ. ವಂಚನೆ ಮಾಡಿದ್ದಾರೆ. ಸೂಕ್ತ ವಧುವಿಗಾಗಿ ಮಗನ ವಿವರಗಳನ್ನು ಮ್ಯಾಟ್ರಿಮೋನಿಯಲ್ ವೆಬ್ಸೈಟ್ನಲ್ಲಿ ಅಪ್ಡೇಟ್ ಮಾಡಲಾಗಿತ್ತು. ಅಲ್ಲಿಗೆ ನುಸುಳಿದ ವಂಚಕರು, ಪ್ರೊಫೈಲ್ನಲ್ಲಿ ನೀಡಿದ್ದ ಮೊಬೈಲ್ ಫೋನ್ ನಂಬರ್ ಅನ್ನು ಪಡೆದು ನಿವೃತ್ತ ಅಧಿಕಾರಿನ್ನು ಸಂಪರ್ಕಿಸಿದ್ದಾರೆ. ಬಳಿಕ ಟ್ರೇಡಿಂಗ್ ಆ್ಯಪ್ನಲ್ಲಿ ಹಣ ತೊಡಗಿಸಿದರೆ ಉತ್ತಮ ಲಾಭ ಸಿಗುತ್ತದೆ ಎಂದು ನಂಬಿಸಿದ್ದಾರೆ. ಅಲ್ಲದೆ, ತಮ್ಮ ಬ್ಯಾಂಕ್ ಖಾತೆಗೆ ಮೊದಲು 40 ಸಾವಿರ ರೂ. ಜಮಾ ಮಾಡಿಸಿಕೊಂಡಿದ್ದು, ಅದೇ ದಿನ ಲಾಭಾಂಶವಾಗಿ 6000 ರೂ.ಗಳನ್ನು ನಿವೃತ್ತ ಅಧಿಕಾರಿ ಖಾತೆಗೆ ಮತ್ತೆ ಜಮಾ ಮಾಡುವ ಮೂಲಕ ವಿಶ್ವಾಸ ಗಳಿಸಿದ್ದಾರೆ. ಇದಾದ ಬಳಿಕ ಉಳಿದ ಮೊತ್ತವನ್ನು ವಂಚಕರು ಸೂಚಿಸಿದ ಬ್ಯಾಂಕ್ ಖಾತೆಗಳಿಗ ವಿವಿಧ ಹಂತಗಳಲ್ಲಿ ನಿವೃತ್ತಿ ಅಧಿಕಾರಿ ಜಮಾ ಮಾಡಿದ್ದಾರೆ. ಆದರೆ, ನಂತರದ ದಿನಗಳಲ್ಲಿ ತನ್ನ ಬಂಡವಾಳ ಮತ್ತು ಲಾಭ ಸಿಗದ ಹಿನ್ನೆಲೆಯಲ್ಲಿ ರಾಷ್ಟ್ರೀಯ ಸೈಬರ್ ಕ್ರೈಂ ರಿಪೋರ್ಟಿಂಗ್ ಪೋರ್ಟಲ್ನಲ್ಲಿ ನಿವೃತ್ತ ಅಧಿಕಾರಿ ದೂರು ದಾಖಲಿಸಿದ್ದರು. ಜಿಲ್ಲಾ ಪೊಲೀಸ್ ಮುಖ್ಯಸ್ಥರ ಮೂಲಕ ಒಟ್ಟಪಾಲಂ ಪೊಲೀಸರಿಗೆ ದೂರನ್ನು ರವಾನಿಸಿದ ನಂತರ, ಎಫ್ಐಆರ್ ದಾಖಲಿಸಿ ತನಿಖೆ ಆರಂಭಿಸಲಾಗಿದೆ. ಉತ್ತರ ಪ್ರದೇಶದ ಆಗ್ರಾ ಮತ್ತು ನೋಯ್ಡಾದ ಬ್ಯಾಂಕ್ ಖಾತೆಗಳಿಗೆ ಆ ಹಣ ಜಮಾಯಾಗಿರುವುದನ್ನು ಪೊಲೀಸರು ಪತ್ತೆ ಮಾಡಿದ್ದಾರೆ. ಹೀಗಾಗಿ ಆನ್ಲೈನ್ನಲ್ಲಿ ವ್ಯವಹರಿಸುವ ಮುನ್ನ ತುಂಬಾ ಹುಷಾರಾಗಿರಿ ಎಂದು ಪೋಲಿಸರು ಎಚ್ಚರಿಕೆ ನೀಡಿದ್ದಾರೆ. (ಏಜೆನ್ಸೀಸ್)
