ಮುಖ್ಯಮಂತ್ರಿಯಾಗಿ ಬಸವರಾಜ ಬೊಮ್ಮಾಯಿ 6 ತಿಂಗಳು ಪೂರೈಸುತ್ತಿರುವ ಹೊತ್ತಿನಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವರನ್ನು ನೇಮಿಸಿದ್ದಾರೆ. ಅನುಸರಿಸಿದ ಮಾನದಂಡ ಗಮನಿಸಿದರೆ ಎಲ್ಲವೂ ವರಿಷ್ಠರ ಆಣತಿಯಂತೆ ನಡೆದಿರುವುದು ಮೇಲ್ನೋಟಕ್ಕೆ ಎದ್ದುಕಾಣುತ್ತಿದೆ. ಆದರೆ ಕರ್ನಾಟಕದ ರಾಜಕೀಯ ನಕ್ಷೆ, ನೆಲೆ ವಿಶಿಷ್ಟವಾಗಿದೆ. ಉತ್ತರದ ಪ್ರಯೋಗಗಳನ್ನು ರಾಜ್ಯದ ಮೇಲೆ ಹೇರಿದರೆ ನಿರೀಕ್ಷಿತ ಫಲ ಕೊಡದು ಎನ್ನುವುದು ಡಿಸಿಎಂ ಹುದ್ದೆಗಳ ಸೃಜನೆಯಿಂದಲೇ ವೇದ್ಯವಾಗಿದೆ. ಆದರೂ ಸ್ವಂತ ಜಿಲ್ಲೆ ಬಿಟ್ಟು, ಬೇರೆ ಜಿಲ್ಲೆಗಳಿಗೆ ಉಸ್ತುವಾರಿ ನೇಮಕದಲ್ಲಿ ಯಾವ ಕಾರ್ಯತಂತ್ರ, ನೀತಿ ಅಡಗಿದೆಯೋ ತಿಳಿಯದು. ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ, ಜಿಲ್ಲಾ, ತಾ.ಪಂ. ಚುನಾವಣೆ ತಲೆ ಮೇಲಿಟ್ಟುಕೊಂಡು ಈ ಕಸರತ್ತಿಗೆ ಕೈಹಾಕಿರುವುದು ಮೂಲಗಳು ಅಚ್ಚರಿ ವ್ಯಕ್ತಪಡಿಸಿವೆ. ಉಸ್ತುವಾರಿಗಳ ಬದಲಾವಣೆ ಸಹಜ, ಯಾರಿಗೂ ಕೂಡ ಪಾರಮ್ಯ ಮೆರೆಯುವುದಕ್ಕೆ ಅವಕಾಶ ಇಲ್ಲ ಎನ್ನುವುದು ನೇಮಕದ ಹಿಂದಿರುವ ಸಂದೇಶವಾಗಿದೆ. ವಿಧಾನ ಪರಿಷತ್, ನಗರ-ಪಟ್ಟಣ ಸ್ಥಳೀಯ ಸಂಸ್ಥೆಗಳ ಚುನಾವಣೆ ಹಿನ್ನಡೆ ಅರಿತೂ ಇಂತಹ ಪ್ರಯೋಗಕ್ಕೆ ಕೈಹಾಕಿರುವುದು ಬೇಸರಕ್ಕೆ ಕಾರಣವಾಗಿದೆ.
