ಲಾಕ್ಡೌನ್ನಿಂದ ರಾಜಕೀಯ ಚಟುವಟಿಕೆಗೆ ಬ್ರೇಕ್ ಬಿದ್ದಿದ್ದು, ಸದ್ಯಕ್ಕೆ ರ್ಯಾಲಿ, ಸಮಾವೇಶ, ದೊಡ್ಡ ಮಟ್ಟದ ಸಭೆ ನಡೆಸುವಂತಿಲ್ಲ. ಒಂದು ವೇಳೆ ನಡೆಸಿದರೂ ಕಾರ್ಯಕರ್ತರು, ಜನರು ಸೇರುತ್ತಾರೆಂಬ ನಂಬಿಕೆ ನಾಯಕರಿಗಿಲ್ಲ. ಈ ಕಾರಣಕ್ಕೆ ಡಿಜಿಟಲ್ ವೇದಿಕೆ ಬಳಸಿಕೊಂಡು ಅಸ್ತಿತ್ವ ಉಳಿಸಿಕೊಳ್ಳುವ ಪ್ರಯತ್ನ ಆರಂಭಿಸಿದ್ದಾರೆ. ಅನುಯಾಯಿಗಳ ಸಂಖ್ಯೆ ಹೆಚ್ಚಿಸಿ ಕೊಳ್ಳುವುದು, ತಾವು ಮಾಡಿದ ಜನಪರ ಕೆಲಸಗಳನ್ನು ಜನರಿಗೆ ತಿಳಿಸುವುದು, ಸಂದೇಶ-ಅಭಿಪ್ರಾಯಗಳನ್ನು ಮತದಾರರಿಗೆ ಕಾಲಕಾಲಕ್ಕೆ ಮುಟ್ಟಿಸುವುದು ಇದರ ಉದ್ದೇಶ. ಲಾಕ್ಡೌನ್ ಜಾರಿ ಬಳಿಕ ಮೂರೂ ಪಕ್ಷಗಳು ವಿಡಿಯೋ ಸಂವಾದ ಅಥವಾ ಡಿಜಿಟಲ್ ಮಾಧ್ಯಮ ಬಳಕೆ ಹೆಚ್ಚಿಸಿವೆ. ಮಾಜಿ ಸಿಎಂ ಎಚ್.ಡಿ. ಕುಮಾರಸ್ವಾಮಿ ಪಕ್ಷದ ಶಾಸಕರು, ಮುಖಂಡ ರೊಂದಿಗೆ ವಿಡಿಯೋ ಸಂವಾದ ನಡೆಸಿ ಕರೊನಾ ನಿರ್ವಹಣೆ ಬಗ್ಗೆ ವಿಚಾರಿಸಿದ್ದಾರೆ. ಡಿ.ಕೆ.ಶಿವಕುಮಾರ್ ಕೆಪಿಸಿಸಿ ಅಧ್ಯಕ್ಷರಾದ ಬಳಿಕ ವಿಡಿಯೋ ಸಂವಾದ ಹೆಚ್ಚೆಚ್ಚು ನಡೆಸುತ್ತಿದ್ದಾರೆ. ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರು ವಿಡಿಯೋ ಸಂವಾದದ ಮೂಲಕ ಸಮಾಜದ ಗಣ್ಯರು, ಮಠಾಧೀಶರು, ಬುದ್ಧಿಜೀವಿಗಳ ಜತೆಗೆ ಮಾತನಾಡಿದ್ದರು, ಅದೇ ಮಾದರಿಯಲ್ಲಿ ರಾಜ್ಯಾಧ್ಯಕ್ಷರೂ ಡಿಜಿಟಲ್ ಸಭೆ ನಡೆಸಿದ್ದಾರೆ.
