ಅರಸು ದಿಟ್ಟ ನಿರ್ಧಾರ ನೆನೆದು ಮಾಜಿ ಸ್ಪೀಕರ್ ಭಾವುಕ !

ಬೆಂಗಳೂರು: ಡಿ.ದೇವರಾಜ ಅರಸು ಆಡಳಿತದಲ್ಲಿ ಅನೇಕ ಐತಿಹಾಸಿಕ ನಿರ್ಧಾರಗಳಾಗಿವೆ. ಭೂಸುಧಾರಣಾ ಕಾಯ್ದೆಗೆ ತಿದ್ದುಪಡಿಯ ಮೂಲಕ ಗೇಣಿದಾರರಿಗೆ ಹೊಸ ಬದುಕು ಕಟ್ಟಿಕೊಟ್ಟರು ಎಂದು ಮಾಜಿ ಸ್ಪೀಕರ್ ಕಾಗೋಡು ತಿಮ್ಮಪ್ಪ ಮೆಲುಕು ಹಾಕಿದರು.

ವಿಧಾನಸೌಧ ಬ್ಯಾಂಕ್ವೆಟ್ ಹಾಲ್‌ನಲ್ಲಿ ಭಾನುವಾರ ಏರ್ಪಡಿಸಿದ್ದ ಡಿ.ದೇವರಾಜು ಅರಸು 108ನೇ ಜನ್ಮ ದಿನಾಚರಣೆ ಕಾರ್ಯಕ್ರಮದಲ್ಲಿ ತಮಗೆ ನೀಡಿದ ರಾಜ್ಯಮಟ್ಟದ ಡಿ.ದೇವರಾಜ ಅರಸು ಪ್ರಶಸ್ತಿಯನ್ನು ಸ್ವೀಕರಿಸಿ ಅವರು ಮಾತನಾಡಿದರು.

ಗೇಣಿದಾರರಿಗೆ ಮಾತ್ರವಲ್ಲ, ಸಾಮಾನ್ಯರ ಬದುಕಿಗೆ ಅರಸು ದಾರಿ ತೋರಿಸಿದರು. ವಂಚಿತರಿಗೆ ಅವಕಾಶ ಕಲ್ಪಿಸಲು ಆದ್ಯತೆ ನೀಡಿದರು. ಗೇಣಿದಾರರಿಗೆ ಜಮೀನಿನ ಹಕ್ಕಿಗಾಗಿ ಆರು ತಿಂಗಳ ಕಾಲ ನಡೆದ ಚಾರಿತ್ರಿಕ ಕಾಗೋಡು ಚಳವಳಿಯಲ್ಲಿ ಸ್ವತಃ ರಾಮಮನೋಹರ್ ಲೋಹಿಯಾ ಪಾಲ್ಗೊಂಡು ಸ್ಫೂರ್ತಿ ತುಂಬಿದರು ಎಂದರು.

ಅರಸು ಸಿಎಂ ಆಗಿದ್ದ ಅವಧಿಯಲ್ಲಿ ಗೇಣಿದಾರರಿಗೆ ಜಮೀನು ಹಕ್ಕುಕೊಡುವ ಸಂಬಂಧ ರಚಿಸಿದ್ದ ಕಾಯ್ದೆ ತಿದ್ದುಪಡಿ ಸಮಿತಿಯಲ್ಲಿ ನಾನೂ ಒಬ್ಬ ಸದಸ್ಯನಾಗಿದ್ದೆ. ನಂತರ ಈ ಸಮಿತಿ ಸಲ್ಲಿಸಿದ ವರದಿ ಪ್ರಕಾರ ಭೂಸುಧಾರಣೆ ಕಾಯ್ದೆಗೆ ತಿದ್ದುಪಡಿ ತಂದರು.

ಜಾತಿ ಲೆಕ್ಕಾಚಾರ ಮಾಡಿದ್ದರೆ ಗೇಣಿದಾರರಿಗೆ ಜಮೀನಿನ ಹಕ್ಕು ಕಷ್ಟಕರವಾಗುತ್ತಿತ್ತು. ಆದರೆ ಅರಸು ಜಾತಿಗಿಂತ ಗೇಣಿದಾರರಿಗೆ ಜಮೀನಿನ ಒಡೆತನ ನೀಡುವುದಕ್ಕೆ ಹೆಚ್ಚಿನ ಆದ್ಯತೆ ನೀಡಿದರು.

ಪುಣ್ಯಾತ್ಮ ದೇವರಾಜ ಅರಸು ಹೆಸರಿನಲ್ಲಿ ಸರ್ಕಾರ ಸ್ಥಾಪಿಸಿರುವ ಪ್ರಶಸ್ತಿ ನೀಡಿ, ಗೌರವಿಸಿರುವುದು ಬದುಕಿನ ಅವಿಸ್ಮರಣೀಯ ಹಾಗೂ ಸಾರ್ಥಕ ಕ್ಷಣಗಳು ಎಂದು ಕಾಗೋಡು ತಿಮ್ಮಪ್ಪ ಭಾವುಕರಾಗಿ ನುಡಿದರು.