ಏಪ್ರಿಲ್ನಲ್ಲಿ ಲಾಕ್ಡೌನ್ ಸ್ವಲ್ಪ ಸಡಿಲಿಕೆಯಾದಾಗ ಅಗತ್ಯ ವಸ್ತುಗಳ ಸಾಗಣೆಗೆ ಅವಕಾಶವಾಯಿತು. ಒಂದಷ್ಟು ಮಂಡಕ್ಕಿ ಭಟ್ಟಿಗಳ ಬಾಗಿಲು ತೆರೆದವು.ಕೃಷಿ ಉತ್ಪನ್ನಗಳ ಮಾರಾಟ, ಸಾಗಾಟ ನಡೆಯಿತು. ಆ ಹಂತದಲ್ಲಿ ಯಾವ ಯಾವ ಜಿಲ್ಲೆ, ರಾಜ್ಯಗಳಿಂದ ಸರಕುಗಳನ್ನು ಹೊತ್ತ ವಾಹನಗಳು ಓಡಾಡಿದವೋ ಗೊತ್ತಿಲ್ಲ. ಸೋಂಕಿತ ಪ್ರದೇಶಗಳಲ್ಲಿ ಸುತ್ತಾಡಿ ಬಂದ ಲಾರಿ ಚಾಲಕರು, ಕ್ಲೀನರ್ಗಳು, ಹಮಾಲರು ಯಾರಾದರೂ ಬಾಷಾನಗರದ ಸ್ಟಾಫ್ ನರ್ಸ್ ಬಳಿ ಚಿಕಿತ್ಸೆ ಪಡೆದಿರಬಹುದು ಎಂಬುದು ಒಂದು ಸಾಧ್ಯತೆಯಾಗಿದೆ. ಇದಕ್ಕೆ ಪೂರಕ ಎನ್ನುವಂತೆ ಬಾಷಾನಗರದ ಹಿಂದೆ ಮತ್ತು ಮುಂದೆ ಮಂಡಕ್ಕಿ ಭಟ್ಟಿಗಳಿವೆ. ಸ್ಟಾಫ್ ನರ್ಸ್ ಸಂಬಂಧಿಕರು, ಸ್ನೇಹಿತರ ಮನೆಗಳಿಗೇ ಹೋಗಿ ಚಿಕಿತ್ಸೆ ನೀಡಿ ಬಂದಿದ್ದರು ಎಂಬುದು ಇನ್ನೊಂದು ಎಳೆ. ಇಮಾಮ್ಗರದ ಗೃಹಿಣಿಯೊಬ್ಬರ ಮನೆಗೆ ಹೋಗಿ ಆಕೆಗೆ ಡ್ರಿಪ್ ಹಾಕಿ ಚಿಕಿತ್ಸೆ ನೀಡಿದ್ದರು. ಏಪ್ರಿಲ್ ಮೊದಲ ವಾರ ವ್ಯಕ್ತಿಯೊಬ್ಬ ಹಾಸನ, ಜಾವಗಲ್ ಪ್ರದೇಶಗಳಿಗೆ ದಾವಣಗೆರೆಯಿಂದ ಈರುಳ್ಳಿ ತೆಗೆದುಕೊಂಡು ಹೋಗಿದ್ದ. ಹಾಸನದಲ್ಲಿ ಈರುಳ್ಳಿ ಅನ್ಲೋಡ್ ಮಾಡಿದ ನಂತರ ಅಲ್ಲಿಂದ 20 ಕಿ.ಮೀ. ದೂರದ ಪ್ರದೇಶದಲ್ಲಿ ವಾಹನ ನಿಲ್ಲಿಸಿ ಅಲ್ಲಿಯೇ ಮಲಗಿದ್ದರು ಎನ್ನಲಾಗಿದೆ.
