ಹೊಸ ಅಡಕೆ ಧಾರಣೆ ಕೆ.ಜಿ.ಗೆ 300 ರೂ. ಗಡಿ ದಾಟಿರುವುದು ಸಾರ್ವಕಾಲಿಕ. ಇದಕ್ಕೆ ಕಾರಣ ಮಾರುಕಟ್ಟೆಗೆ ಅಡಕೆ ಪೂರೈಕೆಯಾಗದಿರುವುದು. ಇಳುವರಿ ಕೊರತೆ ಹಾಗೂ ಕೊಳೆರೋಗ ಪರಿಣಾಮ ಕೆಲವರ್ಷಗಳಿಂದ ಅಡಕೆ ಉತ್ಪಾದನೆಯೂ ಕಡಿಮೆಯಾಗಿದೆ. ಬೇಡಿಕೆ ಹೆಚ್ಚಾಗಿ ಬೆಲೆಯೂ ಏರುಗತಿಯಲ್ಲಿ ಸಾಗಿತ್ತು. ವರ್ತಕರು ಬೆಳೆಗಾರರಿಂದ ಸಾಧ್ಯವಾದಷ್ಟು ಕಡಿಮೆ ಬೆಲೆಗೆ ಖರೀದಿಸಿ ಗೋದಾಮುಗಳಲ್ಲಿ ಶೇಖರಿಸಿದ್ದರು. ಲಾಕ್ಡೌನ್ ಹಿನ್ನೆಲೆ ಅಡಕೆ ರಪ್ತು ಸಾಧ್ಯವಾಗದೆ ಬಾಕಿಯಾಗಿದ್ದು, ಲಾಕ್ಡೌನ್ ಸಡಿಲಗೊಂಡ ನಂತರ ಅಂತಾರಾಜ್ಯ ಸಂಚಾರ ಆರಂಭಗೊಳ್ಳುತ್ತಿದ್ದಂತೆ ಅಡಕೆ ಪೂರೈಕೆಯಾಗಿದೆ. ಆದರೂ ಉತ್ತರ ಭಾರತದ ಬೇಡಿಕೆಯನ್ನು ಸರಿಗಟ್ಟುವುದು ಸಾಧ್ಯವಾಗಿಲ್ಲ. ಮಲೇಷ್ಯಾ, ಸಿಂಗಾಪುರ, ಮ್ಯಾನ್ಮಾರ್ನಿಂದ ಬಾಂಗ್ಲಾದೇಶದ ಮೂಲಕ ಭಾರತಕ್ಕೆ ಕಳಪೆ ಗುಣಮಟ್ಟದ ವಿದೇಶಿ ಅಡಕೆ ಅಕ್ರಮ ಆಮದಿಗೆ ಕೆಲತಿಂಗಳಿನಿಂದ ಪೂರ್ಣ ಪ್ರಮಾಣದ ಬ್ರೇಕ್ ಬಿದ್ದಿರುವುದು, ಶ್ರೀಲಂಕಾ- ಭಾರತ ಸಾಫ್ಟಾ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದ ದುರ್ಬಳಕೆಗೂ ಕಡಿವಾಣ ಮತ್ತು ವಿಶ್ವದಾದ್ಯಂತ ಕರೊನಾ ಬ್ರೇಕ್ಡೌನ್ನಿಂದಾಗಿ ಅಡಕೆ ಆಮದು ನಿಂತಿರುವುದೂ ಸ್ಥಳೀಯ ಅಡಕೆಗೆ ಬೇಡಿಕೆ ಕುದುರಲು ಕಾರಣವಾಗಿದೆ.
