Rhea Sachdev - ಹಿಂದಿ, ತೆಲುಗು, ಸುತ್ತಿ ಕನ್ನಡಕ್ಕೆ ಬಂದ ದೆಹಲಿ ನಟಿ

ಪ್ರಾಣ್​ ಸುವರ್ಣ ಚೊಚ್ಚಲ ಬಾರಿಗೆ ಆ್ಯಕ್ಷನ್​-ಕಟ್​ ಹೇಳುತ್ತಿರುವ, "ಮೆಜೆಸ್ಟಿಕ್​ 2' ನಟ ಭರತ್​ ನಾಯಕನಾಗಿರುವ ಚಿತ್ರ "ರುಕ್ಮಿಣಿ ರಾಧಾಕೃಷ್ಣ'. ಇಲ್ಲಿ ಭರತ್​ಗೆ ಇಬ್ಬರು ನಾಯಕಿಯರಿದ್ದು ಕಿರುತೆರೆ ನಟಿ ಮೋಕ್ಷಿತಾ ಪೈ ಮತ್ತು ದೆಹಲಿ ಮೂಲದ ರಂಗಭೂಮಿ ಪ್ರತಿಭೆ, ಮಾಡೆಲಿಂಗ್​ನಲ್ಲೂ ಮಿಂಚಿರುವ ರಿಯಾ ಸಚ್​ದೇವ್​ ನಟಿಸಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ "ರಾಧೇಕುಂ' ಸಾಂಗ್​ ವೈರಲ್​ ಆಗಿದ್ದು, ಇದೇ ಖುಷಿಯಲ್ಲಿ ರಿಯಾ ವಿಜಯವಾಣಿ ಜತೆ ಮಾತಿಗೆ ಸಿಕ್ಕಿದ್ದರು. "ನಾನು ಮೂಲತಃ ದೆಹಲಿಯವಳು. ಬಾಲ್ಯದಿಂದಲೂ ನಟಿಯಾಗುವ ಆಸೆಯಿತ್ತು. ದೆಹಲಿ ವಿಶ್ವವಿದ್ಯಾಲಯದಲ್ಲಿ ಶಿಕ್ಷಣ ಪಡೆದು, ಅದೇ ಸಮಯದಲ್ಲಿ ಆ್ಯಕ್ಟಿಂಗ್​ ತರಬೇತಿ ಪಡೆದೆ. ಆ್ಯಕ್ಟಿಂಗ್​ ನನ್ನ ಜೀವನ ಅಂತ ಮೊದಲೇ ನಿರ್ಧರಿಸಿದ್ದ ಕಾರಣ ಮುಂಬೈಗೆ ಬಂದೆ. ಮಾಡೆಲಿಂಗ್​ ಮಾಡುತ್ತಾ ಅಸ್ಮಿತಾ ಎಂಬ ರಂಗತಂಡದ ಜತೆ ಹಲವು ನಾಟಕ ಮಾಡಿದೆ. ಅದರ ಜತೆಗೆ ಆಡಿಷನ್​ ನೀಡುತ್ತಿದ್ದೆ. ಕೆಲ ಮ್ಯೂಸಿಕ್​ ವಿಡಿಯೋಗಳಲ್ಲಿ ನಟಿಸಿದೆ. ಕ್ರಮೇಣ ದಣ ಭಾರತದಿಂದ ಅವಕಾಶಗಳು ದೊರೆತವು. ತೆಲುಗಿನ "ಹೈಡ್​ ಆ್ಯಂಡ್​ ಸೀಕ್​' ಎಂಬ ವೆಬ್​ಸರಣಿಯಲ್ಲಿ ನಟಿಸಿದೆ. ಅದರ ಬೆನ್ನಲ್ಲೇ ಆಡಿಷನ್​ ಮೂಲಕವೇ "ರುಕ್ಮಿಣಿ ರಾಧಾಕೃಷ್ಣ'ದಲ್ಲೂ ಅವಕಾಶ ದೊರೆಯಿತು. ಕಥೆಯ ಜತೆಗೆ ನನ್ನ ಪಾತ್ರವೂ ತುಂಬ ಚೆನ್ನಾಗಿದೆ. ನಾನಿಲ್ಲಿ ರುಕ್ಮಿಣಿ ಪಾತ್ರದಲ್ಲಿ ನಟಿಸಿದ್ದೇನೆ. ಹೊಸ ಭಾಷೆಯಾದ ಕಾರಣ ಹಲವು ದಿನಗಳ ಕಾಲ ವರ್ಕ್​ಶಾಪ್​ ಮಾಡಿ, ತುಂಬ ಸಿದ್ಧತೆ ನಡೆಸಿಯೇ ಶೂಟಿಂಗ್​ಗೆ ಬಂದೆ' ಎಂದು ಮಾಹಿತಿ ನೀಡುತ್ತಾರೆ.

ರಿಯಾ ಸಚ್​ದೇವ್​ 5.7 ಅಡಿ ಎತ್ತರವಿದ್ದು, ಅವರಿಗೆ ಅದೇ ಪ್ಲಸ್​ ಮತ್ತು ಮೈನಸ್​ ಎರಡೂ ಆಗಿದೆಯಂತೆ. "ಕೆಲ ಅವಕಾಶಗಳು ಎತ್ತರವಿದ್ದೇನೆ ಅಂತಲೇ ದೊರೆತಿವೆ. ಹಾಗೇ ನಾನು ಹೈಟ್​ ಜಾಸ್ತಿ ಅಂತ ಕೆಲ ಆರ್​ಗಳು ಮಿಸ್​ ಕೂಡ ಆಗಿವೆ. ಆದರೆ, ನಾನು ಕಳೆದುಕೊಂಡ ಅಥವಾ ನನಗೆ ಸಿಗದ ಅವಕಾಶಗಳ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಳ್ಳುವುದಿಲ್ಲ. ಏಕೆಂದರೆ, ನನ್ನ ಪಾಲಿಗೆ ಏನು ಸಿಗಬೇಕೋ, ಅದು ಸಿಕ್ಕೇ ಸಿಗುತ್ತದೆ ಅಂತ ನಂಬುತ್ತೇನೆ. ಎತ್ತರ, ಲುಕ್​ಗಳಿಗಿಂತ ಪಾತ್ರವನ್ನು ಹೇಗೆ ನಿಭಾಯಿಸುತ್ತೇವೆ ಎಂಬುದು ಮುಖ್ಯವಾಗುತ್ತದೆ' ಎನ್ನುತ್ತಾರೆ ರಿಯಾ.

"ರುಕ್ಮಿಣಿ ರಾಧಾಕೃಷ್ಣ' ಇನ್ನು ಕೆಲವೇ ತಿಂಗಳಲ್ಲಿ ರಿಲೀಸ್​ ಆಗಲಿದೆ. ಅದರ ಜತೆಗೆ ರಿಯಾ ತೆಲುಗಿನ 'ಫ್ರೆಂಡ್ಲಿ ಘೋಸ್ಟ್​' ಎಂಬ ಚಿತ್ರದಲ್ಲೂ ನಟಿಸಿದ್ದು, ಅದು ಕೂಡ ಬಿಡುಗಡೆಗೆ ರೆಡಿಯಿದೆ. ಹಾಗೇ "ಬ್ಲೀಡ್​ ವಿತ್​ ಪೆಡ್​' ಎಂಬ ತೆಲುಗು ಸರಣಿಯಲ್ಲೂ ಅವರು ನಟಿಸಿದ್ದಾರೆ. ಜತೆಗೆ ಕೆಲ ಪ್ರಾಜೆಕ್ಟ್​ಗಳು ಲೈನಪ್​ನಲ್ಲಿದ್ದು, ಹೊಸ ಕಥೆಗಳನ್ನೂ ಕೇಳುತ್ತಿದ್ದಾರಂತೆ ರಿಯಾ ಸಚ್​ದೇವ್​.