VIDEO| ರಾಬರ್ಟ್’ನ ಪ್ರಪ್ರಥಮ ಸಾಂಗ್ ‘ಬಾ ಬಾ ನಾ ರೆಡಿ; ಡಿ ಬಾಸ್ ಹಾಡಿನುದ್ದಕ್ಕೂ ಡಿ..ಡಿ..

ಬೆಂಗಳೂರು:  ಅಭಿಮಾನಿಗಳಿಂದ ‘ಡಿ ಬಾಸ್’ ಎಂದೇ ಕರೆಸಿಕೊಳ್ಳುವ ‘ಚಾಲೆಂಜಿಂಗ್ ಸ್ಟಾರ್’ ದರ್ಶನ್ ಅಭಿನಯದ ಬಹುನಿರೀಕ್ಷಿತ ಸಿನಿಮಾ ‘ರಾಬರ್ಟ್’ನ ಪ್ರಪ್ರಥಮ ಸಾಂಗ್ ‘ಬಾ ಬಾ ನಾ ರೆಡಿ ...’ ಅಭಿಮಾನಿಗಳ ನಿರೀಕ್ಷೆಯಂತೆ ಜಬರ್​ದಸ್ತ್ ಆಗಿಯೇ ಮೂಡಿಬಂದಿದೆ.

ಮಾತ್ರವಲ್ಲ, ಮಂಗಳವಾರ ‘ಆನಂದ್ ಆಡಿಯೋ’ ಯೂಟ್ಯೂಬ್ ಲಿಂಕ್​ನಲ್ಲಿ ಬಿಡುಗಡೆ ಆಗುತ್ತಿದ್ದಂತೆ ಭಾರಿ ಮೆಚ್ಚುಗೆ ಪಡೆಯಲಾರಂಭಿಸಿದೆ. ‘ಹಠವ ಹಿಡಿದು ಪಡೆಯೇ ಬರಲಿ ಹೊಸಕಿ ಬಿಡುವೆ ಕಾಲಡಿ, ಗುಡುಗು ಸಿಡಿಲು ಜೊತೆಗೇ ಬರಲಿ ಕೆಡವಿ ಹೊಡೆವ ಗಾರುಡಿ ...’ ಎಂಬ ಸಾಲಿನಿಂದ ಆರಂಭವಾಗುವ ಈ ಹಾಡಿನುದ್ದಕ್ಕೂ ಅಂತ್ಯಪ್ರಾಸವಾಗಿ ‘ಡಿ’ ಇರುವುದು ಹಾಡಿಗೆ ಒಂದು ವಿಶೇಷತೆಯನ್ನು ತಂದುಕೊಟ್ಟಿದ್ದು, ಅದೇ ಆಕರ್ಷಣೆಯಾಗಿ ಗಮನ ಸೆಳೆಯುತ್ತಿದೆ.

ಚಿತ್ರದಲ್ಲಿನ ನಾಯಕ ಪಾತ್ರ, ದರ್ಶನ್ ಇಮೇಜ್ ಎರಡನ್ನೂ ರಂಜಿಸುವ ರೀತಿಯಲ್ಲಿ ಈ ಹಾಡು ಜೋಶ್​ಭರಿತ ಮ್ಯೂಸಿಕ್​ನೊಂದಿಗೆ ಮೂಡಿಬಂದಿದೆ. ಡಾ.ವಿ.ನಾಗೇಂದ್ರ ಪ್ರಸಾದ್ ಅವರ ಸಾಹಿತ್ಯದ ಈ ಗೀತೆಗೆ ಅರ್ಜುನ್ ಜನ್ಯ ಸಂಗೀತ ಸಂಯೋಜಿಸಿದ್ದಾರೆ.

‘ಉಮಾಪತಿ ಫಿಲಮ್ಸ್​’ ಬ್ಯಾನರ್​ನಲ್ಲಿ ಉಮಾಪತಿ ಶ್ರೀನಿವಾಸ ಗೌಡ ನಿರ್ವಣ, ತರುಣ್ ಕಿಶೋರ್ ಸುಧೀರ್ ನಿರ್ದೇಶನದ ಈ ಸಿನಿಮಾದಲ್ಲಿ ದರ್ಶನ್, ಆಶಾ ಭಟ್, ಸೋನಲ್ ಮೊಂತೆರೊ, ಜಗಪತಿ ಬಾಬು, ವಿನೋದ್ ಪ್ರಭಾಕರ್, ರವಿಕಿಶನ್, ಪಿ.ರವಿಶಂಕರ್, ದೇವರಾಜ್ ಮುಂತಾದ ಅದ್ದೂರಿ ತಾರಾಗಣವೇ ಇದೆ. ಸದ್ಯದ ಮಾಹಿತಿ ಪ್ರಕಾರ ಏ. 9ರಂದು ಸಿನಿಮಾ ಬಿಡುಗಡೆ ಮಾಡುವ ಗುರಿ ಇರಿಸಿಕೊಂಡಿದೆಯಂತೆ ಚಿತ್ರತಂಡ.