ವೆಡ್ಡಿಂಗ್​ ಫೋಟೋಶೂಟ್ ವೇಳೆ ವರನ ಕೈಯಿಂದ ಜಾರಿದ ವಧು: ಇಲ್ಲಿದೆ ನೀವ್ಯಾರು ಊಹಿಸದ ರೋಚಕ ಟ್ವಿಸ್ಟ್​!​

ನ್ಯೂಯಾರ್ಕ್​: ಇತ್ತೀಚಿನ ದಿನಗಳಲ್ಲಿ ವೆಡ್ಡಿಂಗ್​ ಫೋಟೋಶೂಟ್​ ಎಂಬುದು ಟ್ರೆಂಡ್​ ಆಗಿಬಿಟ್ಟಿದೆ. ಅದರಲ್ಲೂ ಹೊಸತನ ಹುಡುಕುವ ವಧು-ವರರು ಕೆಲವೊಮ್ಮೆ ದುಸ್ಸಾಹಸಕ್ಕೂ ಕೈಹಾಕುತ್ತಾರೆಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ವಧುವೊಬ್ಬಳು 1,900 ಅಡಿ ಎತ್ತರದ ತುತ್ತ ತುದಿಯಲ್ಲಿ ತೂಗಾಡಿದ ರೀತಿಯಲ್ಲಿ ಫೋಟೋಶೂಟ್ ಮಾಡಿಕೊಂಡಿರುವುದು ಇದೀಗ ವೈರಲ್​ ಆಗಿದೆ.

ರಯಾನ್​ ಮೈರ್ಸ್​ (30) ಮತ್ತು ಪತ್ನಿ ಸ್ಕೈ (28) ಅಮೆರಿಕದ ಅರ್ಕಾನ್ಸಾಸ್​ ಮೂಲದವರು. ಬಹಳ ಅದ್ಧೂರಿಯಾಗಿ ಮದುವೆ ಆಗಬೇಕೆಂದು ಕನಸು ಕಟ್ಟಿಕೊಂಡಿದ್ದ ಅವರಿಗೆ ಕರೊನಾ ವೈರಲ್​ ಲಾಕ್​ಡೌನ್​ ಮಾರ್ಗಸೂಚಿ ತಣ್ಣೀರೆರಚಿತು. ಆದರೂ ಸರಳವಾಗಿ ಮದುವೆಯಾದ ನವಜೋಡಿ ಸಾಹಸಮಯ ಫೋಟೋಶೂಟ್​ ಮಾಡಿಕೊಳ್ಳಲು ನಿರ್ಧರಿಸಿತು. ಅದಕ್ಕಾಗಿ ಅವರು ಆರಿಸಿಕೊಂಡ ಜಾಗ ಅರ್ಕಾನ್ಸಾಸ್​ನಲ್ಲಿರುವ ಪ್ರಖ್ಯಾತ ಟ್ರೆಕ್ಕಿಂಗ್​ ಪ್ರದೇಶವಾದ ಹವ್ಕ್ಸ್​ಬಿಲ್​ ಕ್ರ್ಯಾಗ್​. ಇದು ತುಂಬಾ ಅಪಾಯಕಾರಿ ಜಾಗವೂ ಹೌದು. ಆಳವಾದ ಪ್ರಪಾತವಾಗಿದ್ದು, ನವಜೋಡಿ 1,900 ಅಡಿ ಎತ್ತರದಲ್ಲಿ ಫೋಟೋಶೂಟ್​ ಮಾಡಿಕೊಂಡಿದ್ದಾರೆ.

ಫೋಟೋಗ್ರಾಫರ್​ ಮಾಸನ್​ ಗಾರ್ಡನರ್​ ಎಂಬುವರು ರೋಮಾಂಚನಕಾರಿ ಫೋಟೋಗಳನ್ನು ಸೆರೆಹಿಡಿದಿದ್ದಾರೆ. ಅದರಲ್ಲೂ ಒಂದು ಫೋಟೋ ಭಾರಿ ವೈರಲ್​ ಆಗಿದೆ. ಪರ್ವತದ ತುತ್ತ ತುದಿಯಲ್ಲಿ ವಧುವಿನ ಕೈಯನ್ನು ವರ ಹಿಡಿದಿದ್ದಾನೆ. ವಧು ತೂಗಾಡುವಂತಿದ್ದು, ವರನ ಕೈನಿಂದ ಜಾರಿದ ವಧು ಪ್ರಪಾತದ ಕೆಳಗೆ ಬೀಳುವಂತಿದೆ. ಫೋಟೋ ನೋಡಿದವರು ಬಿದ್ದೇ ಹೋದಳೇನು ಎಂಬಂತಿದೆ. ಆದರೆ, ರೋಚಕ ಟ್ವಿಸ್ಟ್​ ಏನೆಂದರೆ ವಧುವಿನ ರಕ್ಷಣೆಗೆ ರೋಪ್​ ಬಳಸಿರುವು ಮತ್ತೊಂದು ಫೋಟೋದಲ್ಲಿ ಕಾಣುತ್ತದೆ.

ಹೀಗೆ ನವಜೋಡಿಯ ಸಾಕಷ್ಟು ಸಾಹಸಮಯ ಫೋಟೋಗಳನ್ನು ಫೋಟೋಗ್ರಾಫರ್​ ಸೆರೆಹಿಡಿದಿದ್ದಾರೆ. ನವಜೋಡಿ ಸಾಹಸಪ್ರಿಯರಾದ್ದರಿಂದ ಈ ವಿಭಿನ್ನ ಪ್ರಯತ್ನಕ್ಕೆ ಕೈಹಾಕಿದ್ದಾರೆ. ಆದರೆ, ದುರ್ಬಲ ಹೃದಯದವರು ಈ ರೀತಿಯ ದುಸ್ಸಾಹಸಕ್ಕೆ ಕೈಹಾಕಬಾರದು ಎಂಬುದು ನವಜೋಡಿಯ ಮನವಿಯೂ ಆಗಿದೆ. ಸದ್ಯ ಫೋಟೋಗಳಂತೂ ಜಾಲತಾಣದಲ್ಲಿ ಸದ್ದು ಮಾಡುತ್ತಿದೆ. (ಏಜೆನ್ಸೀಸ್​)

https://www.vijayavani.net/father-poisons-his-days-old-twin-daughters-minister-calls-for-action/