ಮಾತಿಗೆ ಕಟ್ಟುವ ಶಕ್ತಿಯೂ ಇದೆ; ಕೆಡಹುವ ಶಕ್ತಿಯೂ ಇದೆ. ಮಾತು ಶಾಂತಿಯನ್ನೂ ತರಬಲ್ಲದು; ಅಶಾಂತಿಯನ್ನೂ ಉಂಟುಮಾಡಬಲ್ಲದು ಎಂಬುದಕ್ಕೆ ಇತಿಹಾಸ ಮತ್ತು ವರ್ತಮಾನದಲ್ಲಿ ಹೇರಳ ನಿದರ್ಶನಗಳು ಸಿಗುತ್ತವೆ. ಆಯಾ ಸನ್ನಿವೇಶ, ಸಂದರ್ಭ ನೋಡಿ ಮಾತಾಡುವುದು ಒಂದು ಕಲೆ. ಅದರಲ್ಲೂ ವಿಶೇಷವಾಗಿ ಜನಪ್ರತಿನಿಧಿಗಳು ಸಾರ್ವಜನಿಕವಾಗಿ ಭಾಷಣ ಮಾಡುವಾಗ, ಹೇಳಿಕೆ ನೀಡುವಾಗ ಬಹಳ ಎಚ್ಚರಿಕೆ ವಹಿಸಬೇಕಾಗುತ್ತದೆ. ನಮ್ಮ ಸಂವಿಧಾನದ 19ನೇ ವಿಧಿಯು ಎಲ್ಲರಿಗೂ ವಾಕ್ ಸ್ವಾತಂತ್ರ್ಯವನ್ನು ನೀಡಿದೆ. ಅದರಲ್ಲೂ ಸಾಮಾಜಿಕ ಜಾಲತಾಣಗಳ ಉಬ್ಬರ ಇರುವ ಇಂದಿನ ದಿನಮಾನದಲ್ಲಿ ಜನರಿಗೆ ಅಭಿಪ್ರಾಯ ವ್ಯಕ್ತಪಡಿಸಲು ಬೇಕಾದಷ್ಟು ವೇದಿಕೆಗಳು ಲಭ್ಯ ಇರುವುದರಿಂದ ಸಲಹೆಸೂಚನೆ, ಅನಿಸಿಕೆ, ಟೀಕೆಗಳು ಓತಪ್ರೋತವಾಗಿ ಹರಿದುಬರುತ್ತವೆ.
