ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯವು 2017ರಲ್ಲಿ ಸ್ಥಾಪನೆಯಾಗಿದ್ದು, ಕೋಲಾರ, ಚಿಕ್ಕಬಳ್ಳಾಪುರ ಹಾಗೂ ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳ ಪ್ರಥಮ ದರ್ಜೆ, ಸ್ನಾತಕೋತ್ತರ ಹಾಗೂ ವಿವಿಧ ರೀತಿಯ ಕಾಲೇಜುಗಳು ವ್ಯಾಪ್ತಿಗೆ ಒಳಪಟ್ಟಿದ್ದು, ಶೈಕ್ಷಣಿಕ ಕಾರ್ಯಚಟುವಟಿಕೆಗಳು ಚಾಲ್ತಿಯಲ್ಲಿವೆ. ವಿವಿ ಕಾರ್ಯಚಟುವಟಿಕೆಗಳನ್ನು ನಡೆಸಲು ಅಗತ್ಯ ಮಾನವ ಸಂಪನ್ಮೂಲವನ್ನು ಸರ್ಕಾರ ಕುಲಸಚಿವರು ಸೇರಿ ಉನ್ನತ ಹುದ್ದೆಗಳನ್ನು ಸರ್ಕಾರವೇ ಭರ್ತಿ ಮಾಡಿದೆ. ಬಾಕಿಯಿದ್ದ ಬೋಧಕೇತರ ಸಿಬ್ಬಂದಿಯನ್ನು ಹೊರಗುತ್ತಿಗೆ ಆಧಾರದ ಮೇರೆಗೆ ನೇಮಕ ಮಾಡಿಕೊಳ್ಳಲು ವಿವಿಗೆ ಅಧಿಕಾರ ನೀಡಲಾಗಿತ್ತು.
ಆದರೆ, ವಿವಿಯ ಸಿಂಡಿಕೇಟ್ ಸದಸ್ಯರು ಹಾಗೂ ಕೆಲ ಅಧಿಕಾರಿಗಳು ಬೇಕಾದವರನ್ನು ನೇಮಕ ಮಾಡಿಕೊಂಡಿದ್ದಾರೆ, ಇದಕ್ಕೂ ಮೊದಲು ರೋಸ್ಟರ್ ಪದ್ಧತಿ ಪಾಲನೆ ಮಾಡಿಲ್ಲ. ನೇಮಕಾತಿಯ ಪ್ರಕಟಣೆ ಹೊರಡಿಸಿಲ್ಲ, ಜತೆಗೆ ನೇಮಕಾತಿ ಸಮಿತಿ ರಚನೆ ಮಾಡಿಲ್ಲ ಎಂಬ ಆರೋಪಗಳು ಕೇಳಿಬಂದಿವೆ. ತಾತ್ಕಾಲಿಕ ಸಿಬ್ಬಂದಿಯನ್ನು ಸಂಚಿತ ವೇತನಕ್ಕೆ ಶಿಾರಸು ಮಾಡುವುದು ಕಾನೂನು ಬಾಹಿರ ಎಂದು ತಿಳಿಸಿದ್ದರೂ ಕೆಲ ಸಿಂಡಿಕೇಟ್ ಸದಸ್ಯರು ಸಭೆಯಲ್ಲಿ ತೀರ್ಮಾನ ಕೈಗೊಂಡು ಸರ್ಕಾರಕ್ಕೆ ಪಟ್ಟಿ ಕಳುಹಿಸಲು ಮುಂದಾಗಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.
ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯದಲ್ಲಿ ಗುತ್ತಿಗೆ ಆಧಾರದಲ್ಲಿ ತಾತ್ಕಾಲಿಕವಾಗಿ ನೇಮಕ ಮಾಡಿಕೊಂಡಿರುವ ಬೋಧಕೇತರ ಸಿಬ್ಬಂದಿಯನ್ನು ಸಂಚಿತ ವೇತನಕ್ಕೆ ಶಿಫಾರಸು ಮಾಡುವ ಪ್ರಕ್ರಿಯೆಗೆ ಕೆಲವರಿಂದ ವಿರೋಧ ವ್ಯಕ್ತವಾಗಿತ್ತು. ಸಭೆಯಲ್ಲಿ ಸಂಚಿತ ವೇತನ ಬಗ್ಗೆ ವಿಶ್ವವಿದ್ಯಾಲಯದಿಂದ ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದು ರಾಜ್ಯದ ಇತರ ವಿಶ್ವವಿದ್ಯಾಲಯಗಳಿಗೆ ನೀಡಿರುವ ಆದೇಶದಂತೆ ನೀಡಲು ನಿರ್ದೇಶಿಸುವಂತೆ ಕೂಗು ಕೇಳಿಬಂದಿತ್ತು. ನೌಕರರ ಕೋರಿಕೆಯು ನಿಯಮಗಳ ಅನ್ವಯ ಇರುವುದಿಲ್ಲವಾದರೂ ರಾಜ್ಯದ ಇತರ ವಿವಿಗಳು ಹೊರಡಿಸಿರುವ ಕಚೇರಿ ಆದೇಶ ಹಾಗೂ ಉಲ್ಲೇಖಗಳನ್ನು ಪರಿಶೀಲಿಸಿ ಸಭೆಗೆ ಮಂಡಿಸಲು ರ್ನಿಣಯಿಸಲಾಗಿದೆ. ಜತೆಗೆ ಸರ್ಕಾರಿ ನಿಯಮಗಳ ಅನ್ವಯ ತಾತ್ಕಾಲಿಕ ನೌಕರರಿಗೆ ಕನಿಷ್ಠ ವೇತನದಂತೆ ಮಾಹೆಯಾನ ನೀಡುವ ಬಗ್ಗೆ ಪರಿಶೀಲಿಸುವುದು ಮತ್ತು ಗುತ್ತಿಗೆ ಆದೇಶವನ್ನು ವಿವಿಯಲ್ಲಿ ಪಾಲಿಸುವ ರ್ನಿಣಯ ಕೈಗೊಳ್ಳಲು ಮುಂದಾಗಿದೆ.
