ಪುಲ್ವಾಮ ದಾಳಿಯಲ್ಲಿ ಮರಣ ಹೊಂದಿದ ಯೋಧರಿಗೆ ಸ್ಮಾರಕ ನಿರ್ಮಿಸುವ ಅವಶ್ಯಕತೆ ಇಲ್ಲ ಎಂದ ಸಿಪಿಐ(ಎಂ) ನಾಯಕ

ನವದೆಹಲಿ: ಪುಲ್ವಾಮದಲ್ಲಿ ಸಿಆರ್​ಪಿಎಫ್​ ಯೋಧರ ಮೇಲೆ ದಾಳಿ ನಡೆದು ಇಂದಿಗೆ ಒಂದು ವರ್ಷವಾಗಿದೆ. ದೇಶದ ಜನರೆಲ್ಲರೂ ಹತರಾದ ಯೊಧರ ನೆನಪಿನಲ್ಲಿ ದುಃಖಿತರಾಗಿದ್ದರೆ ಸಿಪಿಐ(ಎಂ) ನ ನಾಯಕ ಮೊಹಮ್ಮದ್​ ಸಲೀಮ್​ ಯೋಧರಿಗೆ ಸ್ಮಾರಕ ನಿರ್ಮಿಸುವ ಅಗತ್ಯತೆ ಇಲ್ಲ ಎಂದು ಹೇಳಿದ್ದಾರೆ.

ಈ ಕುರಿತಾಗಿ ಟ್ವೀಟ್ ಮಾಡಿರುವ ಸಲೀಮ್​, "ನಮ್ಮ ಅಸಮರ್ಥತೆಯನ್ನು ನೆನಪಿಸಲು ಸ್ಮಾರಕ ನಿರ್ಮಿಸಿಕೊಳ್ಳುವ ಅಗತ್ಯವಿಲ್ಲ. ಪುಲ್ವಾಮದ ದಾಳಿಯ ದಿನದಂದು 80 ಕೆ.ಜಿ.ಯ ಆರ್​ಡಿಎಕ್ಸ್​ ಅಂತಾರಾಷ್ಟ್ರೀಯ ಗಡಿಯನ್ನು ದಾಟಿ ಮಿಲಿಟರಿ ವಲಯಕ್ಕೆ ಹೇಗೆ ಬಂತು ಎನ್ನುವುದನ್ನು ನಾವು ಮೊದಲು ತಿಳಿದುಕೊಳ್ಳಬೇಕು." ಎಂದು ಹೇಳಿದ್ದಾರೆ.

ಹತರಾದ ನಮ್ಮ ಸೈನಿಕರಿಗೆ ನ್ಯಾಯ ದೊರಕಿಸಿಕೊಡಬೇಕಾಗಿದೆ ಎಂದು ಸಲೀಮ್​ ಹೇಳಿದ್ದಾರೆ.

2019ರ ಫೆ.14ರಂದು 78 ವಾಹನಗಳಲ್ಲಿ 2,500ಕ್ಕೂ ಹೆಚ್ಚು ಸಿಪಿಆರ್​ಎಫ್​ ಯೋಧರನ್ನು ಜಮ್ಮುವಿನಿಂದ ಶ್ರೀನಗರಕ್ಕೆ ರವಾನಿಸಲಾಗುತ್ತಿತ್ತು. ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಾಲಾಗಿ ಬರುತ್ತಿದ್ದ ಸೇನಾ ವಾಹನಗಳಿಗೆ ಕೆಂಪು ಬಣ್ಣದ ಕಾರೊಂದು ಬಂದು ಡಿಕ್ಕಿ ಹೊಡೆದಿದ್ದು ಭಾರೀ ಸ್ಫೋಟ ಸಂಭವಿಸಿತ್ತು. ಈ ಘಟನೆಯಿಂದಾಗಿ 40ಕ್ಕೂ ಹೆಚ್ಚು ಯೋಧರು ದುರ್ಮರಣ ಹೊಂದಿದ್ದರು. (ಏಜೆನ್ಸೀಸ್​)