ನವದೆಹಲಿ: ದಾದ್ರ ಮತ್ತು ನಗರ್ ಹವೇಲಿ, ಹಿಮಾಚಲ ಪ್ರದೇಶದ ಮಂಡಿ, ಮಧ್ಯಪ್ರದೇಶದ ಖಂಡ್ವಾ ಲೋಕಸಭಾ ಕ್ಷೇತ್ರಗಳು ಹಾಗೂ 14 ರಾಜ್ಯಗಳ 30 ವಿಧಾನಸಭಾ ಕ್ಷೇತ್ರಗಳ ಉಪಚುನಾವಣೆಗೆ ಚುನಾವಣಾ ಆಯೋಗ ದಿನಾಂಕ ಘೋಷಿಸಿದೆ. ಅಕ್ಟೋಬರ್ 30ಕ್ಕೆ ಮತದಾನ ನಡೆಯಲಿದ್ದು, ನವಂಬರ್ 2ಕ್ಕೆ ಎಣಿಕೆ ಕಾರ್ಯ ಜರುಗಲಿದೆ. ಅಸ್ಸಾಂನ 5, ಪಶ್ಚಿಮ ಬಂಗಾಳ 4, ಮೇಘಾಲಯ, ಮಧ್ಯಪ್ರದೇಶ, ಹಿಮಾಚಲ ಪ್ರದೇಶಗಳಲ್ಲಿ ತಲಾ ಮೂರು, ರಾಜಸ್ಥಾನ, ಬಿಹಾರ ಮತ್ತು ಕರ್ನಾಟಕಗಳಲ್ಲಿ ತಲಾ ಎರಡು, ಆಂಧ್ರಪ್ರದೇಶ, ಹರಿಯಾಣ, ಮಹಾರಾಷ್ಟ್ರ, ಮಿಜೋರಾಂ, ನಾಗಾಲ್ಯಾಂಡ್, ತೆಲಂಗಾಣಗಳಲ್ಲಿ ತಲಾ ಒಂದು ಕ್ಷೇತ್ರಗಳಿಗೆ ಉಪಚುನಾವಣೆ ನಡೆಯಲಿದೆ. ಸದಸ್ಯರ ನಿಧನ ಅಥವಾ ರಾಜೀನಾಮೆಯಿಂದಾಗಿ ಈ ಕ್ಷೇತ್ರಗಳ ತೆರವಾಗಿದ್ದವು. ಕರೊನಾ ಪ್ರಕರಣ ಕಡಿಮೆ ಆಗಿರುವುದರಿಂದ ಚುನಾವಣೆ ನಡೆಸಲು ಇದು ಸೂಕ್ತಕಾಲ. ಆದರೂ ಕರೊನಾ ಮಾರ್ಗದರ್ಶಿಯಂತೆ ಎಲ್ಲ ಮುನ್ನೆಚ್ಚರಿಕೆ ವಹಿಸಲಾಗುವುದು ಎಂದು ಆಯೋಗ ಹೇಳಿದೆ. ಸೆ.4ರಂದು ಪಶ್ಚಿಮ ಬಂಗಾಳದ ಭವಾನಿಪುರ ಸೇರಿ ಮೂರು ಮತ್ತು ಒಡಿಶಾದ ಒಂದು ಕ್ಷೇತ್ರಕ್ಕೆ ಆಯೋಗ ಉಪಚುನಾವಣೆ ಘೋಷಿಸಿತ್ತು. ಇಲ್ಲಿ ಸೆ. 30ಕ್ಕೆ ಮತದಾನ ನಡೆಯಲಿದೆ.
