ಆ ಜೋಡಿ ಆರ್ಡರ್ ಮಾಡಿದ್ದು ಪೋರ್ಕ್​ ಕರಿಗೆ- ತಿನ್ನೋದಕ್ಕೆ ಸಿಕ್ಕಿದ್ದು ಮನುಷ್ಯನ ಹಲ್ಲು!

ಲಂಡನ್​: ಪೋರ್ಕ್​ ಕರಿ ತಿನ್ನಬೇಕು ಎಂಬ ಆಸೆಯಿಂದ ಆ ಜೋಡಿ ಚೀನೀಸ್ ರೆಸ್ಟೋರೆಂಟ್​ಗೆ ಕರೆ ಮಾಡಿ ಆರ್ಡರ್ ಮಾಡಿತ್ತು. ಕೆಲವೇ ನಿಮಿಷಗಳಲ್ಲಿ ಮನೆ ಬಾಗಿಲಿಗೆ ಪೋರ್ಕ್​ ಕರಿಯ ಪ್ಯಾಕ್ ಕೂಡ ಬಂತು. ಖುಷಿಯಿಂದ ಊಟಕ್ಕೆ ಕುಳಿತ ಆ ಜೋಡಿಗೆ ಪೋರ್ಕ್​ ಕರಿ ಆಘಾತವನ್ನೇ ನೀಡಿತು. ಪೋರ್ಕ್​ ಕರಿಯನ್ನು ಪ್ಯಾಕ್​ನಿಂದ ಕಪ್​ಗೆ ಸುರಿದಾಗ ಅಲ್ಲಿ ಕಾಣಿಸಿದ್ದು ಮನುಷ್ಯನ ಹಲ್ಲು!

ಕೂಡಲೇ ರೆಸ್ಟೋರೆಂಟ್​ಗೆ ಕರೆ ಮಾಡಿದ ಜೋಡಿ, ಸ್ಥಳೀಯ ಆಹಾರ ಅಧಿಕಾರಿಗಳಿಗೂ ದೂರು ನೀಡಿದರು. ಪೋರ್ಕ್ ಕರಿಯಲ್ಲಿದ್ದ ಮನುಷ್ಯನ ಹಲ್ಲು ಎಲ್ಲರ ಕುತೂಹಲದ ಕೇಂದ್ರ ಬಿಂದುವಾಗಿತ್ತು. ಕೂಡಲೇ ಅಧಿಕಾರಿಗಳು ರೆಸ್ಟೋರೆಂಟ್​ಗೆ ತೆರಳಿದರು. ಅಲ್ಲಿ ಎಲ್ಲವನ್ನೂ ಪರಿಶೀಲಿಸಿದರು. ಆಹಾರ ಸುರಕ್ಷತೆಯ ಎಲ್ಲ ನಿಯಮಗಳನ್ನೂ ರೆಸ್ಟೋರೆಂಟ್ ಪಾಲಿಸುತ್ತಿರುವುದು ಕಂಡುಬಂತು. ಪೋರ್ಕ್ ಕರಿಯಲ್ಲಿ ಹಲ್ಲು ಹೇಗೆ ಬಂತು ಎಂಬ ಪ್ರಶ್ನೆಗೆ ಉತ್ತರ ಕಂಡು ಹುಡುಕುವ ಪ್ರಯತ್ನ ಮುಂದುವರಿಯಿತು.

ರೆಸ್ಟೋರೆಂಟ್​ನ ಎಲ್ಲ ಸಿಬ್ಬಂದಿಗಳ ಹಲ್ಲುಗಳಿವೆಯೇ ಎಂದೂ ಪರಿಶೀಲಿಸಲಾಯಿತು. ಯಾರ ಹಲ್ಲೂ ಬಿದ್ದು ಹೋಗಿಲ್ಲ ಎಂಬುದು ಖಾತ್ರಿಯಾಯಿತು. ಡಿಎನ್​ಎ ಟೆಸ್ಟ್​ಗೂ ಸಿಬ್ಬಂದಿ ರೆಡಿಯಾದ್ರು.ರೆಸ್ಟೋರೆಂಟ್​ ತಪ್ಪೆಸಗಿರುವುದೂ ಸಾಬೀತಾಗಲಿಲ್ಲ. ಹೀಗಾಗಿ ಅದರ ರೇಟಿಂಗ್ 4/5 ಹಾಗೆಯೇ ಉಳಿಯಿತು. ಆದಾಗ್ಯೂ, ರೆಸ್ಟೋರೆಂಟ್​ನವರು ಜೋಡಿಗೆ ಮತ್ತೆ ಉಚಿತವಾಗಿ ಪೋರ್ಕ್​ ಕರಿ ಮತ್ತು ಹಣ ಮರುಪಾವತಿ ಮಾಡಲು ಮುಂದಾಗಿತ್ತು. ಆದರೆ ಆ ಜೋಡಿ ಅದನ್ನು ನಿರಾಕರಿಸಿತು. ಅಂದ ಹಾಗೆ, ಈ ಜೋಡಿ ಹೆಸರು ಸ್ಟೀಫನ್​ ಮೆಕ್​ಡೊನಾಗ್​ ಮತ್ತು ಡೇವಿಡ್​ ಬರ್ರೋವ್ಸ್​. ರೆಸ್ಟೋರೆಂಟ್ ಹೆಸರು ನ್ಯೂಟೌನ್​ ಕ್ಯಾನ್ಟೋಸ್ಸ್​ ಟೇಕ್​ಅವೇ. ಕೊನೆಗೂ ಹಲ್ಲು ಯಾರದ್ದು ಎಂಬ ಪ್ರಶ್ನೆಗೆ ಉತ್ತರ ಸಿಗಲಿಲ್ಲ. ಆ ಹಲ್ಲು ಯಕ್ಷ ಪ್ರಶ್ನೆಯಾಗಿಯೇ ಉಳಿಯಿತು! (ಏಜೆನ್ಸೀಸ್​)