50 ಸಾವಿರ ಸನಿಹ ಕರೊನಾ: ಅಪಾಯದಂಚಲ್ಲಿ ರಾಜ್ಯ

ಬೆಂಗಳೂರು: ಕರೊನಾ ಅಪಾಯದ ಕುರಿತಂತೆ ತಜ್ಞರು ನೀಡಿದ ಎಚ್ಚರಿಕೆ ನಿಜವಾಗಿದ್ದು, ಜುಲೈ ಕಳೆಯುವುದಕ್ಕೆ ಮೊದಲೇ ರಾಜ್ಯದಲ್ಲಿ ಕರೊನಾ ಸೋಂಕಿತರ ಸಂಖ್ಯೆ 50 ಸಾವಿರ ಹಾಗೂ ಸಾವಿನ ಸಂಖ್ಯೆ 1 ಸಾವಿರದ ಸನಿಹಕ್ಕೆ ಬಂದಿದೆ. ರಾಜ್ಯದಲ್ಲಿ ಬುಧವಾರ ಒಂದೇ ದಿನ ಅತಿ ಹೆಚ್ಚು 3,176 ಪ್ರಕರಣ ಬೆಳಕಿಗೆ ಬಂದಿದ್ದು, 87 ಮಂದಿ ಸಾವನ್ನಪ್ಪಿದ್ದಾರೆ. ಈಗ ಸೋಂಕು ಹರಡುತ್ತಿರುವ ತೀವ್ರತೆ ಗಮನಿಸಿದರೆ ಮಾಸಾಂತ್ಯಕ್ಕೆ ಸೋಂಕಿತರ ಸಂಖ್ಯೆ 80 ಸಾವಿರ ಗಡಿ ದಾಟುವ ಅಂದಾಜಿದೆ.

ಸೋಂಕಿನ ಸರಪಳಿ ಕತ್ತರಿಸಲು ಬೆಂಗಳೂರು ಸೇರಿದಂತೆ ಹಲವು ಜಿಲ್ಲೆಗಳಲ್ಲಿ ಮತ್ತೆ ಲಾಕ್​ಡೌನ್ ಘೋಷಿಸಿದ್ದರೂ ಒಟ್ಟಾರೆ ಪ್ರಕರಣಗಳ ಸಂಖ್ಯೆ ಏರುತ್ತಲೇ ಇದೆ. ರಾಜಧಾನಿ ಬೆಂಗಳೂರಿನಲ್ಲಿ ಬುಧವಾರ 1975 ಕೇಸ್​ಗಳು ದಾಖಲಾಗಿವೆ. ಇದರೊಂದಿಗೆ ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ 47,253ಕ್ಕೆ ತಲುಪಿದರೆ 87 ಮಂದಿ ಸಾವಿನೊಂದಿಗೆ ಮೃತರ ಸಂಖ್ಯೆ 928ಕ್ಕೆ ಏರಿಕೆಯಾಗಿದೆ. ಗುರವಾರವೂ ಇಷ್ಟೇ ಸಂಖ್ಯೆಯಲ್ಲಿ ಪ್ರಕರಣಗಳು ಬಂದರೆ ಸಂಖ್ಯೆ 50 ಸಾವಿರ ದಾಟಲಿದ್ದು, ಸಾವಿನ ಸಂಖ್ಯೆ 1 ಸಾವಿರ ಮೀರಲಿದೆ. ಗಂಭೀರ ಸಮಸ್ಯೆಯಿಂದ ಬಳಲುತ್ತಿರುವ 597 ಮಂದಿ ತುರ್ತು ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿರುವುದರಿಂದ ಮತ್ತಷ್ಟು ಸಾವು ಸಂಭವಿಸುವ ಆತಂಕವಿದೆ.

ನಿಲ್ಲದ ಸಾವಿನ ಸರಣಿ: ಬೆಂಗಳೂರು ನಗರದಲ್ಲಿ 60, ಮೈಸೂರು 6, ಧಾರವಾಡ 5, ಉತ್ತರ ಕನ್ನಡ ಮತ್ತು ಬಾಗಲಕೋಟೆ ತಲಾ 3, ಚಿಕ್ಕಬಳ್ಳಾಪುರ ಮತ್ತು ರಾಯಚೂರು ತಲಾ 2, ಚಿಕ್ಕಮಗಳೂರು, ತುಮಕೂರು, ರಾಮನಗರ, ಶಿವಮೊಗ್ಗ, ಚಿತ್ರದುರ್ಗ ಮತ್ತು ಮಂಡ್ಯದಲ್ಲಿ ತಲಾ ಒಂದು ಸೇರಿದಂತೆ ಬುಧವಾರ 87 ಸೋಂಕಿತರು ಸಾವನ್ನಪ್ಪಿದ್ದಾರೆ.

ಹೊಸ ಪ್ರಕರಣಗಳು ಎಲ್ಲೆಲ್ಲಿ?

ಬೆಂಗಳೂರು ನಗರದಲ್ಲಿ 1,975, ಧಾರವಾಡ 139, ಬಳ್ಳಾರಿ 136, ಮೈಸೂರು 99, ವಿಜಯಪುರ 80, ದಕ್ಷಿಣ ಕನ್ನಡ 76, ಕಲಬುರಗಿ 67, ಉಡುಪಿ 52, ಯಾದಗಿರಿ 49, ಉತ್ತರ ಕನ್ನಡ 48, ಬೆಳಗಾವಿ 41, ಗದಗ 39, ಬೀದರ್ ಮತ್ತು ದಾವಣಗೆರೆ ತಲಾ 35, ಬಾಗಲಕೋಟೆ 34, ಚಿಕ್ಕಬಳ್ಳಾಪುರ 32, ಮಂಡ್ಯ 31, ಶಿವಮೊಗ್ಗ 29, ರಾಯಚೂರು 26, ಹಾಸನ 25, ತುಮಕೂರು 24, ಕೊಡಗು 23, ಕೋಲಾರ 15, ಕೊಪ್ಪಳ 14, ಚಿಕ್ಕಮಗಳೂರು 13, ಚಿತ್ರದರ್ಗ 12, ಬೆಂಗಳೂರು ಗ್ರಾಮಾಂತರ 10, ಚಾಮರಾಜನಗರ 8, ಹಾವೇರಿ 6, ರಾಮನಗರ 3 ಸೇರಿದಂತೆ 3,176 ಮಂದಿಯಲ್ಲಿ ಸೋಂಕು ದೃಢಪಟ್ಟಿದೆ. 1076 ಮಂದು ಗುಣಮುಖರಾಗಿ ಮನೆಗೆ ತೆರಳಿದ್ದಾರೆ.

ನಿಗಾದಲ್ಲಿರುವವರು - 95,078

ಪರೀಕ್ಷಿಸಿದ ಮಾದರಿಗಳು - 9,02,026

ನೆಗೆಟಿವ್ ವರದಿಗಳು - 8,31,246

ಒಟ್ಟು ಸೋಂಕಿತರು - 47,253

ಮೃತಪಟ್ಟವರು - 928

ಅನ್ಯಕಾರಣದಿಂದ ಸಾವು - 06

ಗುಣಮುಖರಾದವರು - 18,466

ಚಿಕಿತ್ಸೆ ಪಡೆಯುತ್ತಿರುವವರು - 27,853

ಬಾಕಿ ಇರುವ ವರದಿಗಳು - 23,527

ತಜ್ಞರ ಎಚ್ಚರಿಕೆ

ಕರೊನಾ ಸೋಂಕಿತರಿಗೆ ಸರಿಯಾದ ಸಮಯಕ್ಕೆ ಚಿಕಿತ್ಸೆ ಸಿಗುತ್ತಿಲ್ಲ. ಪರೀಕ್ಷೆ ಮಾಡಿಸಿದ 3-4 ದಿನಕ್ಕೆ ವರದಿ ಬರುತ್ತಿದೆ. ವರದಿ ಬಂದ 3-4 ದಿನಕ್ಕೆ ಆಸ್ಪತ್ರೆಗೆ ಕರೆದೊಯ್ಯುವ ಪರಿಸ್ಥಿತಿ ಇದೆ. ಆಸ್ಪತ್ರೆಗಳಲ್ಲಿ ಬೆಡ್​ಗಳು ಸಿಗದೆ ರೋಗಿಗಳು ಪರಿತಪಿಸುವಂತಾಗಿದೆ. ಈಗಲೇ ಪ್ರಕರಣಗಳ ಒತ್ತಡ ನಿರ್ವಹಿಸಲಾಗದಂತಿರುವಾಗ ಕೇಸ್​ಗಳ ಸಂಖ್ಯೆ ಇನ್ನಷ್ಟು ಹೆಚ್ಚಿದರೆ ಕೈಚೆಲ್ಲುವುದು ನಿಶ್ಚಿತ ಎಂದೂ ತಜ್ಞರು ಎಚ್ಚರಿಕೆ ಕೊಟ್ಟಿದ್ದಾರೆ.

ಹೊಸ ಮಾರ್ಗಸೂಚಿ (ಕೈಗಾರಿಕೆ, ಉದ್ಯಮಕ್ಕೆ ಸೀಮಿತ)

• ಸರಕುಗಳ ಸಾಗಣೆ, ನೌಕರರ ಚಲನೆ, ಕಾರ್ಯಾಚರಣೆಗಳು ಮತ್ತು ಇತರ ಸಮಸ್ಯೆಗಳಿಗೆ ಸಂಬಂಧಿಸಿದ ಕುಂದುಕೊರತೆ ಪರಿಹರಿಸಿ ನೆರವು ನೀಡುವುದು
• ಇ-ಕಾಮರ್ಸ್ ಕಂಪನಿಗಳಿಗೆ ಬೆಳಗ್ಗೆ 5ರಿಂದ ರಾತ್ರಿ 8 ರವರೆಗೆ ಮಾತ್ರ ಕಾರ್ಯನಿರ್ವಹಿಸಲು ಅವಕಾಶ
• ಆಹಾರ, ಗೃಹ ವಿತರಣಾ (ಹೋಮ್ ಡೆಲಿವರಿ) ಕಂಪನಿಗಳು ಬೆಳಗ್ಗೆ 5 ರಿಂದ ರಾತ್ರಿ 10 ರವರೆಗೆ ಕಾರ್ಯನಿರ್ವಹಿಸಬಹುದು
• ಬ್ಯಾಂಕುಗಳಿಗೆ ಆಗಸ್ಟ್ ಮಧ್ಯದ ತನಕ ಶನಿವಾರ ರಜೆ ಘೊಷಣೆ, 2020 ರ ಆ.2 ನೇ ವಾರದವರೆಗೆ ಎಲ್ಲ ಶನಿವಾರದಂದು ಮುಚ್ಚಲ್ಪಡುತ್ತವೆ. ಅಂದರೆ 2 ಮತ್ತು 4ನೇ ಶನಿವಾರದಂದು ಅಸ್ತಿತ್ವದಲ್ಲಿರುವ ರಜಾದಿನಗಳಿಗೆ ಹೆಚ್ಚುವರಿಯಾಗಿ ಈ ರಜೆ ಘೊಷಿಸಲಾಗಿದೆ.

ಕ್ವಾರಂಟೈನ್ ಕಟ್ಟುನಿಟ್ಟು (ಆರೋಗ್ಯ ಇಲಾಖೆ ಮಾರ್ಗಸೂಚಿ)

• ಸೋಂಕು ಲಕ್ಷಣ ಬಹಿರಂಗವಾಗಿ ಗೋಚರಿಸದ ಹಾಗೂ ಪ್ರಾರಂಭಿಕ ಲಕ್ಷಣಗಳಿಂದ ಬಳಲುತ್ತಿರುವ 50 ವರ್ಷದೊಳಗಿನವರಿಗೆ ಮನೆ ಆರೈಕೆಗೆ ಸೂಚನೆ
• ಮನೆಯಲ್ಲಿ ಕಡ್ಡಾಯವಾಗಿ ವೈದ್ಯಕೀಯ ಮಾಸ್ಕ್ ಅಥವಾ ಎನ್-95 ಮಾಸ್ಕ್ ಧರಿಸಬೇಕು
• ಕೆಮ್ಮುವಾಗ ಮತ್ತು ಸೀನುವಾಗ ಮೊಣಕೈ ಅಡ್ಡವಿಟ್ಟುಕೊಳ್ಳಬೇಕು. ಕರವಸ್ತ್ರ ಅಥವಾ ಟಿಶ್ಯೂ ಪೇಪರ್​ಗಳನ್ನು ಬಳಸಬೇಕು
• ಪ್ರತಿ 8 ಗಂಟೆಗಳಿಗೆ ಮಾಸ್ಕ್ ಅನ್ನು ಸೋಡಿಯಂ ಹೈಪ್ಲೋ-ಕ್ಲೋರೈಡ್ ದ್ರಾವಣ ಬಳಸಿ ವಿಲೇವಾರಿ ಮಾಡಬೆಕು.
• ನಿಗದಿತ ಕೋಣೆಯಲ್ಲಿಯೇ ಉಳಿದು, ಇತರರೊಂದಿಗೆ 2 ಮೀಟರ್ ಅಂತರ ಕಾಯ್ದುಕೊಳ್ಳಬೇಕು. * ಪ್ರತಿನಿತ್ಯ ಕನಿಷ್ಠ 2 ಲೀಟರ್ ಬಿಸಿ ಅಥವಾ ಕಾಯಿಸಿ ಆರಿಸಿದ ನೀರನ್ನು ಕುಡಿಯಬೇಕು
• ಕನಿಷ್ಠ 40 ಸೆಕೆಂಡ್ ಸಾಬೂನಿನಿಂದ ಕೈ ಸ್ವಚ್ಛ ಮಾಡಿಕೊಳ್ಳಬೇಕು.
• ವೈಯಕ್ತಿಕ ವಸ್ತುಗಳಾದ ಟವೆಲ್, ಪಾತ್ರೆಗಳನ್ನು ಯಾರೊಂದಿಗೂ ಹಂಚಿಕೊಳ್ಳಬಾರದು
• ಕೋಣೆಗಳನ್ನು ಆಗಾಗ ಸೋಂಕು ನಿವಾರಕ ದ್ರಾವಣದಿಂದ ಸ್ವಚ್ಛಪಡಿಸುತ್ತಿರಬೇಕು
• ಸ್ನಾನಗೃಹ ಹಾಗೂ ಶೌಚಗೃಹವನ್ನು ದಿನಕ್ಕೆ ಒಮ್ಮೆಯಾದರೂ ಸ್ವಚ್ಛಪಡಿಸಬೇಕು
• ಪ್ರತಿದಿನ ಪಲ್ಸ್ ಆಕ್ಸಿಮೀಟರ್ ಮತ್ತು ಡಿಜಿಟಲ್ ಥರ್ವ ಮೀಟರ್​ನಿಂದ ಆರೋಗ್ಯ ತಪಾಸಣೆ ಮಾಡಿಕೊಳ್ಳಬೇಕು
• ಆರೋಗ್ಯಕರ ಮತ್ತು ಪೌಷ್ಟಿಕ ಆಹಾರ ಸೇವಿಸಬೇಕು
• ಧೂಮಪಾನ, ತಂಬಾಕು, ಮದ್ಯ ಸೇವನೆ ಮಾಡಬಾರದು
• ಹೆಚ್ಚಿನ ಮಾಹಿತಿಗಾಗಿ ಆಪ್ತಮಿತ್ರ ಸಹಾಯವಾಣಿ 14410ಗೆ ಕರೆ ಮಾಡಿ