ಶಾಸಕರ ಭವನಕ್ಕೆ ಕರೊನಾ ಆತಂಕ; ಇಡೀ ಕಟ್ಟಡ ಸ್ಯಾನಿಟೈಸ್​, ಅನಗತ್ಯ ಪ್ರವೇಶ ನಿರ್ಬಂಧ

ಬೆಂಗಳೂರು: ಶಾಸಕರ ಭವನದ ಆವರಣದಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಕೆಲವು ಪೊಲೀಸರು, ಮತ್ತಿತರರಲ್ಲಿ ಕರೊನಾ ಸೋಂಕು​ ದೃಢಪಟ್ಟ ಹಿನ್ನೆಲೆಯಲ್ಲಿ ಇಂದು ಶಾಸಕರ ಭವನವನ್ನು ಸಂಪೂರ್ಣವಾಗಿ ಸ್ಯಾನಿಟೈಸ್​ ಮಾಡಲಾಗಿದೆ. ಕಟ್ಟಡಕ್ಕೆ ತುರ್ತು ಸೋಂಕು ನಿವಾರಣಾ ಔಷಧಿ ಸಿಂಪಡಿಸಲಾಯಿತು.

ಶಾಸಕರ ಭವನಕ್ಕೆ ಕರೊನಾ ಕಾಲಿಟ್ಟ ಬೆನ್ನಲ್ಲೇ ವಿಧಾನಸಭೆ ಅಧ್ಯಕ್ಷರು ಮತ್ತು ವಿಧಾನ ಪರಿಷತ್​ ಸಭಾಪತಿಯವರ ಜಂಟಿ ಅಧ್ಯಕ್ಷತೆಯಲ್ಲಿ ಸಭೆ ನಡೆಸಿ, ನಿಯಂತ್ರಣಾ ಕ್ರಮಗಳ ಬಗ್ಗೆ ಚರ್ಚಿಸಲಾಗಿದೆ. ಶಾಸಕರ ಭವನದ ಪ್ರವೇಶಕ್ಕೆ ನಿರ್ಬಂಧಗಳನ್ನು ವಿಧಿಸಲಾಗಿದೆ. ಇದನ್ನೂ ಓದಿ:ಮನೆ ತೊರೆದಿದ್ದ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿನಿಗೆ ಪರೀಕ್ಷೆ ಬರೆಯಲು ನೆರವಾದ ‘ವಿಜಯವಾಣಿ’ 

ಇನ್ನು ಮುಂದೆ ಶಾಸಕರ ಭವನಕ್ಕೆ ಬರುವವರು ಮುಖ್ಯದ್ವಾರದಲ್ಲಿ ಇಡಲಾದ ಪಟ್ಟಿಯಲ್ಲಿ ತಮ್ಮ ಹೆಸರು, ಫೋನ್​ ನಂಬರ್, ಭೇಟಿಯ ಉದ್ದೇಶಗಳನ್ನು ಕಡ್ಡಾಯವಾಗಿ ನಮೂದಿಸಬೇಕು. ಪ್ರಾಥಮಿಕ ವೈದ್ಯಕೀಯ ತಪಾಸಣೆಗೆ ಸಹಕರಿಸಬೇಕು.

ಹಾಗೇ ಭವನಕ್ಕೆ ಆಗಮಿಸುವ ಶಾಸಕರೊಂದಿಗೆ ಅವರ ಆಪ್ತಸಹಾಯಕ, ಕಾರು ಚಾಲಕ ಮತ್ತು ಅಂಗರಕ್ಷಕರು ಮಾತ್ರ ಬರಬಹುದು. ಪಾರ್ಕಿಂಗ್​ ಸ್ಥಳದಲ್ಲಿ ಶಾಸಕರ ವಾಹನಗಳನ್ನು ಮಾತ್ರ ನಿಲ್ಲಿಸಬಹುದು. ಇದನ್ನೂ ಓದಿ: ಪಾಕಿಸ್ತಾನದಲ್ಲಿ ಶೇ.30ರಷ್ಟು ನಕಲಿ ಪೈಲಟ್​​ಗಳು…ಹಣ ಕೊಟ್ಟು ಲೈಸನ್ಸ್​ ಪಡೆದವರು !

ಶಾಸಕರ ಭವನದಲ್ಲಿರುವ ಎಲ್ಲ ಸಿಬ್ಬಂದಿಯನ್ನೂ ಕೊವಿಡ್​-19 ಟೆಸ್ಟ್​ಗೆ ಒಳಪಡಿಸಲಾಗುವುದು. ಹಾಗೂ ಯಾರಾದರೂ ಅಲ್ಲಿ ಅನಗತ್ಯವಾಗಿ ವಾಸವಾಗಿದ್ದರೆ, ಅವರನ್ನು ಅಲ್ಲಿಂದ ಕಳಿಸಲಾಗುವುದು ಹಾಗೂ ಸಾಮಾಜಿಕ ಅಂತರ ನಿಯಮ, ಮಾಸ್ಕ್​ ಧರಿಸುವುದನ್ನೆಲ್ಲ ಕಡ್ಡಾಯವಾಗಿ ಪಾಲಿಸಬೇಕು ಎಂಬ ನಿರ್ಣಯಗಳನ್ನು ಇಂದಿನ ಸಭೆಯಲ್ಲಿ ಕೈಗೊಳ್ಳಲಾಗಿದೆ.