ಬೆಂಗಳೂರು ಪೊಲೀಸ್​ ಬಳಿಕ ಅಗ್ನಿಶಾಮಕ ದಳಕ್ಕೂ ವಕ್ಕರಿಸಿದ ಕರೊನಾ

ಬೆಂಗಳೂರು: ರಾಜ್ಯ ರಾಜಧಾನಿ ಈಗ ಕರೊನಾ ರಾಜಧಾನಿಯಾಗುವತ್ತ ದಾಪುಗಾಲು ಇಟ್ಟಿದೆ. ಇದುವರೆಗೆ ಬೆಂಗಳೂರು ನಗರ ಪೊಲೀಸ್​, ಬಿಎಂಟಿಸಿ, ವಿಕಾಸಸೌಧದಲ್ಲಿ ಕಾಣಿಸಿಕೊಂಡಿದ್ದ ಕರೊನಾ ಸೋಂಕು ಈಗ ಅಗ್ನಿಶಾಮಕದಳಕ್ಕೂ ಹಬ್ಬಿದೆ.

ಬೆಂಗಳೂರು ನಗರದ ಅಗ್ನಿಶಾಮಕದಳದ ನಿಯಂತ್ರಣ ಕೊಠಡಿಯಲ್ಲಿ ಕೆಲಸ ಮಾಡುವ ನೌಕರರೊಬ್ಬರಿಗೆ ಕರೊನಾ ಸೋಂಕು ತಗುಲಿದೆ. ಈ ಹಿನ್ನೆಲೆಯಲ್ಲಿ ಆ ನೌಕರರನ್ನು ಅಗ್ನಿಶಾಮಕದಳದ ಕ್ವಾರ್ಟರ್ಸ್​ನಲ್ಲೇ ಕ್ವಾರಂಟೈನ್​ ಮಾಡಲು ಕ್ರಮ ಕೈಗೊಳ್ಳಲಾಗುತ್ತಿದೆ.

ಇದೀಗ ಕಂಟ್ರೋಲ್​ ರೂಂ ಅನ್ನು ಸೀಲ್​ ಡೌನ್​ ಮಾಡದಿರಲು ನಿರ್ಧರಿಸಲಾಗಿದೆ. ಸದ್ಯ ಅಲ್ಲಿ ಸ್ಯಾನಿಟೈಸಿಂಗ್​ ಕಾರ್ಯ ಕೈಗೊಳ್ಳಲಾಗಿದೆ. ಅಲ್ಲಿ ನಿಯೋಜನೆಗೊಂಡಿದ್ದ ಸಿಬ್ಬಂದಿಯನ್ನು ಕ್ವಾರಂಟೈನ್​ಗೆ ಒಳಪಡಿಸಲು ನಿರ್ಧರಿಸಲಾಗಿದ್ದು, ಅನ್ಯ ಸಿಬ್ಬಂದಿಯ ನೆರವಿನಿಂದ ಕಂಟ್ರೋಲ್​ ರೂಂನ ಕಾರ್ಯಾಚರಣೆ ಮುಂದುವರಿಸುವುದಾಗಿ ಅಗ್ನಿಶಾಮಕದಳದ ಎಡಿಜಿಪಿ ಸುನಿಲ್​ ಅಗರ್​ವಾಲ್​ ತಿಳಿಸಿದ್ದಾರೆ.

https://www.vijayavani.net/details-abour-favivipiravir-tablets-fabiflu/