ಅರೆಬರೆ ಬೆಂದ ಶವಗಳನ್ನು ಯಮುನಾ ನದಿಗೆ ಎಸೆದರು! ಒಂದೇ ಸ್ಥಳದಲ್ಲಿ ಸಿಕ್ತು 7 ಹೆಣ

ಲಖನೌ: ಕರೊನಾ ಎರಡನೇ ಅಲೆ ಜನರ ಜೀವನವನ್ನು ಸಂಪೂರ್ಣವಾಗಿ ಹಾಳುಗೆಡವಿದೆ. ಸಾವಿರಾರು ಜನರು ಸೋಂಕಿನಿಂದಾಗಿ ಸಾವನ್ನಪ್ಪಲಾರಂಭಿಸಿದ್ದಾರೆ. ಮೃತರ ಅಂತ್ಯಸಂಸ್ಕಾರ ಮಾಡುವುದೇ ದೊಡ್ಡ ಸಮಸ್ಯೆಯಾಗಿದೆ. ಹೀಗಿರುವಾಗ ಅರೆಬರೆ ಬೆಂದ ದೇಹಗಳನ್ನು ಯಮುನಾ ನದಿಗೆ ಎಸೆದಿರುವ ಘಟನೆ ನಡೆದಿದೆ.

ಉತ್ತರಪ್ರದೇಶದ ಹಮೀರ್ಪುರದಲ್ಲಿ ಇಂತದ್ದೊಂದು ಘಟನೆ ನಡೆದಿದೆ. ಗ್ರಾಮದ ಜನರು ನದಿಯಲ್ಲಿ ಶವಗಳು ತೇಲುವುದು ಕಂಡು ಪೊಲೀಸರಿಗೆ ಕರೆ ಮಾಡಿ ವಿಚಾರ ತಿಳಿಸಿದ್ದಾರೆ. ನಂತರ ಸ್ಥಳಕ್ಕೆ ಬಂದ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಒಂದೇ ಸ್ಥಳದಲ್ಲಿ ಸುಮಾರು ಏಳು ಶವಗಳು ತೇಲುತ್ತಿದ್ದುದ್ದಾಗಿ ಹೇಳಲಾಗಿದೆ. ಸೋಂಕಿತರ ದೇಹ ನದಿಯಲ್ಲಿ ತೇಲುತ್ತಿರುವ ಗ್ರಾಮಸ್ಥರು ಗಾಬರಿಗೊಂಡಿದ್ದಾರೆ.

ಸಾಮಾನ್ಯವಾಗಿ ಯಮುನಾ ನದಿಯಲ್ಲಿ ಒಂದೆರಡು ಶವ ತೇಲುವ ದೃಶ್ಯ ಆಗಾಗ ಕಾಣುತ್ತಿರುತ್ತದೆ. ಆದರೆ ಈಗ ಹಮೀರ್ಪುರ ಮತ್ತು ಸುತ್ತಮುತ್ತಲಿನ ಪ್ರದೇಶದಲ್ಲಿ ಸೋಂಕು ಹೆಚ್ಚಾದ ಹಿನ್ನೆಲೆಯಲ್ಲಿ ಈ ರೀತಿಯಾಗಿದೆ. ಅಂತ್ಯಸಂಸ್ಕಾರ ಮಾಡುವವರ ನಿರ್ಲಕ್ಷ್ಯದಿಂದ ಹೀಗಾಗಿರುವುದಾಗಿ ಹೇಳಲಾಗಿದೆ. (ಏಜೆನ್ಸೀಸ್)