ತರಕಾರಿ ಮಾರ್ಕೆಟ್​ನಲ್ಲಿ ಗುಂಪಾಗಿ ನಿಂತವರ ಬಳಿ ಹೋಗಿ ಕರ್ಫ್ಯೂ ಪಾಸ್​ ಕೇಳಿದ್ದಕ್ಕೆ ಪೊಲೀಸ್ ಅಧಿಕಾರಿಯ ಕೈ ಕಟ್​; ಇನ್ನಿಬ್ಬರಿಗೆ ಗಂಭೀರ ಗಾಯ

ಪಟಿಯಾಲಾ: ಪಂಜಾಬ್​ನ ಪಟಿಯಾಲಾದ ಸಾನುರ್ ತರಕಾರಿ ಮಾರ್ಕೆಟ್​ನಲ್ಲಿ ನಿಹಾಂಗ್ಸ್​ ಗುಂಪೊಂದು ಪೊಲೀಸರ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದೆ.

ಲಾಕ್​ಡೌನ್​ ನಿಯಮ ಉಲ್ಲಂಘಿಸಿ ತರಕಾರಿ ಮಾರುಕಟ್ಟೆಯಲ್ಲಿ ಗುಂಪುಗೂಡಿದ್ದರು. ಪೊಲೀಸರು ಅವರ ಬಳಿ ಹೋಗಿ ಕರ್ಫ್ಯೂ ಪಾಸ್​ ತೋರಿಸುವಂತೆ ಕೇಳಿದ್ದಾರೆ. ಆದರೆ ಈ ಗುಂಪು ಪಾಸ್​ ತೋರಿಸದೆ, ಐರನ್​ ರಾಡ್​, ಕತ್ತಿಗಳಿಂದ ಪೊಲೀಸರ ಮೇಲೆ ಹಲ್ಲೆ ನಡೆಸಿದ್ದಾರೆ. ತಮ್ಮ ವಾಹನಗಳಿಂದ ಬ್ಯಾರಿಕೇಡ್​ಗಳಿಗೆ ಮತ್ತು ಮಾರ್ಕೆಟ್​ನ ಗೇಟ್​​ಗಳಿಗೆ ಡಿಕ್ಕಿ ಮಾಡಿ ನುಜ್ಜುಗುಜ್ಜು ಮಾಡಿದ್ದಾರೆ ಎಂದು ಪಟಿಯಾಲಾ ಎಸ್​ಎಸ್​ಪಿ ಮಂದೀಪ್​ ಸಿಂಗ್ ಸಿಧು ತಿಳಿಸಿದ್ದಾರೆ.

ಅಸಿಸ್ಟಂಟ್​ ಸಬ್​ ಇನ್ಸ್​ಪೆಕ್ಟರ್​ ಕೈಯನ್ನು ಕತ್ತಿಯಿಂದ ಕತ್ತರಿಸಿದ್ದಾರೆ. ಇನ್ನಿಬ್ಬರು ಪೊಲೀಸ್ ಅಧಿಕಾರಿಗಳೂ ಕೂಡ ಗಂಭೀರ ಗಾಯಗೊಂಡಿದ್ದಾರೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಇವರೆಲ್ಲ ತರಕಾರಿ ಖರೀದಿಗಾಗಿ ಮಾರುಕಟ್ಟೆಗೆ ಬಂದಿದ್ದರು. ಆದರೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ ಗುಂಪಾಗಿ ನಿಂತಿದ್ದರು. ಅಲ್ಲಿ ಮೇಲ್ವಿಚಾರಣೆಯಲ್ಲಿ ತೊಡಗಿದ್ದ ಮಂಡಿ ಬೋರ್ಡ್​ ಅಧಿಕಾರಿಗಳು ಅವರನ್ನು ಪ್ರಶ್ನೆ ಮಾಡಿದರು. ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ, ಸರದಿಯಲ್ಲಿ ನಿಲ್ಲದೆ ಇದ್ದರೆ ಯಾವ ತರಕಾರಿಯನ್ನೂ ಕೊಳ್ಳಲು ಬಿಡುವುದಿಲ್ಲ ಎಂದು ಹೇಳಿದರು. ಆಗ ಗಲಾಟೆ ಶುರುವಾಯಿತು. ಕರ್ತವ್ಯದಲ್ಲಿದ್ದ ಪೊಲೀಸರು ಹೋಗಿ ಗುಂಪಿನಲ್ಲಿದ್ದವರ ಬಳಿ ಕರ್ಫ್ಯೂ ಪಾಸ್​ ತೋರಿಸಲು ಕೇಳಿದರು. ಅಷ್ಟಕ್ಕೇ ಹೀಗೆ ಹಲ್ಲೆ ನಡೆಸಿದ್ದಾರೆ ಎಂದು ಪೊಲೀಸ್​ ಮೂಲಗಳು ತಿಳಿಸಿವೆ.

ಸದ್ಯ ಆ ಗುಂಪಿನಲ್ಲಿದ್ದ ಎಲ್ಲರ ವಿರುದ್ಧ ಕೊಲೆ ಯತ್ನ ಆರೋಪದಡಿ ಪ್ರಕರಣ ದಾಖಲಾಗಿದೆ. (ಏಜೆನ್ಸೀಸ್​)