ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಮಣಿಪುರಕ್ಕೆ ಕೇವಲ 5 ಗಂಟೆಗಳ ಅವಧಿಗೆ ಭೇಟಿ ನೀಡಿದ್ದಾರೆ. ಇದು ಪಿಟ್ ಸ್ಟಾಪ್ ಭೇಟಿ ಇದ್ದಂತೆ ಎಂದು ಕಾಂಗ್ರೆಸ್ ಟೀಕೆ ಮಾಡಿದೆ. ‘ನರೇಂದ್ರ ಮೋದಿ ಜೀ ಮಣಿಪುರದಲ್ಲಿ ನಿಮ್ಮ ಮೂರು ಗಂಟೆಗಳ ಪಿಟ್ ಸ್ಟಾಪ್ ಒಂದು ಪ್ರಹಸನ, ಹಿಂಸಾಚಾರದಿಂದ ಘಾಸಿಗೊಂಡವರಿಗೆ ಮಾಡಿದ ಗಂಭೀರ ಅವಮಾನ. ಇಂಫಾಲ ಮತ್ತು ಚುರಾಚಂದ್ಪುರದಲ್ಲಿ ಇಂದು ನೀವು ನಡೆಸುತ್ತಿರುವ ರೋಡ್ ಶೋ ಶಿಬಿರಗಳಲ್ಲಿ ಜನರ ಕೂಗು ಕೇಳದೆ ಹೇಡಿತನದಿಂದ ತಪ್ಪಿಸಿಕೊಳ್ಳುತ್ತಿರುವ ಪ್ರಯತ್ನವಾಗಿದೆ. 865 ದಿನಗಳ ಹಿಂಸಾಚಾರದಲ್ಲಿ 300 ಜನರು ಮೃತಪಟ್ಟಿದ್ದಾರೆ. 67 ಸಾವಿರಕ್ಕೂ ಹೆಚ್ಚು ಜನರು ಸ್ಥಳಾಂತರಗೊಂಡಿದ್ದಾರೆ. ನೀವು ಇಲ್ಲಿ ಹಿಂಸಾಚಾರ ಆರಂಭವಾದಾಗಿನಿಂದ 46 ವಿದೇಶಿ ಪ್ರವಾಸ ಮಾಡಿದ್ದೀರಿ, ಆದರೆ ಮಣಿಪುರದ ಜನರೊಂದಿಗೆ ಮಾತುಕತೆ ನಡೆಸಲು ಒಂದು ಭೇಟಿ ನೀಡಲು ಆಗಿರಲಿಲ್ಲ’ ಎಂದು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಟೀಕಿಸಿದ್ದಾರೆ.
