ಹೊಸ ಸಾಲಕ್ಕೆ ತೊಡಕು; ಮನ್ನಾ ಲೆಕ್ಕಾಚಾರ ಮಿಸ್​ಮ್ಯಾಚ್​

ಬೆಂಗಳೂರು: ಕರೊನಾ ಸಂಕಷ್ಟದಲ್ಲೂ ಕೃಷಿ ವಲಯ ಚೇತರಿಕೆ ಕಾಣುತ್ತಿದೆ ಎಂಬ ಹೊತ್ತಲ್ಲೇ ರೈತರಿಗೆ ಮತ್ತೊಂದು ಇಕ್ಕಟ್ಟಿನ ಸನ್ನಿವೇಶ ಎದುರಾಗಿದೆ. ಕಾಂಗ್ರೆಸ್ ಸರ್ಕಾರದ ಅವಧಿಯ ರೈತರ ಸಾಲಮನ್ನಾ- ಪ್ರೋತ್ಸಾಹಧನ ವಿಚಾರದಲ್ಲಿ ಗೋಲ್ಮಾಲ್ ಆಗಿದೆ ಎಂಬ ವಿಚಾರವಾಗಿ ಮಾಜಿ ಮುಖ್ಯಮಂತ್ರಿಗಳಿಬ್ಬರ ನಡುವೆ ಮಾತಿನ ಘರ್ಷಣೆ ನಡೆದಿರುವಂತೆಯೇ ಸಾಲಮನ್ನಾ ಮಾಹಿತಿ ‘ಮಿಸ್​ವ್ಯಾಚ್’ ಆಗಿರುವುದು ಬೆಳಕಿಗೆ ಬಂದಿದೆ. ಇದರಿಂದಾಗಿ ಸಾಲಮನ್ನಾ ಲೆಕ್ಕಾಚಾರ ಗೊಂದಲ ಬಗೆಹರಿಯದ ಹೊರತು ರೈತರಿಗೆ ಹೊಸ ಸಾಲ ಪಡೆಯಲಾಗದ ಸ್ಥಿತಿ ನಿರ್ವಣವಾಗಿದೆ.

ಸಾಲಮನ್ನಾ ಲೆಕ್ಕಾಚಾರದ ಏರುಪೇರಿನ ಕುರಿತಂತೆ ಸರ್ಕಾರ ಆರ್ಥಿಕ ಇಲಾಖೆಯಿಂದ ಆಂತರಿಕ ಲೆಕ್ಕಪರಿಶೋಧನಾ ವರದಿ ಪಡೆದುಕೊಳ್ಳುತ್ತಿದ್ದು, ಪರಿಶೀಲನೆ ನಡೆಸಲಿದೆ. ನಂತರ ಸಂಬಂಧಿಸಿದ ಬ್ಯಾಂಕುಗಳಿಗೆ ಸೂಕ್ತ ನಿರ್ದೇಶನ ನೀಡಲು ಚಿಂತನೆ ನಡೆಸಿದೆ. ಸಾಲಮನ್ನಾದಲ್ಲಿ ಗೊಂದಲಗಳಾಗಬಾರದು, ಅನರ್ಹರಿಗೆ ಸಿಗಬಾರದೆಂದು ಮುನ್ನೆಚ್ಚರಿಕೆ ವಹಿಸಲಾಗಿತ್ತಾದರೂ, ಬ್ಯಾಂಕ್ ಮತ್ತು ಸರ್ಕಾರದ ನಡುವೆ ಮಾಹಿತಿ ವಿನಿಮಯದಲ್ಲಿ ವ್ಯತ್ಯಾಸವಾಗಿದೆ.

ರಾಷ್ಟ್ರೀಕೃತ ಬ್ಯಾಂಕ್ ಸೇರಿ ಒಟ್ಟು 35 ಬ್ಯಾಂಕ್ ಮೂಲಕ ಸಾಲಮನ್ನಾ ವ್ಯವಸ್ಥೆ ಜಾರಿ ಮಾಡಲಾಗಿತ್ತು. ಸರ್ಕಾರ, ಬ್ಯಾಂಕ್, ಬ್ಯಾಂಕ್ ಮುಖ್ಯ ಕಚೇರಿ ಹಾಗೂ ಸರ್ಕಾರದ ವಿಶೇಷ ಘಟಕದ ನಡುವೆ ಮಾಹಿತಿ ವಿನಿಮಯ ಸರಿಯಾದ ರೀತಿಯಲ್ಲಿ ಆಗಿಲ್ಲ ಎಂಬುದು ವಿಜಯವಾಣಿಗೆ ಲಭ್ಯವಾದ ದಾಖಲೆ ಪತ್ರಗಳಿಂದ ಖಚಿತವಾಗಿದೆ. ಇದನ್ನೂ ಓದಿ: ‘ವಧು ಇನ್ನೂ ಚೆನ್ನಾಗಿದ್ದಾಳೆ’ ಎಂದ್ರು, ‘ಐ ಲವ್​ ಯೂ’ ಕೂಡ ಅಂದ್ರು ಬಿಲ್​ ಕ್ಲಿಂಟನ್​!

ಇದೀಗ 2018ರ ಸಾಲಮನ್ನಾ ಯೋಜನೆ ಪ್ರಕ್ರಿಯೆಯನ್ನು ಕೊನೆಗೊಳಿಸಲು ಸರ್ಕಾರ ಬಯಸಿದೆ. ಹೀಗಾಗಿ ಸ್ಪಷ್ಟತೆ ತಂದುಕೊಳ್ಳಲು ನಿರಂತರವಾಗಿ ಪ್ರಯತ್ನ ನಡೆಸಿದೆ. ಎರಡು ಮೂರು ಉನ್ನತ ಮಟ್ಟದ ಸಭೆ ನಡೆಸಿದರೂ ತುದಿ ತಲುಪಲು ಸಾಧ್ಯವಾಗಿಲ್ಲ.

ಸಾಲಮನ್ನಾ ಪ್ರಕ್ರಿಯೆ ಆರಂಭಿಸುವ ಮುನ್ನ ಸರ್ಕಾರ ಬ್ಯಾಂಕುಗಳಿಂದ ಅಂಕಿಅಂಶ ಸಂಗ್ರಹಿಸಿ ನೀಲಿನಕ್ಷೆ ಸಿದ್ಧಪಡಿಸಿಕೊಂಡಿತ್ತು. ಬಳಿಕ ಸಾಲ ಪಡೆಯಲು ಅರ್ಹರಾದವರ ಗ್ರೀನ್ ಲಿಸ್ಟ್ ಸಿದ್ಧಮಾಡಿಕೊಂಡು ಹಂತಹಂತವಾಗಿ ಬ್ಯಾಂಕುಗಳಿಗೆ ಹಣ ಬಿಡುಗಡೆ ಮಾಡಿದೆ. ಬ್ಯಾಂಕುಗಳಿಂದ ಸಾಲ ಮನ್ನಾ ಮಾಡಿ ಖಾತೆ ಮುಕ್ತಾಯಗೊಳಿಸಿದ ಮಾಹಿತಿಯನ್ನು ಸರ್ಕಾರ ಬಯಸಿತ್ತು. ಆ ಹಂತದಲ್ಲಿ ಸರಿಯಾದ ಮಾಹಿತಿ ತಲುಪದ ಕಾರಣ ಲೆಕ್ಕಾಚಾರ ಹೊಂದಾಣಿಕೆ ಆಗುತ್ತಿಲ್ಲ.

ಬ್ಯಾಂಕುಗಳಿಗೇನು ಸೂಚನೆ?

ಬೆಳೆ ದತ್ತಾಂಶ ಪೂರಕ ಮಾಹಿತಿ ಒದಗಿಸುವ ಸಂದರ್ಭದಲ್ಲಿ ಖಾತೆಗಳ ತಪ್ಪು ವರ್ಗೀಕರಣದಿಂದ ಆಗಿರುವ ಲೋಪ ಸರಿಪಡಿಸಿ ಅರ್ಹರಿಗೆ ಹಣ ಬಿಡುಗಡೆ ಮಾಡಬೇಕೆಂದು ಸರ್ಕಾರ ಸೂಚಿಸಿದೆ. ಈ ಮೂಲಕ ಪರೋಕ್ಷವಾಗಿ ಬ್ಯಾಂಕ್ ಹಂತದಲ್ಲಿ ಒಂದಷ್ಟು ವ್ಯತ್ಯಾಸವಾಗಿರುವುದು ದೃಢಪಟ್ಟಿದೆ. ಹಾಗೆಯೇ, ಮಾರ್ಗಸೂಚಿ ಪ್ರಕಾರ ಕೈಬಿಟ್ಟುಹೋದ ಅರ್ಹ ಖಾತೆಗಳ ಮಾಹಿತಿಯನ್ನು ತಡಮಾಡದೆ ಇಲಾಖೆ ಗಮನಕ್ಕೆ ತರಲೂ ತಿಳಿಸಲಾಗಿದೆ. ಬ್ಯಾಂಕ್, ಡಿಜಿಎಂ ಹಂತದಲ್ಲೇ ಇನ್ನೂ ಅರ್ಜಿಗಳು ಬಾಕಿ ಇರುವುದು ಸರ್ಕಾರದ ಗಮನಕ್ಕೆ ಬಂದಿದೆ. ನಿಖರ ದತ್ತಾಂಶ ಸರ್ಕಾರ ತಿಳಿಸುವಲ್ಲಿ ವ್ಯತ್ಯಯವಾಗಿದ್ದು, ಇದನ್ನು ಆದ್ಯತೆ ಮೇಲೆ ಬಗೆಹರಿಸಲು ತಿಳಿಸಲಾಗಿದೆ. ಜತೆಗೆ ಲೀಡ್ ಬ್ಯಾಂಕ್ ಮ್ಯಾನೇಜರ್ ಹಾಗೂ ತಹಸೀಲ್ದಾರ್ ಕೂಡ ಪರಸ್ಪರ ಸಹಕಾರದೊಂದಿಗೆ ಬಾಕಿ ಇರುವ ಪ್ರಕರಣಗಳನ್ನು ಆದಷ್ಟು ಬೇಗ ಇತ್ಯರ್ಥಪಡಿಸಲು ಸೂಚಿಸಲಾಗಿದೆ. ‘ಇಲ್ಲಿ ಅವ್ಯವಹಾರ ಆಗಿದೆ ಎಂದು ಹೇಳಲು ಆಗಲ್ಲ. ಅಂಕಿಅಂಶ ವಿನಿಮಯ ಮಾಡಿಕೊಳ್ಳುವಾಗ ವ್ಯತ್ಯಾಸವಾಗಿದೆ. ಅದರನ್ನು ಸರಿಪಡಿಸಲು ಸೂಚಿಸಲಾಗಿದೆ. ಅರ್ಹರಿಗೆ ಯೋಜನೆ ಲಾಭವಾಗಬೇಕು ಎಂಬುದು ಸರ್ಕಾರದ ಆಶಯ. ಅದಕ್ಕೆ ತಕ್ಕಂತೆ ಮಾಹಿತಿ ಬಯಸಿದೆ’ ಎಂದು ಬ್ಯಾಂಕ್ ಹಿರಿಯ ಅಧಿಕಾರಿಯೊಬ್ಬರು ವಿಜಯವಾಣಿಗೆ ತಿಳಿಸಿದ್ದಾರೆ.

ಮಾಹಿತಿ ವ್ಯತ್ಯಾಸ

2018ರಲ್ಲಿ ಕಾಂಗ್ರೆಸ್ ಸರ್ಕಾರ ಇದ್ದಾಗ 9,62,260 ರೈತರಿಗೆ 7241.94 ಕೋಟಿ ರೂ. ಸಾಲ ಮನ್ನಾ ಘೋಷಿಸಲಾಗಿತ್ತು. ಇದರ ಮಾಹಿತಿ ವ್ಯತ್ಯಾಸವಾಗಿರುವುದೀಗ ಸರ್ಕಾರಕ್ಕೆ ತಲೆನೋವಾಗಿದೆ. ಈ ಬೆಳವಣಿಗೆಯಿಂದ ಬ್ಯಾಂಕಿಂಗ್ ವ್ಯವಸ್ಥೆಯಲ್ಲೂ ಗೊಂದಲ ಸೃಷ್ಟಿಯಾಗಿದೆ. ಜತೆಗೆ ರೈತರೂ ಇದರ ಪರಿಣಾಮ ಎದುರಿಸುವಂತಾಗಿದೆ.

ತಪ್ಪು ವರ್ಗೀಕರಣ

• ಕಾಲಮಿತಿಯೊಳಗೆ ಸರ್ಕಾರಕ್ಕೆ ಮಾಹಿತಿ ಒದಗಿಸುವ ಧಾವಂತದಲ್ಲಿ ಬ್ಯಾಂಕುಗಳು ಕೂಡ ಎಡವಿರುವುದು ಕಾಣಿಸಿದೆ
• ಸಾಲಮನ್ನಾ ಅಥವಾ ಪ್ರೋತ್ಸಾಹಧನ ಪಡೆಯಲು ಅರ್ಹರಾದವರು ಪಟ್ಟಿಯಿಂದ ಕೈಬಿಟ್ಟು ಹೋಗಿದ್ದಾರೆ
• ಇದರ ಫಲಾನುಭವಿಯಾಗಲು ಅರ್ಹತೆ ಇಲ್ಲದವರೂ ಲಾಭ ಮಾಡಿಕೊಂಡಿದ್ದಾರೆಂಬ ಸಂಶಯವಿದೆ
• ಸರ್ಕಾರ ಕೋರಿದ ದತ್ತಾಂಶಕ್ಕೂ, ಬ್ಯಾಂಕ್ ನೀಡಿದ ದತ್ತಾಂಶಕ್ಕೂ ಹೊಂದಾಣಿಕೆ ಆಗುತ್ತಿಲ್ಲ
• ಇದೀಗ ಮುಖ್ಯಕಾರ್ಯದರ್ಶಿ ನೇತೃತ್ವದಲ್ಲಿ ಇಲಾಖೆ ಮತ್ತು ಬ್ಯಾಂಕುಗಳ ನಡುವೆ ಸಮನ್ವಯ ನಡೆದಿದೆ

ಬಾಕಿ ಉಳಿದ ಅರ್ಜಿ

2018ರ ಸಾಲಮನ್ನಾ ಯೋಜನೆಯಲ್ಲಿ ಇನ್ನೂ ಲಕ್ಷಕ್ಕೂ ಹೆಚ್ಚು ಅರ್ಜಿ ಬಾಕಿ ಉಳಿದಿವೆ. ಬ್ಯಾಂಕ್ ಹಂತದಲ್ಲೇ 9610 ಉಳಿದಿವೆ. ಡಿಜಿಎಂ ಹಂತದಲ್ಲಿ 1808 ಅರ್ಜಿಗಳಿದ್ದರೆ, ಉಳಿದ ಹಂತಗಳಲ್ಲಿ 106595 ಅರ್ಜಿಗಳು ವಿಲೇವಾರಿಗೆ ಬಾಕಿ ಇವೆ. ಸರ್ಕಾರದ ನಿಯಮ, ಷರತ್ತುಗಳ ಕಾರಣದಿಂದ ಈ ಅರ್ಜಿಗಳನ್ನು ಒಪ್ಪಿಕೊಳ್ಳಲು ಬ್ಯಾಂಕುಗಳಿಗೆ ಸಾಧ್ಯವಾಗಿಲ್ಲ.

https://www.vijayavani.net/hdk-v-s-siddaramaiah/