ಈಗಾಗಲೇ ಎರಡು ಸುತ್ತಿನ ಪೂರ್ವ ತಯಾರಿ ಸಭೆ ನಡೆಸಿರುವ ಕಾಂಗ್ರೆಸ್ ಗೆಲ್ಲುವ ಕುದುರೆಗಳ ಹುಡುಕಾಟದಲ್ಲಿದೆ. ಪ್ರಸ್ತುತ ನಿವೃತ್ತರಾಗುತ್ತಿರುವ 25 ಸದಸ್ಯರ ಪೈಕಿ 14 ಮಂದಿ ಕಾಂಗ್ರೆಸಿಗರಿದ್ದರು. ಈ 14 ಸ್ಥಾನವನ್ನು ಪುನಃ ಗಳಿಸುವ ಜತೆಗೆ ಈ ಸಂಖ್ಯೆಯನ್ನು ಇನ್ನಷ್ಟು ವಿಸ್ತರಿಸುವ ಇರಾದೆ ನಾಯಕರದ್ದಾಗಿದೆ. ಸ್ಪರ್ಧಿಸಲು ಇರುವ 25 ಸ್ಥಾನಕ್ಕೆ 160 ಮಂದಿ ಬೇಡಿಕೆ ಇಟ್ಟಿದ್ದಾರೆ. 2-3 ದಿನಗಳಲ್ಲೇ ಅಭ್ಯರ್ಥಿ ಆಯ್ಕೆಗೆ ಕೈ ನಾಯಕರ ಸಭೆ ನಡೆಯಲಿದ್ದು, ಬಂಡಾಯ ಸೃಷ್ಟಿಯಾಗದಂತೆ ಎಚ್ಚರಿಕೆ ವಹಿಸಲು ಹಿರಿಯ ಮುಖಂಡರಿಗೆ ಜವಾಬ್ದಾರಿ ನೀಡುವ ಸಾಧ್ಯತೆ ಇದೆ. ಬೀದರ್, ವಿಜಯಪುರ, ಉತ್ತರ ಕನ್ನಡ, ಧಾರವಾಡ (ಒಂದು ಸ್ಥಾನ) ರಾಯಚೂರು, ಬಳ್ಳಾರಿ, ಚಿತ್ರದುರ್ಗ, ಶಿವಮೊಗ್ಗ, ದಕ್ಷಿಣ ಕನ್ನಡ (ಒಂದು ಸ್ಥಾನ), ಹಾಸನ, ಕೋಲಾರ, ಮೈಸೂರು (ಒಂದು ಸ್ಥಾನ) ಕಾಂಗ್ರೆಸ್ ಕಳೆದ ಬಾರಿ ಗೆಲುವು ಸಾಧಿಸಿತ್ತು. ಇವರ ಪೈಕಿ ಶ್ರೀನಿವಾಸ ಮಾನೆ ವಿಧಾನಸಭೆ ಪ್ರವೇಶಿಸಿರುವುದರಿಂದ ಆ ಕ್ಷೇತ್ರಕ್ಕೆ ಸಮರ್ಥ ಅಭ್ಯರ್ಥಿ ಹೂಡಬೇಕಿದೆ. ಹಾಗೆಯೇ 73 ವರ್ಷ ಹರೆಯದ ವಿಧಾನ ಪರಿಷತ್ ಪ್ರತಿಪಕ್ಷ ನಾಯಕ ಎಸ್.ಆರ್. ಪಾಟೀಲ್ ಅವರಿಗೆ ಪುನಃ ಅವಕಾಶ ಕಲ್ಪಿಸಬೇಕೋ ಅಥವಾ ಬೇರೆಯವರನ್ನು ಆಯ್ಕೆ ಮಾಡಬೇಕೋ ಎಂಬ ಗೊಂದಲದಲ್ಲಿ ಪಕ್ಷಇದೆ.
